Peeci

Peeci Pinus sylvestris (Linnaeus, 1753)
Tile	LC (eellimvuáimálâš)
Tile Suomâst	LC (eellimvuáimálâš)
Tieđâlâš luokittâllâm
Doomeen	Sellâvááimusliih Eucarya
Kodde	Šadoh Plantae
Vyelikodde	Pocceešadoh Tracheobionta
Tävgi	Siemâšadoh Spermatophyta
Vyelitävgi	Kuácceemuorah Pinophytina
Luokka	Kuácceemuorah Pinopsida
Lahko	Pinales
Hiäimu	Pecišadoh Pinaceae
Suuhâ	Peesih Pinus
Šlaajâ	sylvestris

Peeci (Pinus sylvestris) lii kuácceemuorâ. Peeci lii siđhes muorâ, mii šadda sehe enâmist, mast láá ennuv raavvâdamnâseh, já enâmijn, main toh láá uccáá. Čuovâ tot kuittâg váátá, ige tot piergii stuorrâ muorâi suoivust. Peeci já kuosâ láá kuácceevyevdi uáiváámusah.

Peeci suomâkielân já eres sämikieláid

• suomâkielân: metsämänty
• maadâsämikielân: biedsie
• umesämikielân: biehtsee
• pittáámsämikielân: biehtse
• juulevsämikielân: biehtse
• orjâlâškielân: beahci
• nuorttâlâškielân: pieʹcc
• kieldâsämikielân: пе̄дзь

Levânem Suomâst

Peeci lii ubâ Suomâst almolâš muorâ suullân Aanaar - Njiävđám - Iänuduv Gárasavvon -linje räi. Ton taavaabeln šaddeh ohtuunis peesih, eereeb Aanaarjuuvâ, Ucjuuvâ já Puálmágjuuvâ leevijn láá vala vijđes pecimeecih-uv.

Kiävttu sämmilij kulttuurist

Tovle peesist finnij kuolmâs, mii lâi tehálâš jávuaamnâs sämmilijd já tot lasettui-uv maaŋgâlágánijd purrâmâššáid. Kuolmâs pieijui ovdâmerkkân piärgu- teikkâ kyelimáálán, kyeliliemân já suohâdân. Anarist sämmiliih läävejii liäibuđ tast teikkâ siävuttiđ tom eres jávuiguin.

Sämmiliih läävejii kevttiđ piihâ puohmuđusij vaaivij tipšomân. Almolávt peesi ihešoddâmkeerdijn (suomâkielân kerkkä) vuoššum siirápáin já teejáin ulmuuh tipšuu kuorsâttuv já kiđđâvaibâmvuođâ. Pecikuácceeoljolávgu kevttui leesmi já haavij tipšomist. C-vitamiin pecikuáccein lii ennuv, eromâšávt tälviv. Pikkâ já piihâst rahtum vuoidâseh išedeh liškevaaivijn já haavij puárránmist.

Kovegalleria

• 
  Peeci (Pinus sylvestris)
• 
  Peeci (Pinus sylvestris)