Aanaar Pride
Aanaar Pride lii aanaarlij pridefestivaal, mii Aanaar nuorâistivrâ uárnee jyehi keesi Anarist.[1] Tot lii ubâ Suomâ tavemus Pride.[2]
Historjá
[mute | mute käldee]Vuossâmuš Aanaar Pride uárnejui syeinimáánu 2. peeivi 2022.[3] Fáruluvâi jottee juávkku vuolgij Sale-käävpi oovdâst já moonâi Aanaar markkân čoođâ Saijoos šiljo räi. Tastmaŋa ehidist lijjii jieškote-uvlágáneh konserteh, sahâvuáruh já savâstâlmeh. Iärásij lasseen lávdástii Kaisla Suomisii bändi Pain in the Balls sehe Amandaid, kii lii Suáđigilist vuálgus leijee musikkár. Ohjelmân kuulâi meiddei tánssámpáájá. Tábáhtusân uásálistii suulân 100 olmožid.[2]
Nubbe Aanaar Pride uárnejui porgemáánu 5. peeivi 2023. Tábáhtus aalgij ráiđuväzzimáin tme 13:00 Säämimuseo já luándukuávdáš Siida oovdâst. Ráiđu juuđij Aanaar markkân peht sämikulttuurkuávdáš Sajosân, kost ohjelm jotkui tme 17:30 räi. Tábáhtusâst lávdástii muusikjuávkku Freak Out! já lávloo Lyyti, mon lasseen lyevi lâi ávusin puohháid konsertij maŋa (nk. Open stage). Ohjelmist lâi meiddei el. piknik, tiätukišto, siärvuslii taiđuu rähtim, savâstâllâm sehe räsivierâi já piinsij rähtim.[1]
Kuálmád Aanaar Pride uárnejui kesimáánu 29. peeivi 2024. Tábáhtus aalgij ráiđuväzzimáin tijme 13:00. Säämimuseo já luándukuávdáš Siida oovdâst. Ráiđu juuđij Aanaar markkân peht sämikulttuurkuávdáš Sajosân. Tobbeen tuállojii kijttosaavah. Ovdâmerkkân nuorâistivrâ NuVa kiijtij uásálisteid, sponsorijd, artistijd já ulmuid, kiäh tohhii tábáhtus máhđulâžžân. Tábáhtus suojâleijein Sämitige aairâs já arvetävgisämmilâš Janne Hirvasvuopio tollij sahâvuáru. Aanaar Pridest láin ive 2024 kyehti suojâleijee, kiäin nubbe lâi musikkár Hildá Länsman. Sahâvuárui maŋa aalgij vuosmuš muusiklávdástem, ko aanaarlâš Nicholas Francett lavkkij läävdi oolâ. Francett lávdástem maŋa uárnejui Queer-tiätukišto, mast lâi máhđulâš uážžuđ palhâšume. Tiätukištoost lijjii koččâmušah eres lasseen arvetävgiulmui historjást já kulttuurist. Tiätukišto maŋa ulmuuh pessii oppeet kuldâliđ muusik, ko anarâš Ulpu Mattus-Kumpunen (artistnommâ Ulpu!) láávlui já čuojâttij muusik sämi- já eŋgâlâškielân. Suu maŋa lâi savâstâllâmtilálâšvuotâ. Iššeen kiävttojii Aanaar Pride -savâstâllâmkoortah, main lijjii ovdâmerkkân koččâmušah seksuaal- já suhâpeliucceeblovoi háástuin maailmist. Savâstâllâm stivrij Anne Olli, kii ornij Säämi Pride ive 2017. Tastoo lâi majemuš muusiklávdástem, Freak Out! Muusikjuávkku algâttij Anarist škovlâbändin, mutâ táálááh jesâneh láá meddâl ubâ Laapist. Muusikjuávkku čuojât eromâšávt rock- já meetaalmuusik sehe suomâ- já eŋgâlâskielân. Freak Out! lávdástem nuuvâi suullân tijme 17:00, kuás ubâ tábáhtus meiddei nuuvâi.[4]
Peivimereh
[mute | mute käldee]| Ihe | Peivimeeri |
|---|---|
| 2022 | syeinimáánu 2. peeivi[3] |
| 2023 | porgemáánu 5. peeivi |
| 2024 | kesimáánu 29. peeivi |
Keejâ meid
[mute | mute käldee]Käldeeh
[mute | mute käldee]- ↑ a â Mattus-Kumpunen, Ulpu: Aanaar Pride uárnejuvvoo lávurduv Anarâš aavis. 3.8.2023. Čujottum 3.8.2023.
- ↑ a â Brecciaroli, Fabrizio: Vuossâmuš Aanaar Pride -tábáhtus Loostâš 03/2022. Anarâškielâ servi ry. Čujottum 3.8.2023.
- ↑ a â Seurujärvi, Sáárákáisá: Keejâ kuuvijd vuossâmuš Aanaar Pridest: Uárnejijeeh vuordii tuše váhá uásálisteid, mut uásálistei stuorrâ meeri olâttij Yle Säämi. 4.7.2022. Čujottum 3.8.2023.
- ↑ Gahmberg, Emma: Aanaar Pride uárnejui lávurduv anarasaavis.fi. 1.7.2024. Čujottum 1.7.2024.