Muusikmuseo Fame
Muusikmuseo Fame (suomâkielân Musiikkimuseo Fame, ruotâkielân Musikmuseet Fame já eŋgâlâskielân Finnish Music Hall of Fame) lâi čohčuv 2019 lekkum muusikmuseo kävppikuávdáš Triplast, koskâ-Pasilast, Helsigist, Suomâst.[1][2] Fame lâi vuossâmuš syemmilii museo, mii kieđâvušâi syemmilâš muusik vijđásávt šlaajâst peerusthánnáá. Muusikmuseo lopâttij toimâidis vyesimáánu 8. peeivi 2024.[2]
Historjá[mute | mute käldee]
Tukholmast, Ruotâst leijee ABBA: The Museum lâi tehálâš inspiraatio käldee, mut muusikmuseo Fame lâi interaktiivlub ko ruátálâš museo.[3] Taan tááhust muusikmuseo Fame lâi pyerebeht-uv siämmáálágán ko Ragnarock, Tanskaast já Rockheim-museo, Ruándimist, Taažâst, moh lijjii meid Fame inspiraatio käldeeh.
Kuhháá ij lamaš visesvuotâ tast, et finnee-uv museo tuárvi ruuđâ suulân 4,5 miljovn euro budjetsis.[4] Museo vuáđudui iänáážin priivaatruttâdmáin, mut sehe Helsig kaavpug já Suomâ staatâ meid ruttâdii tom.[5] Neelji ive vuávám maŋa museo lekkui roovvâdmáánu 17. peeivi 2019 ađai siämmáá peeivi ko kävppikuávdáš Tripla-uv.[3][6][7]
Ive 2020 finnodâhsaneeristem[mute | mute käldee]
Vááijuv ihe vuáđudem maŋa museo ucâlui finnodâhsaneeristmân. Museo stiivrâ saavâjođetteijee mield Famest ellii tuárvi ennuv museokyesih tassaaš ko puoh museoh piäijojii kiddâ njuhčâmáánu 19. peeivi 2020 koronapandemia keežild. Ko museo lekkui 2,5 mánuppaje maŋeláá, te museokyesih iä kiergânâm uáli kuhháá eelliđ tobbeen ovdil ko pandemia viäránij uđđâsist já kyesih oppeet jävkittii tego suovâ ááimun.[5] Museo lâi kuuitâg finnim nk. koronatorjuu.[8]
Ive 2024 koŋkurs[mute | mute käldee]
Cuáŋuimáánu 2024 loopâst muusikmuseo Fame tuávvášfinnodâh Finnish Music Hall of Fame Oy ucâlui koŋkursân, tastko museokyessimeeri ij pajanâm pandemia maŋa nuuvt, ete lippupuáđuh liččii luávdám soojij tivrâs lááigu já eres koloid.[8] Museohovdâ tuáivu, ete kiinii juáđháččij museo tooimâ.[8]
Sajadâh já huksiittâs[mute | mute käldee]
Museo lâi kävppikuávdáš Triplast, koskâ-Pasilast, Helsigist, Suomâst.[1] Museon peesâi jo-uv njuolgist kävppikuávdáá ulguubeln Pasilašalde peht teikkâ kävppikuávdáá siste kuálmád keerdist.
900 m2 museovisteest lijjii museo lasseen raavâdviäsu Fame, museokävppi, terassi já ive 2018 vuáđudum Suomâ muusik kunneegalleria.[9] Museo já raavâdviäsu uárnejii konsertijd já maaŋgâlágán tábáhtusâid oovtâst muusiksyergi tuáimeiguin.
Čáitálduvah[mute | mute käldee]
Museost lijjii käävci lonnjâd. Oovtâ loonjâst lijjii mulsâšuddee čáitálduvah, já loopâin loonjâin lijjii vuáđučáitálduvah.[10]
Vuáđučáitálduvah[mute | mute käldee]
Museost lijjii čiččâm vuáđučáitáldâhhân: Suomen soiva tarina (Suomâ čyeijee maainâs), Suomâ muusik kunneegalleria, Suomalaisen musiikin sielu (Syemmilii muusik siälu), Löydä musiikin tekijät (Kaavnâ muusikrähteid), Syvälle sointihuumaan (Jieŋâlâsân čuoijâmekstaasân), Virtuaalinen karaokekiertue (Virtuaallâš karaoketurnee) já Tanssâstudio.[10] Vuossâmuu čáitáldâhloonjâst ađai Suomen soiva tarina -loonjâst lâi 8 miinut pištee uánihis elleekove, mii muštâlij syemmilii muusik tehálijn muddoin ivveest 1890 onnáá piäiván.[11] Suomâ muusik kunneegalleria lâi museo váldučáitáldâh. Tobbeen puovtij uápásmuđ já vuáijuđ muusikmaailmân. Jyehi ive mulsâšuddee kunneegalleria čáitáldâh nuurâi oovtâ loonjân tiäđuid, moh kuoskii jieškođe-uv ive kunneegallerian väljejum musikkáráid já artistáid.[12] Suomalaisen musiikin sielu -loonjâst lâi interaktiivlâš čáitáldâh, mast puovtij uápásmuđ tagaráid äigittes já šlaajâttes fáddáid, main šadda syemmilâš muusik.[13] Löydä musiikin tekijät -loonjâst lijjii kuoskâttâsčááituh, moh fallii museokuossijd máhđulâšvuođâ oppâđ uđđâ aašijd jo uápis artistijn já muusikjuávhuin sehe uápásmuđ uđđâ artistáid já muusikjuávhoid.[14] Syvälle sointihuumaan -loonjâst museokyessi puovtij fiäránistiđ, maht oro leđe sinfoniaorkester, kuoro teikkâ posonjâsjuávhu kappelmiäštár olmâlágán konserttiileest.[3][15] Virtuaalinen karaokekiertue -loonjâst museokyessi peesâi lávdástiđ lyeve alne virtuaaltuođânálásâšvuođâ peht. Museo majemuu čáitálduvvâst ađai Tanssâstudiost museokyessi puovtij oppâđ maaŋgâid tanssâšlaajâid. Máttáátteijen toimii pegâlmâs syemmiliih tánssájeijeeh.[16]
Mulsâšuddee čáitálduvah[mute | mute käldee]
Vuáđučáitálduvâi lasseen museost lijjii mulsâšuddee čáitálduvah maaŋgâlágán fáádáin tegu "párnáimuusik", "časkoslavlui evoluutio", "suomâráp", "nisoneh populaarmuusik" já "syemmilâš meetaalmuusik".[17][18]
Suomâ muusik kunneegalleria[mute | mute käldee]
- Válduartikkâl: Suomâ muusik kunneegalleria
Museo vááimus lâi Suomâ muusik kunneegalleria, moos väljejuvvojii jyehi ive muusikšlaajâst peerusthánnáá tagareh muusiksyergi vaikutteijeeh, maid syemmiliih aneh áárvust. Uđđâ jesânijd valjij jiešmerideijee komitea, mast lijjii äššitobdeeh já ovdâsteijeeh Suomâ muusiksyergi merhâšitteemuin ornijduumijn tegu Musikkárij litto, Teosto, Gramex jna.[9][19] Valjimkomitea stivrejeijen tooimâi syemmilâš juuriist Lauri Tarasti.[19]
Kunneegalleria čáitáldâh muttui jyehi ive galleria uđđâ jesânij valjim maŋa.[3][12]
Pargo[mute | mute käldee]
Muusikmuseo oovdânpuovtij syemmilijd artistijd, nuotâsteijeid, kappelmiäštárijd já muusiksyergi eres vaikutteijeid já luptij syemmilâš muusik áárvu. Ton lasseen museo vuorkkij Suomâ muusik kulttuuräärbi já ovdedij ton digitaallii finnimvuođâ. Muusikmuseo Famest iä lamaš jieijâs čuágálduvah, pic tot västidij oovtâst Suomâ aalmuglâšmuseoin Suomâ muusik tiŋgâčuágálduv, mii lii uáinusist Museovirgáduv čuágáldâh- já konservistemkuávdáást Hakkilast, Vantaast.[19]
Estâttesvuotâ[mute | mute käldee]
Ubâ museo já ton parkkisaje lijjii iästuttemeh.[17][20] Museost lâi meid induktiovárvu.[17]
Fáádást eres soojijn[mute | mute käldee]
Käldeeh[mute | mute käldee]
- ↑ 1,0 1,1 Mikä on musiikkimuseo Fame FAME Musiikkimuseo. Čujottum 17.10.2019.
- ↑ 2,0 2,1 Musiikkimuseo fame on sulkenut ovensa Muusikmuseo Fame. Čujottum 10.5.2024. (suomâkielân)
- ↑ 3,0 3,1 3,2 3,3 Aromaa, Jonni: Helsingin uusi musiikkimuseo on elämyksellisempi kuin Tukholman Abba-museo, mutta ahdasta siellä voi tulla Yle Uutiset. 16.10.2019. Čujottum 3.5.2024. (suomâkielân)
- ↑ Aromaa, Jonni: Sampo Terho: Valtio lähtee rahoittamaan yksityistä musiikkimuseota - kunniagalleriaan pääsivät jo Katri-Helena ja Sibelius Yle Uutiset. 11.10.2018. Čujottum 3.5.2024. (suomâkielân)
- ↑ 5,0 5,1 Sundqvist, Janne: Musiikkimuseo Fame yrityssaneeraukseen – yksityinen museo on toiminut vasta vuoden Yle Uutiset. 1.10.2020. Čujottum 3.5.2024. (suomâkielân)
- ↑ Puukka, Päivi: ”Konkurssi siitä tulee” – musiikkimuseo Fame ei noussut koronan jälkeen, jätti konkurssihakemuksen Yle Uutiset. 2.5.2024. Čujottum 3.5.2024. (suomâkielân)
- ↑ Musiikkimuseo Fame avautuu 4,3 miljoonan euron investointina Muusikmuseo Fame. 20.9.2019. Čujottum 3.5.2024. (suomâkielân)
- ↑ 8,0 8,1 8,2 Vahtera, Jasmin: Musiikkimuseo Fame hakeutui konkurssiin. Helsingin Sanomat, 2.5.2024. Artikkâl nettiversio Čujottum 16.5.2024. (suomâkielân)
- ↑ 9,0 9,1 Suomalaisen musiikin elämyskokemus www.yit.fi. Čujottum 3.5.2024. (suomâkielân)
- ↑ 10,0 10,1 Tutustu museoon musiikkimuseofame.fi. 30.11.2022. Čujottum 4.5.2024. (suomâkielân)
- ↑ Suomen soiva tarina - Musiikkimuseo Fame musiikkimuseofame.fi. 7.12.2022. Čujottum 3.5.2024. (suomâkielân)
- ↑ 12,0 12,1 Suomen musiikin kunniagalleria - Musiikkimuseo Fame musiikkimuseofame.fi. 20.9.2021. Čujottum 3.5.2024. (suomâkielân)
- ↑ Suomalaisen musiikin sielu - Musiikkimuseo Fame musiikkimuseofame.fi. 7.12.2022. Čujottum 3.5.2024. (suomâkielân)
- ↑ Löydä musiikin tekijät - Musiikkimuseo Fame musiikkimuseofame.fi. 7.12.2022. Čujottum 3.5.2024. (suomâkielân)
- ↑ Syvälle sointihuumaan - Musiikkimuseo Fame musiikkimuseofame.fi. 7.12.2022. Čujottum 3.5.2024. (suomâkielân)
- ↑ Tanssistudio - Musiikkimuseo Fame musiikkimuseofame.fi. 7.12.2022. Čujottum 3.5.2024. (suomâkielân)
- ↑ 17,0 17,1 17,2 Museokortti-kohde: Musiikkimuseo Fame Museokortti. Čujottum 3.5.2024. (suomâkielân)
- ↑ Syväluoma, Ville: 40 vuotta suomiräppiä: Musiikkimuseo Fame avaa historiallisen suomirap-näyttelyn Klangi. 9.11.2023. Čujottum 3.5.2024. (suomâkielân)
- ↑ 19,0 19,1 19,2 Suomen kansallismuseo ja Musiikkimuseo Fame yhteistyöhön Suomâ aalmuglâšmuseo. 15.10.2019. Čujottum 3.5.2024. (suomâkielân)
- ↑ Saapumisohjeet - Musiikkimuseo Fame musiikkimuseofame.fi. 20.9.2021. Čujottum 3.5.2024. (suomâkielân)