Njuškii siskáldâsân

Puškolodde

Wikipedia:st
Puškolodde
Numenius phaeopus
(Linnaeus, 1758)
Tile LC (eellimvuáimálâš)[1]
Tile Suomâst LC (eellimvuáimálâš)[2]
Tieđâlâš luokittâllâm
Doomeen Sellâvááimusliih Eucarya
Kodde Elleekodde Animalia
Uáiviráiđu Savosuonâsiih Chordata
Vyeliráiđu Čielgitávtáliih Vertebrata
Luokka Lodeh Aves
Lahko Riddolodeh Charadriiformes
Vyelilahko Kalâččeijeeh Charadrii
Hiäimu Miähástuvah Scolopacidae
Suuhâ Kuškástuvah Numenius
Šlaajâ phaeopus

Puškolodde (Numenius phaeopus) lii miähástuvâi hiäimun kullee kalâččeijee. Tot lii kiiđâ aairâs. Puškolodde lijkkoo várdáástâllâđ muorâkierrust tâi látukáátu alne.

Puárásumos Suomâst riegistum puškolodde lii lamaš neelji-ihásâš. Euroop puárásumos lii lamaš eŋlandlâš lodde, mii lii lamaš 16 ihheed já 1 mánuppaje puáris.[3]

Nommâ[mute | mute käldee]

Tot, mast nommâ poođiš, ij lah tiäđust, mut mahtnii oroččij, et ko puškoost lii kuhes njune, te talle puškolode njune sulâstittáččij mahtnii puško njune.[3]

Stuárudâh[mute | mute käldee]

Puškolodde lii 40–46 cm kukke, já ton suájákejij koskâ lii 75–90 cm.[3]

Jienâ já ton merhâšume[mute | mute käldee]

Ko kulá puškolode puljârdeijee jienâ "ky-klyy-klyy-kly-kly-kly-kly-kly-kly-yyy...", te talle ij lah innig pase moonnâđ jieŋâi ollâ. Puškolodde uáináh puátá Viestâr-Afrikist Sáámán vyesimáánu loopâbeln eidu toi aaigij, ko älgih leđe jo pänijieŋah – toh iä innig kyedi ubâ čyeigeegin.[3]

Tiettum Aanaar kuávlust[mute | mute käldee]

Puškolodde lii viehâ táválâš pessimlodde AanaarUcjuv pelni já tot kulá jeggiludij stuárráámuid oovtâst kuškástuvváin, lavgâluddijn já kuorgáin.[3]

Čohčâvarrim[mute | mute käldee]

Keesi loppâkeččin puškolodeh čokkânškyeteh tuákkin já tolliitteh porge-čohčâmáánust máádás. Toi mittomeerrin lii Viestâr-Afrik, kost toh viettih täälvi já mäccih oppeet Sáámán vyesimáánust.[3]

Lasanem[mute | mute käldee]

Puškolodde pessee táválávt jolgâ jeggipááikán tâi jolgâsiähá čuopâttâhân. Piervâl lii tuše koovááš enâmist, mon lodde skoođâst koške suoinijguin já lostâiguin. Nelji ruánáásiähá ruškistiälkkusâš mane almostuveh piervâlkopán vyesimáánu loopâst, já kuohtuuh vaanhimeh läälliv taid pajeláhháá kulmâ oho. Ko uđâgááh láá kočâttâm korâidis, te kuohtuuh vaanhimeh aitârdává taid vala nuuvt kuhe, ko toh peessih suájáidis oolâ.[3]

Eidu läällimääigi puškolodde lii uáli skelmâ. Ko tot áiccá, et miinii vaarâid áštá piervâl (olmooš teikkâ ellee), te tot lättee siämmáánáál, tegu uáli čuuvtij lammâšum lodde. Tot vierâd, roovvâd iärtán já vázzá uáli vaigâdávt, lii läämist. Talle vajalâš tiäđust-uv pivdeškuát tom, mut sáttá keevvâđ nuuvt-uv, et pivdee láppoo, ige innig tieđe, kost lii.[3]

Raavâd[mute | mute käldee]

Puškolodde porá maaŋgâlágánijd uccâ elleežijd, muorjijd já šaddoid.[3]

Fáádást eres soojijn[mute | mute käldee]

Käldeeh[mute | mute käldee]

  1. Whimbrel BirdLife International. Čujottum 6.3.2023. (eŋgâlâskielân)
  2. Valkama, Jari: Pikkukuovi – Numenius phaeopus Suomen Lajitietokeskus. 2019. Čujottum 6.3.2023. (suomâkielân)
  3. 3,0 3,1 3,2 3,3 3,4 3,5 3,6 3,7 3,8 Mattus, Ilmari: Puškolodde. Anarâš-kalender 2020, 2020. Anarâškielâ servi ry.