Elizabeth II

Elizabeth II ive 2015

Kunâgâtâr Elizabeth II (Elizabeth Alexandra Mary; š. cuáŋuimáánu 21. peeivi 1926, Lontoo, Eŋland, Ovtâstum kunâgâskodde – čohčâmáánu 8. peeivi 2022, Balmoral lanne, Skotland, Ovtâstum kunâgâskodde) lâi Ovtâstum kunâgâskode 40. haldâšeijee. Sun lâi meid 15 eres eennâm staatâuáivialmai, ovdâmerkkân Kanada, Australia já Uđđâ-Seeland. Elizabeth II šoodâi haldâšeijen George VI jäämmim maŋa kuovâmáánu 6. peeivi 1952.

Elizabeth pelikyeimi lâi Prinssâ Philip ivveest 1947 ihán 2021. Sunnust láá nelji päärni: Charles (š. 1948), Anne (š. 1950), Andrew (š. 1960) sehe Edward (š. 1964). Elizabethist láá käävci ákkuvid.

Roovvâdmáánust 2016 Elizabeth šoodâi maailm kuhesáigásâš vääldist leijee monarkin. Kunâgâtârist láá vala-uv vijđes väldivuoigâdvuođah, mutâ sun ij keevti taid já haaldâšmist huolâtteh ovdâskodde já haldâttâs, tego maaŋgâin eres-uv demokraatlijn enâmijn.

Nuorâvuotâ

Elizabeth Alexandra Mary Windsor šoodâi kuovâmáánu 21. peeivi 1926 Lontoost. Suu eeči lâi York herttua (maŋeláá kunâgâs George VI) já suu enni lâi York herttuatar Elizabeth (algâaalgâlâš nommâ Lady Elizabeth Bowes-Lyon). Elizabeth vuossâmuš nommâ puátá enistis, nube nommâ puátá madâráhustis kunâgâtâr Alexandrast já kuálmád nommâ puátá áhustis kunâgâtâr Maryst. Perrust Elizabeth kočodii noomáin "Lilibeth".

Näimilitto já ennivuotâ

Elizabeth já Philips naajáin skammâmáánu 20. peeivi 1947. Philip lâi Elizabeth kuálmád viljâpeeli. Luutnant Philip Mountabatten finnij árvunoomâ Edinburgh herttua ovdil vihkâm. Näimilitto ij lamaš uárnejum já tot heivij Elizabethân pyereest, tastko Philip kuulâi oohtân Euroop puárásumosijn kunâgâssuuvâin.

Maajeeldpuátteeh

Elizabeth II, prinssâ Philip, prinssâ Charles já prinses Anne ive 1957

• Wales prinssâ Charles (š. 14. skammâmáánu 1948), naaijâm Lady Diana Spenceráin iivij 1981–1996 já Camilla Parker Bowlesáin ive 2005 rääjist
  • Prinssâ William (š. 21. kesimáánu 1982), naaijâm Catherine Middletonáin ive 2011 rääjist
    • Prinssâ George (š. 22. syeinimáánu 2013)
    • Prinses Charlotte (š. 2. vyesimáánu 2015)
    • Prinssâ Louis (š. 23. cuáŋuimáánu 2018)
  • Prinssâ Harry (š. 15. čohčâmáánu 1984), naaijâm Meghan Marklein ive 2018 rääjist
    • Archie Mountbatten-Windsor (š. 6. vyesimáánu 2019)
    • Lilibet Mountbatten-Windsor (š. 4. kesimáánu 2021)
• Prinses Anne (š. 15. porgemáánu 1950), naaijâm kapteen Mark Phillipsáin 1973–1992 já kontra-amiraal Timothy Laurencijn ive 1992 rääjist
  • Peter Phillips (š.15. skammâmáánu 1977), naaijâm Autumn Kellyin ive 2008 rääjist
    • Savannah Phillips (š. 30. juovlâmáánu 2010)
    • Isla Phillips (š. 29. njuhčâmáánu 2012)
  • Zara Phillips (š. 15. vyesimáánu 1981), naaijâm Mike Tindalláin ive 2011 rääjist
    • Mia Grace Tindall (š. 17. uđđâivemáánu 2014)
    • Lena Elizabeth Tindall (š. 18. kesimáánu 2018)
• Prinssâ Andrew (š. 19. kuovâmáánu 1960), naaijâm Sarah Fergusonáin iivij 1986–1996
  • Prinses Beatrice (š. 8. porgemáánu 1988), naaijâm Edoardo Mapelli Mozzijn ive 2020 rääjist
  • Prinses Eugenie (š. 23. njuhčâmáánu 1990), naaijâm Jack Brooksbankáin ive 2018 rääjist
• Prinssâ Edward (š. 10. njuhčâmáánu 1964), naaijâm Sophie Rhys-Jonesáin ive 1999 rääjist
  • Lady Loiuse Windsor (š. 8. skammâmáánu 2003)
  • James Windsor (š. 17. juovlâmáánu 2007)