Yes

Yes
Yes lávdástâlmin ive 1977. Jesâneh čižetpeln uálgispel: Steve Howe, Alan White, Ian Anderson, Chris Squire, Rick Wakeman
Tiäđuh
Aktiivlâžžân	1968–1981, 1983–
Stijlâšlaajâ	progressiivlâš rock poprock (1980-lovvoost)
Päikkisaje	Lontoo, Ovtâstum kunâgâskodde
Lávlumkielâ	eŋgâlâskielâ
Jesâneh	Jon Davison, laavlâ (2012–) Steve Howe, kiitaar (1970–1980, 1996–) Geoff Downes, kuoskâttâsčuojânâsah (1980, 2011–)
Ovdiih jesâneh	Jon Anderson, laavlâ (1968–1979, 1983–2004) Chris Squire, basso (1968–2015) Bill Bruford, ruumbuh (1968–1972) Alan White, ruumbuh (1972–2022) Rick Wakeman, kuoskâttâsčuojânâsah (1971–1974, 1976–1979, 1996, 2002–2004) tievâslâš listo

Yes lii Lontoost puáttee eŋlandlâš progressiivlâš rockjuávkku. Yes vuáđudáin lávloo Jon Anderson já basist Chris Squire ive 1968. Juávkku pieđgânij ive 1980, mut poođij poprock-stijláin maasâd ive 1983. Yes nomâttii Rock and Roll Hall of Famen ive 2017.

Historjá

Vuáđudem já 1970-lovo algâ

Yes vuáđudáin lávloo Jon Anderson já basist Chris Squire ive 1968. Squire lâi ovdil lamaš The Syn -nommâsâš psykedeelisâš rockjuávhust já Anderson Warrior- sehe The Gun -juávhuin. Maŋeláá fáárun pottii jazz-vaikuttâsâš rumbal Bill Bruford, Squire naalijn The Syn -juávhust suáittám kitarist Peter Banks sehe kuoskâttâsčuojâtteijee Tony Kaye.

Juávhu finnij aalgâst huámmášume tast, ete tot čuojâttij coverijd tobdos juávhui pittáin, moh lijjii muálkkáábeh já kuhebeh ko algâalgâliih. Tain The Beatles pittá "Every Little Thing" peesâi juávhu vuosâalbumân Yes (1969). Nube albumist Time and a Word (1970) juávkku keevtij studiost iššeen tuávvášorkester. Juávhu kulostui pyerebeht Euroopist albumáin The Yes Album (1971), mast progressiivlâš rock-stijlâsâš nuotâstem aalgij jo leđe merhâšittee uásist. Siämmáá ive almostittum Fragile vievâst Yes finnij mielâstumvuođâ meid Ovtâstum staatâin, ko albumist valdum single "Roundabout" pajanij Billboard Hot 100 -listo sajan 13. Albumist lâi fáárust vuossâmuu keerdi Yes tobdosumos čuojâtteijeejuávkku ađai Anderson, Bruford, Squire, Peter Banks sajan puáttám Steve Howe sehe Tony Kaye sajan puáttám Rick Wakeman.

Čuávuváá albumist Close to the Edge (1972) juávhu keččâlâddâmnálásâšvuotâ sehe kunneehänis nuotâstâsah lasanii vala-uv eenâb. Albumist láá kulmâ pitá, main nommâpittá lii masa 19 minuttid kukke já tiävdá ubâ LP-skiäru A-pele. Sehe kuldâleijeeh ete kritikkáreh lijkkojii Close to the Edgen uáli ennuv, já album sehe eromâšávt ton nommâpitá aneh vala-uv ohtân progressiivlâš rock merhâšitteemuin tuojijn. Bill Bruford vuolgij juávhust váhá ovdil album almostittem já seervâi King Crimsonân. Suu sajan poođij ovdâmerkkân John Lennon já George Harrison tuávvášjuávhuin čuojâttâm Alan White. Album almostittem maŋa álgám turneest päddejii livealbum Yessongs (1973), mii lâi ohtâ vuossâmuin tripla-LP:in maailmist.

Ive 1973 almostui meid čuávuvâš studioalbum Tales from Topographic Oceans. Tot lii tublealbum, mast láá nelji pitá, moh puoh láá oovtâ LP-skiäru pele ađai suulân 20 miinuut kukkosiih. Album juovij kuldâleijei uáinuid. Motomij Yes kannatteijei mielâst album lâi joba pyereeb ko Close to the Edge, mut eromâšávt maaŋgâi kritikkárij mielâst album lâi liijkás epičielgâs já kunneehäänis. Kuoskâttâsčuojâtteijee Rick Wakeman ij lijkkum albumân já sun vuolgij juávhust turnee maŋa já vuájui soolokarrieersis.

1970-lovo loppâ já pieđgânem

Wakeman sajan poođij sveiccilâš Patrick Moraz, kiäst lâi hárjánem enâmustáá jazz-stijlâsâš juávhuin. Uđđâ čuojâtteijeejuávkku raahtij tuše oovtâ album Relayer (1974), mii lâi-uv Moraz vaikuttâsâst eenâb jazz-stijlâsâš ko ovdebeh albumeh. Kuhes turnei já čuojâtteijei sooloprojektij tiet čuávuvâš album Going for the One almostui eskin ive 1977. Album pitáh láá váhá uánihuboh ko ovdebijn Yes albumijn, mut progressiivlâš rock stijlâ lii vala siäilum. Rick Wakeman meid poođij ive 1976 loopâst maasâd juávkun Moraz sajan.

Punk já disko mielâstumvuođâ stuárrum tiet maaŋgah progressiivlâš rockjuávhuh muteškuottii stijlâs oovtkiärdánubbon 1970-lovo loopâst. Meid Yes poorgâi nuuvt čuávuváá albumist Tormato (1978). Yesân epitáválâš, váhá pop-stijlâsâš oovtâkiärdánub muusik ij finnim kritikkárij teikâ kuldâleijei mielâstumvuođâ já vuástáväldim lâi viehâ ruossâlâs. Lávloo Jon Anderson iäránij ive 1980 juávhu koskâsâš sierâmielâlâšvuođâi tiet. Meid Rick Wakeman vuolgij juávhust jo nube keerdi. Sunnuu sajan poođijn lávloo Trevor Horn já kuoskâttâsčuojâtteijee Geoffrey Downes. Siämmáá ive almostui uđđâ album Drama, mon stijlâ lâi Tormatolágán váhá pop-stijlâsub muusik, mast lâi kuittâg-uv mottoom verd progressiivlâš rock jiešvuođah. Album ij finnim kávpálâš miänástus teikâ kuldâleijei mielâstumvuođâ já tondiet juávkku pieđgânij koskâpudâlávt ive 1981.

1980- já 1990-lovoh

Juávhu sierâmielâlâšvuođâi já pieđgânem ääigi Geoffrey Downes já kitarist Steve Howe vuáđudáin Asia-nommâsâš juávhu oovtâst ovdebáin King Crimson já U.K. lávloo-basist John Wettonáin sehe Emerson, Lake & Palmer rumbal Carl Palmeráin.

Yes oovdeb basist Chris Squire já rumbal Alan White vuáđudáin maađâafriklâš kitarist-lávloo Trevor Rabináin Cinema-juávhu, mii čuojâttij Yes majebij albumij stijlâsâš muusik. Juávhust lâi fáárust meid Yes algâalgâlâš kuoskâttâsčuojâtteijee Tony Kaye. Jon Anderson movtáskij juávhust já sij vuávááškuottii Yes maccâm. Uđđâ album 90125 (1983) lâi miänástus, já tot pajanij Ovtâstum staatâi listo viiđâd sajan já Britanniast sajan 16. Albumist valdum singlest "Owner of a Lonely Heart" šoodâi hitti, já tot pajanij Ovtâstum staatâi listo njunošân. Album stijlâ lâi jo putes poprock, nuuvtko meid čuávuváá album Big Generator (1987).

1980-lovo loopâst Anderson iäránij oppeet Yesist, tastko sun ij lijkkum juávhu muusiklâš suundán. Sun algâttij sooloproojeekt, moos pottii fáárun meid ovdebááh Yes jesâneh Steve Howe, Rick Wakeman já Bill Bruford. Musikkárij ovtâspargo mield poođij spekulistmeh "klassisâš" Yes maccâmist. Yes-noomâ vuogâdvuođah lijjii kuittâg-uv Chris Squirest já Alan Whitest, ko suoi iävá lamaš kuássin iäránâm juávhust. Tondiet proojeekt nommân šoodâi loppâloopâst Anderson Bruford Wakeman Howe. Sij almostittii siämmáánommâsâš album ive 1989. Ive 1991 almostui Yes-noomâ vuálá album Union. Album pittáin kyehti kuálmáduási láá Anderson Bruford Wakeman Howe pitáh já loopah láá Yes-noomâ virgálávt kiävttám juávhu pitáh. Jon Anderson kuittâg-uv lávlu puoh pittáin. Albumist čuojâtteh meid maaŋgah sessiomusikkáreh, ovdâmerkkân basist Tony Levin, kiäin Bill Bruford lâi čuojâttâm King Crimsonist 1980-lovvoost.

Maaŋgah juávhu čuojâtteijeeh láá maŋeláá ávuslávt kritisistám album. Ovdâmerkkân kuoskâttâsčuojâtteijee Rick Wakeman leggistij suu kopio albumist limusiin laasâst olgos tondiet ko sun ij iäruttâm jieijâs čuojâttem lopâlâš albumist. Sun lii maŋeláá koččom album noomáin "Onion" (anarâškielân Siipuul), tastko sun halijdičij ain čiärruđ tom kulâdijnis. Album turnee maŋa Wakeman, Bill Bruford já Steve Howe kuođđii Yes; Bruford lopâlávt.

Čuávuváá albumist Talk (1994) lâi fáárust siämmáš čuojâtteijeejuávkku ko Big Generatorist, já tot lâi Yes vuossâmuš digitaallávt jienâttum album. Tot finnij Union naalijn negatiivlâš vuástáväldim, já album turnee maŋa Trevor Rabin já Tony Kaye vuolgijn juávhust. Sunnuu sajan poođijn oppeet Steve Howe já Rick Wakeman. Iivij 1996 já 1997 juávkku almostitij albumijd Keys to Ascension já Keys to Ascension 2, main lijjii sehe liven čuojâttum puáris pitáh ete studiost jienâttum uđđâ pitáh. Yes almostitij 1990-lovvoost vala kyehti album Open Your Eyes (1997) já The Ladder (1999), main čuojâttij siämmáš čuojâtteijeejuávkku, pic Rick Wakeman saajeest kuoskâttâsčuojânâsâid čuojâttij vuosmuu albumist Billy Sherwood já nube albumist Igor Khoroshev.

2000-loho

Ive 2001 almostui Yes oovcenubálovváád album Magnification. Album čuojâtteijeejuávhust ij lamaš fáárust kuoskâttâsčuojâtteijee, mut ton saajeest albumân rahtui orkesterheiviittâs, mon San Diego sinfoniaorkester čuojâttij. Album ij miänástum kávpálávt já tot pajanij Britanniast sajan 71 já Ovtâstum staatâin sajan 186. Yes lávdástij iivij 2001–2004 ennuv já meid Rick Wakeman maacâi cuáŋuimáánust 2002 juávkun.

Iivij 2005–2007 Yes toolâi puudâ láávdástmist já uđđâ materiaal rähtimist. Juávkku suunâttâlâi vyesimáánun turnee 40 toimâive kunnen, mut kiäsádâđâi Anderson tiervâsvuođâlâš čuolmâi tiet. Anderson ij innig maccâm Yesân, veik sun lii lávdástâm juávhoin maŋeláá-uv. Juávkku joođhij lávdástem Andersonttáá siämmáá ive čohčâmáánust uđđâ lávloo Benoît Davidáin. Rick Wakeman ij lamaš innig taan čuojâtteijeejuávhust fáárust já suu sajan lâi puáttám suu kandâ Oliver. Čuávuvâš album Fly from Here almostui ive 2011. Fáárust lâi meid Geoffrey Downes, kii lâi čuojâttâm kuoskâttâsčuojânâsâid Oliver Wakeman lasseen Drama-albumist. Tastmaŋa Downes šoodâi juávhu virgálâš čuojâtteijen Wakeman saajeest.

Ive 2012 Benoît David vuolgij juávhust kepistaavdâ tiet já suu sajan poođij Jon Davison. Čuávuvâš album Heaven & Earth almostui ive 2014. Tot finnij ruossâlâs teikâ negatiivlâš vuástáväldim nuuvtko maaŋgah Yes albumeh 1980-lovo maŋa, mut miänástui kávpálávt viehâ pyereest, ko pajanij Britannia listoost sajan 20 já Ovtâstum staatâi listoost sajan 26.

Basist Chris Squire jaamij kesimáánust 2015 já suu sajan poođij Billy Sherwood, kii lâi čuojâttâm kuoskâttâsčuojânâsâid já kiitaar juávhust 1990-lovo loopâst. Yes lávdástâlâi viehâ aktiivlávt ive 2019 räi, mon maŋa koronaviruspandemia tiet juávkku lávdástij eskin ive 2022. Roovvâdmáánust 2021 almostui juávhu tuáistáážân majemuš album The Quest. Rumbal Alan White jaamij vyesimáánust 2022 uánihis taavdân.

Diskografia

Studioalbumeh

• Yes (1969)
• Time and Word (1970)
• The Yes Album (1971)
• Fragile (1971)
• Close to the Edge (1972)
• Tales from Topographic Oceans (1973)
• Relayer (1974)
• Going for the One (1977)
• Tormato (1978)
• Drama (1980)
• 90125 (1983)
• Big Generator (1987)
• Union (1991) [Anderson Bruford Wakeman Howein]
• Talk (1994)
• Open Your Eyes (1997)
• The Ladder (1999)
• Magnification (2001)
• Fly from Here (2011)
• Heaven & Earth (2014)
• The Quest (2021)
• Mirror to the Sky (2023)

Livealbumeh

• Yessongs (1973)
• Yesshows (1980)
• 9012Live: The Solos (1985)
• Keys to Ascension (1996) [live/studio]
• Keys to Ascension 2 (1997) [live/studio]
• Yes: Live - 1975 at Q.P.R. (2001)
• The Word Is Live (2005)
• In the Present: Live from Lyon (2011)

Jesâneh

Táálááh jesâneh

• Jon Davison – laavlâ (2012–)
• Steve Howe – kiitaar (1970–1980, 1996–)
• Geoffrey Downes – kuoskâttâsčuojânâsah (1980, 2011–)
• Billy Sherwood – basso (2015–), laavlâ (1997–2000, 2015–), kiitaar (1997–2000), kuoskâttâsčuojânâsah (1997–1998)

Ovdiih jesâneh

• Jon Anderson – laavlâ (1968–1979, 1983–2004)
• Trevor Horn – laavlâ (1980)
• Benoît David – laavlâ (2008–2012)
• Peter Banks – kiitaar (1968–1970) (jáámmám 2013)
• Trevor Rabin – kiitaar, laavlâ (1983–1995)
• Chris Squire – basso (1968–2015) (jáámmám 2015)
• Bill Bruford – ruumbuh (1968–1972)
• Alan White – ruumbuh (1972–2022) (jáámmám 2022)
• Tony Kaye – kuoskâttâsčuojânâsah (1968–1971, 1983–1995)
• Rick Wakeman – kuoskâttâsčuojânâsah (1971–1974, 1976–1979, 1996, 2002–2004)
• Patrick Moraz – kuoskâttâsčuojânâsah (1974–1976)
• Igor Khoroshev – kuoskâttâsčuojânâsah (1998–2000)
• Oliver Wakeman – kuoskâttâsčuojânâsah (2008–2011)