King Crimson

Wikipedia:st
Njuškii navigistmân Njuškii ucâmân
King Crimson
King Crimson Dour Festivalist ive 2003
King Crimson Dour Festivalist ive 2003
Tiäđuh
Aktiivlâžžân 1968–1974, 1981–1984, 1994–2009, 2013–2021
Stijlâšlaajâ progressiivlâš rock
keččâlâddâmvuálásâš rock
progressiivlâš meetaal
fuusiojazz
Päikkisaje Lontoo, Ovtâstum kunâgâskodde
Lávlumkielâ eŋgâlâskielâ
Jesâneh

Robert Fripp, kiitaar, mellotron (1968–)
Mel Collins, saksofon, huilo (1970–1972, 2013–)
Tony Levin, basso, "Chapman stick" (1981–1999, 2003–)
Pat Mastelotto, ruumbuh (1994–)
Gavin Harrison, ruumbuh (2007–)
Jakko Jakszyk, kiitaar, laavlâ, huilo (2013–)
Bill Rieflin, ruumbuh, kuoskâttâsčuojânâsah, tuáváášlaavlâ (2013–)

Ovdiih jesâneh

listo

In the Court of the Crimson King -album tobdos lokkekove taavlust Sint Antoniesbreestraatist Amsterdamist

King Crimson lii Lontoost puáttee eŋlandlâš muusikjuávkku, mii lii ohtâ progressiivlâš rock vuosmuin já tehálumosijn juávhuin. Tom vuáđudáin kitarist Robert Fripp já rumbal Michael Giles ive 1968. Juávhu jesâneh láá mulsâšum ennuv, já juávkku lii pieđgânâm maŋgii. Fripp lii-uv lamaš juávhu áinoo pisovâš jeessân, veik sun ij anegin jieččân juávhu jođetteijen. King Crimson lávdástâl já ráhtá uđđâ materiaal vala-uv.

Juávkku kulostui vuosâalbumistis In the Court of the Crimson King (1969), mon aneh kuásnii vuossâmužžân progressiivlâš rock albumin. Album tobdosumos pittá lii "21st Century Schizoid Man", mast maaŋgah juávhuh láá ráhtám cover-versio.

Historjá[mute | mute käldee]

Vuáđudem já In the Court of the Crimson King[mute | mute käldee]

King Crimson aalgij Robert Fripp sehe Michael já Peter Giles ive 1967 vuáđudem muusikjuávhust Giles, Giles and Fripp. Juávkku almostitij muáddi single sehe oovtâ album The Cheerful Insanity of Giles, Giles and Fripp, mut ij finnim ennuvgin huámmášume. Juávkku irâttij mutteđ muusikstijlâs já vaaldij fáárun kuoskâttâsčuojâtteijee já muorâposonjâsčuojâtteijee Ian McDonald sehe suu ustev sännejeijee Peter Sinfield. Fripp ij lamaš innig kiddiistum Peter Giles popstijlâsâš muusikist já iävtuttij. ete suu puáris ustev Greg Lake puáđáččij suu teikâ Giles sajan. Michael Giles mieldi suu viljâ lâi pettâšum juávhu hyenes miänástusân já lâi vuálgám ovdil ko Fripp lâi iävtuttâm tom, ete Lake puáđáččij suu teikâ Giles sajan.

King Crimson vuáđudui 30. skammâmáánu 1968, já toos kullii Fripp, McDonald, Michael Giles, Sinfield sehe Greg Lake bassost já lavlust. Juávhu vuosmuuh hárjuttâsah lijjii uđđâivemáánust 1969. Juávhu aalgâaaigij McDonald raahtij stuárráámuu uási muusikist, mut meid Fripp já Lake uásálistijn ton paargon. Sinfield čaalij sanniittâsâid sehe suunâttâlâi láávdástmij čuovviittâs. The Moody Blues -juávkku inspiristij McDonald iävtuttiđ mellotron-nommâsâš kuoskâttâsčuojânâs uástim juávhu kiävtun. Mellotronist šoodâi-uv merhâšittee uási King Crimson 1960-lovo loopâ já 1970-lovo aalgâ muusik.

King Crimson finnij vuossâmuu keerdi merhâšittee huámmášume, ko tot čuojâttij ovdil The Rolling Stones rijjâkonsert Lontoo Hyde Parkist syeinimáánu 5. peeivi 1969 suulân 500 000 kuldâleijee oovdâst. Juávhu vuosâalbum In the Court of the Crimson King almostui siämmáá ive roovvâdmáánust. Album finnij stuorrâ mielâstumvuođâ já pajanij Britannia listo viiđâd sajan. Tot iäránij ennuv ton ääigi blues-stijlâsâš hard rockist já finnij inspiraatio eenâb klassisâš muusikist, jazzist, psykedeelisâš rockist, folkist sehe rijjâ improvisaatiost. Tom aneh-uv távjá vuossâmužžân progressiivlâš rock albumin. Album vuossâmuš pittá "21st Century Schizoid Man" lii kočodum agressiivlâšvuođâs tiet "protometaalmuusikin". Pitá sanniittâsah kritisisteh Vietnam suáđi.

King Crimson lávdástij Eŋlandist sehe Ovtâstum staatâin loppâivveest 1969 maaŋgâi pop- já rockartistijgijn. Konserteh finnejii kuldâleijei já kritikkárij mielâstumvuođâ, mut juávhu siste lijjii kuittâg-uv sierâmielâlâšvuođah. Veik McDonald lâi juávhu válduášálâš šuoŋârähtee, te Fripp kuittâg-uv oroi lemin juávhu merhâšitteemus jođetteijee. Fripp halijdij ovdediđ juávhu muusik sevŋâdub já intensiivlub sundán, moos McDonald já Giles iävá lijkkum. Fripp halijdij, ete juávkku juáđháččij, já iävtuttij, ete vuálgáččij jieš, amas juávkku pieđgâniđ. McDonald kuittâg-uv eeđâi, ete juávkku lâi eenâb Fripp ko suu teikâ Giles. Algâalgâlâš juávkku čuojâttij majemuu keerdi juovlâmáánu 16. peeivi San Fransiscost. Ovtâstum staatâi turnee maŋa McDonald já Giles vuolgijn juávhust.

1970-lovo algâ[mute | mute käldee]

Ive 1970 aalgâst King Crimson rähtiškuođij uđđâ album In the Wake of Poseidon. Oovdeb ive loopâst juávhust vuálgám Michael Giles pálkkááttij sessiomusikkárin čuojâttiđ ruumbuid. Seissiomusikkárin albumist toimii meid saksofonist já kuoskâttâsčuojâtteijee Mel Collins, pianist Keith Tippett sehe Giles, Giles & Frippist čuojâttâm Michael Giles viljâ Peter, kote čuojâttij basso Greg Lake saajeest. Ton ääigi tubdâmettum Elton John lâi áigumin lávluđ albumist, mut Fripp molsoi mielâs ovdil jienâttem. Greg Lake, kote ááigui vyelgiđ juávhust já vuáđudiđ Keith Emersonáin Emerson, Lake & Palmer mieđâi lávluđ albumist. Lake ij kuittâggin kiergânâm lávluđ pittáást "Cadence and Cascade", mon láávlui loppâloopâst Fripp ustev Gordon Haskell. Album pajanij listoin Britanniast sajan 4 já Ovtâstum staatâin sajan 31. Motomeh kritisistii album tast, ete tot lii viehâ siämmáálágán ko juávhu vuosâalbum. Juávhust ij lamaš tuárvi jesânijd lávdástâllâm várás, já tondiet Fripp kočoi Collins já Haskell servâđ juávkun. Haskell pargon šoodâi meid basso čuojâttem. Uđđâ rumbalin šoodâi Andy McCulloch.

Fripp já Sinfield čaalijn čuávuváá album Lizard (1970) jiejah, ige Haskellist, Collinsist teikâ McCullochist lamaš ollágin säniväldi material rähtimist. Tippett maacâi sessiomusikkár roolâst já sunjin iävtuttii meid virgálâš jeessân roolâ, mut sun ij váldám iävtuttâs vuástá. Tippett lasseen sessiomusikkárin albumist čuojâttii kyehti Tippett juávhu jeessân Mark Charig (kornet) já Nick Evans (pasuuna) sehe oboe já eŋlandtoorvi čuojâtteijee Robin Miller. Album nommâpitá algâuásist "Prince Rupert Awakes" lávlu nube progressiivlâš rockjuávhu Yes lávloo Jon Anderson. Albumist láá vala-uv eenâb jazz-vaikuttâsah ko kyevti vuosmuu albumist, já ton nommâpittá lii 23 já pele minuttid kukke já tiävdá ubâ LP-skiäru B-pele. Album almostui juovlâmáánust já pajanij Britannia listo sajan 29. Sehe Haskell ete McCulloch iävá lijkkum album stiijlân já Collinskin ij lijkkum toos, maht suu oosij šuoŋah lijjii rahtum. Haskell já McCulloch vuolgijn-uv juávhust album almostittem maŋa já King Crimsonist iä oppeetkin lamaš basist, lávloo já rumbal.

Collins kaavnâi uđđâ rumbalin Ian Wallace, mon maŋa Frippist-uv, kote lâi jo luovâttâm juávhu háárán, šoodâi aktiivlub uđđâ jesânij ucâmist. Juávhust lijjii maaŋgah lávlooiävtukkâsah, ovdâmerkkân Roxy Music jođetteijen maŋeláá tooimâm Bryan Ferry, mut lávloo saje finnij Raymond "Boz" Burrell. Sij irâttii uuccâđ meid uđđâ basist, mut loppâloopâst Fripp máttááttij Burrellân basso čuojâttem. King Crimson lávdástij ive 1971 vuosmuu keerdi algâalgâlâš čuojâtteijeejuávhu pieđgânem maŋa.

Siämmáá ive almostui čuávuvâš album Islands. Lizard naalijn uáli jazz-stijlâsâš album pajanij Britannia listoost sajan 30 já Ovtâstum staatâi listoost sajan 76. Juovlâmáánust 1971 Fripp almottij Sinfieldân, ete ij puávtáččii innig leđe ovtâspargoost suin. Čuávuváá ive peln ubâ juávkku pieđgânij uásild tondiet, ete Fripp ij miettâm čuojâttiđ Collins pittáid. Ovtâstum staatâi turneesopâmušâi tiet King Crimson ferttij kuittâg-uv juátkiđ. Uđđâivemáánu já kuovâmáánu Ovtâstum staatâi konsertijn almostui live-album Earthbound. Jesânij koskâvuođah puáránii turnee ääigi, já eres juávhu jesâneh liččii halijdâm juátkiđ, mut Fripp kuittâg-uv pieđgij juávhu, ko suu mielâst čuojâtteijei stijlâ ij sooppâm uđđâ muusiklâš sundán, mii sust lâi mielâst.

1970-lovo pelimuddo: čuojâtteijeejuávkku já stijlâ muttojeh[mute | mute käldee]

King Crimson láávdástmin ive 1973. Čižetpeln uáligispel: David Cross, John Wetton, Bill Bruford já Robert Fripp

Uđđâ čuojâtteijeejuávkku lâi uáli ereslágán ko Sinfield ääigi. Juávkun servii improvisistee perkussionist Jamie Muir, basist-lávloo John Wetton, rumbal Bill Bruford sehe vivlu-, kuoskâttâs- já huiločuojâtteijee David Cross. Bruford lâi vuálgám Yesist, mii lâi miänástum kávpálávt ennuv eenâb ko King Crimson. Stuárráámuu uási muusikist rahtijn Fripp já Wetton ovtâspargoost. Ko Sinfield lâi vuálgám, te juávkku finnij uđđâ sanniitteijen Wetton ustev, Supertrampist čuojâttâm Richard Palmer-James. Sun ij kuittâggin vaiguttâm juávhu taaiđâlâš teikâ visuaallâš stiijlân nuuvt ko Peter Sinfield, mut čaalij tuše saanijd, maid sun vuolgâttij juávkun poostâ peht päihistis Saksaast. King Crimson joođhij oppeet lávdástâllâm roovvâdmáánust 1972.

Uđđâive- já kuovâmáánust 1973 juávkku jienâttij uđđâ album Larks' Tongues in Aspic, mii almostui siämmáá ive njuhčâmáánust. Pyeri ovdâmerkkân juávhu uđđâ stiijlâst lâi kyevtuáság nommâpittá. Juávkku ij lamaš kuássin ráhtám taggaar pitá. Pittá finnij vaikuttâsâid modern klassisâš muusikist sehe rijjâ improvisaatiost, já Fripp aggressiivlâš kiitaarčuojâttem tiet pittá sulâstit masa meetaalmuusik. Juávkku finnij huámmášume meid Muir aggressiivlâš láávdástmist, mast sun lihâdij maanisávt čuojâtdijnis. Ton lasseen suu tuáškumčuojânâsah lijjii táválávt uáli omâseh. Album pajanij Britannia listo sajan 20 já Ovtâstum staatâi listo sajan 61. Juávkku joođhij lávdástâllâm, mut jo siämmáá ive Muir vuolgij juávhust. Algâalgâlávt mainâstui, ete Muir lâi čuoccum lyeve alne, mii ij orroom omâsin suu vildáás čuojâttem tiet. Maŋeláá kuittâg-uv selvânij, ete sun ij lamaš lijkkum musikkár elimân já lâi varrim buddhaluostarân Skotlandân.

Ko Muir lâi vuálgám, te loopah jesâneh čokkânii uđđâivemáánust 1974 rähtiđ čuávuváá album Starless and Bible Black, mii almostui njuhčâmáánust. Stuárráámus uási album pittáin láá live-lávdástmijn jienâttum improvisaatioh, main kuldâleijei jienah láá čuoppum meddâl. Album áinooh ollásávt studiost jienâttum pitáh láá "The Great Deceiver", "Lament" sehe "The Night Watch" loppâuási. Album pajanij sajan 28 Britanniast já sajan 64 Ovtâstum staatâin. Album almostittem maŋa juávhust lijjii oppeet sierâmielâlâšvuođah. Juávhu muusik já eromâšávt Wetton já Bruford čuojâttem lijjii nuuvt jienniih, ete Cross ij innig puávtám iäruttiđ akustisâš vivlus jienâ eres čuojânâsâi kooskâst, já tondiet sun koolgâi vuáijuđ eenâb kuoskâttâsčuojânâsâi čuojâtmân. Ain eenâb já eenâb tušástum Cross kiäsádâtškuođij juávhust sehe muusiklávt ete persovnlávt, mii tovâttij tom, ete eres juávhu jesâneh jienâstii Cross iäruttem peeleest ive 1974 turnee maŋa.

Juávkku jienâtškuođij uđđâ album Red syeinimáánust 1974. Ovdil jienâtmij älgim muusikráhtulâšvuotân pettâšum Fripp vuájuškuođij mystikkár George Gurdjieff tuojijd já finnij jiegâlâš feerim, mon tiet sust oroi, ete sun ij innig puávtám uásálistiđ juávhu miärádâssáid. Brufordist já Wettonist lâi-uv eenâb väldi album rähtimist, ko ovdil lâi lamaš. Albumist lii ohtâ live-pittá. Kesimáánust 1974 jienâttum "Providence", mast Cross čuojât viivlu. Albumist čuojâtteh meid maaŋgah sessiomusikkáreh, ovdâmerkkân juávhu ovdebááh jesâneh Mel CollinsIan McDonald, kiän maccâmist juávkun lijjii spekulistmeh. Fripp almottij Ovtâstum staatâi turnee ääigi, ete halijdičij lopâttiđ juávhu tooimâm, mut juávkku pieđgânij virgálávt eskin čohčâmáánu loopâst. Maŋeláá Fripp mainâstij, ete King Crimson lâi "joskâm lemist" já "ollásávt nuuhâm ain já avalávt". Red almostui roovvâdmáánu 6. peeivi 1974 já pajanij listoin sajan 45 Britanniast já 66 Ovtâstum staatâin. Juávhu pieđgânem maŋa almostui live-album USA vyesimáánust 1975. Album pitáh lijjii jienâttum ive 1974 Ovtâstum staatâi turneest. Paadij čuolmâi tiet Cross vivlučuojâttem ij kullum albumist pyereest, mon tiet Eddie Jobson pálkkááttii čuojâttiđ viivlu paadij oolâ.

1980-loho[mute | mute käldee]

Adrian Belew ive 2006

Porgemáánust 1980 Fripp sundáttâlškuođij uđđâ juávhu vuáđudem. Juurdân lâi tot, et uđđâ juávhu nommâ ij liččii King Crimson. Oovdeb King Crimson rumbal Bill Bruford lâi vaalmâš servâđ fáárun. Ton lasseen Fripp koijâdij fáárun lávloo já kitarist Adrian Belew, kote lâi čuojâttâm tolebáá ovdâmerkkân Frank ZappaDavid Bowie tuáváášjuávhuin. Sun mieđâi servâđ juávkun Talking Heads turnee maŋa, mast sun lâi čuojâtmin kiitaar. Basist saje finnij Tony Levin. Fripp nomâttij juávhu Discipline, já sij algâttii turnee cuáŋuimáánust 1981. Roovvâdmáánust juávkku meridij mutteđ noomâs King Crimsonân.

Ive 1981 juávkku almostitij uđđâ album Discipline, mii pajanij sajan 41 Britanniast já 45 Ovtâstum staatâin. Album lâi uáli ereslágán ko juávhu ovdebeh albumeh já tot finnij vaikuttâsâid post-punkist, new wavest, maailmmuusikist já afriklâš ritmâmuusikist. Albumist lii eromâš meid tot, ete Fripp lasseen meid Belew čuojât kiitaar. Fripp irâttij rähtiđ stiijlâ, mon sun kočodij noomáin "rock gamelan", tastko suu mielâst sunnuu Belewáin ritmâsâš kiitaarčuojâttem sulâstitij indonesialâš gamelanjuávhui muusik. Fripp vuájudâđâi táválávt čuojâttiđ jotelis arpeggioid, ko Belew vuod pyevtittij jieškote-uvlágánijd kiitaarjienâid, moh kuásnii ađđiistâllii ellei jienâid. Bassokiitaar lasseen Tony Levin keevtij Chapman Stick -nommâsâš lovesraŋgâsâš čuojânâs, mon čuojâtteh "tapping"-stijláin.

Kesimáánust 1982 almostum Beat lâi King Crimson vuosmuš album, mast čuojâtteijeejuávkku lii siämmáš ko oovdeb albumist. Album jienâttem ääigi eromâšávt Belew já Fripp kooskâst lijjii ennuv sierâmielâlâšvuođah. Album majemuu pitá "Requiem" jienâttem ääigi Belew kočoi Fripp vyelgiđ meddâl studiost. Belewân pahadum Fripp ij uásálistám album sesâlistmân já kritisistij tom maŋeláá tast, ete juávkku lâi kaidâm algâalgâlâš visiostis. Belew eeđâi maŋeláá, ete Beat rähtim lâi suu karrieeris hyenemus feerim já mieđettij, ete album fáárust ij liččii kolgâm almostittiđ viehâ pop-stijlâsâš "Heartbeat"-pitá, mii almostui singlen-uv já mast suoi Frippáin iävá lamaš siämmáá uáivilist. Album pajanij Britannia listoost sajan 39 já Ovtâstum staatâi listoost sajan 52.

Uđđâ čuojâtteijeejuávhu kuálmád album Three of a Prefect Pair almostui njuhčâmáánust 1984. Juávhust lijjii album rähtim ääigi vädisvuođah meridiđ ton muusiklâš stiijlâ já tondiet album juohhii stijlâlávt kyevti uásán. Vuossâmuu uásist ađai LP-skiäru A-peeleest láá juávhu pop-stijlâsuboh pitáh sehe ohtâ instrumentaallâš pittá. Nube uásist ađai LP-skiäru B-peeleest láá enâmustáá keččâlâddâmvuálásiih industrial-stijlâsiih improvisaatioh. Album looppât "Larks' Tongues in Aspic" rááiđu kuálmád uási. Album pajanij Britanniast sajan 30 sehe Ovtâstum staatâin sajan 58 já lâi návt juávhu kávpálávt enâmustáá miänástum album 1980-lovvoost. Three of a Perfect Piar -turnee majemuu konsertist Montrealist Kanadast almostui ive 1998 live-album Absent Lovers: Live in Montreal.

Turnee maŋa Fripp pieđgiittij juávhu táásá love ihheed vuosmuu pieđgiittem maŋa. Sehe Bruford ete Belew láin tutâmettumeh Fripp miärádâsân. Belew mainâstij, ete sun lâi kuullâm juávhu pieđgânmist vuosmuu keerdi Musician Magazine -loostâst, ijge Frippist.

1994–2003: majemuuh studioalbumeh[mute | mute käldee]

King Crimson joođhij tooimâs ive 1994 "tubletrion" kočodum čuojâtteijeejuávhoin. Nommâ puátá tast, ete čuojâtteijeejuávhust lijjii kyehti kitarist, kyehti rumbal já kyehti basist. 1980-lovo čuojâtteijeejuávkku Fripp-Belew-Bruford-Levin maacâi já sii lasseen fáárun servijn rumbal Pat Mastelotto sehe basist Trey Gunn, kote čuojâttij meid Chapman Stick sulâstittee Warr-kiitaar. Juávkku almostitij EP-skiäru Vrooom roovvâdmáánust 1994. Uđđâ čuojâtteijeejuávhu muusik lâi siävuttâs ovdebij King Crimson -äigipoojij muusik, ko tast siälui 1980-lovo polyritmâsâš kiitaarčuojâttem, mut fáárun lâi puáttám meid 1970-lovo pelimudo lusis meetaalmuusiklágán stijlâ. Ton lasseen juávhu uđđâ muusikist lijjii ennuv ton ääigi mielâstumvuođâst lamaš industrial rock vaikuttâsah. Cuáŋuimáánust 1995 almostui čuávuvâš studioalbum THRAK, mast láá uđđâ versioh Vrooom pittáin sehe aaibâs uđđâ pitáh.

King Crimson lávdástâlâi iivij 1995 já 1996 já vyesimáánust 1996 almostui improvisaatioid siskeldeijee livealbum Thrakattak. Fripp ij lamaš tuđâvâš juávhu muusikân já juávkku lâi masa pieđgânmin eromâšávt sunnuu Brufordáin sierâmielâlâšvuođâi sehe uđđâ materiaal vänivuođâ tiet. Juávhu kuttâ jeessân meridii porgâđ ucebijn juávhuin, maid kočodii noomáin ProjeKct. Taat adelij juávkun máhđulâšvuođâ juátkiđ jurdui ovdedem toin naalijn ete juávhu kuttâ jeessân iä tarbâšâm leđe siämmáá saajeest siämmáá ääigi, mii lâi lamaš keevâtlâš čuolmâ. ProjeKct-juávhuh lávdástâllii iivij 1997 já 1999 kooskâst já almostittii meid albumijd. ProjeKct One lávdástâlâi neljii, majemužžân juovlâmáánu 4. peeivi 1997, mon maŋa Bruford vuolgij juávhust já joođhij čuojâttem Earthworks-jazzjuávhustis.

Roovvâdmáánust 1999 King Crimson čokkânškuođij. Tony Levinist ij lamaš asto juátkiđ juávhust sessiomusikkár pargoi tiet já tondiet sun vuolgij tast koskâpudâlávt. Juávkun pááccám musikkáreh Fripp, Belew, Gunn já Mastelotto rähtiškuottii šuoŋâ já jienâttiđ uđđâ album The ConstruKction of Light, mii almostui vyesimáánust 2000 já pajanij Britannia listo sajan 129. Album stijlâ lâi meetaal- já industrialstijlâsâš, já tast kiävttojii ennuv elektronisâš ruumbuh. Album loopâst lii "Larks' Tongues in Aspic" niäljád uási. Album finnij viehâ negatiivlâš vuástáväldim já tom kritisistii uđđâ jurdui vänivuođâst. Juávkku jienâttij siämmáá ääigi improvisistum instrumentaalpittáid já almostitij taid noomáin "ProjeKct X" CD:st Heaven and Earth. Juávkku tuárjui kuábbáá-uv almbum turnein.

Skammâmáánust 2001 já roovvâdmáánust 2002 juávkku almostitij kyehti EP Level FiveHappy with What You Have to Be Happy with. Vuosmuš siskeeld kulmâ uđđâ pitá, live-versio pittáást "The ConstruKction of Light" sehe oovtâ ProjeKct pitá. Nubbe EP:st láá uđđâ pitáh sehe live-versio niäljád "Larks' Tongues in Aspicist". King Crimson almostitij ton kulmânubálovváád já tuáistáážân majemuu studioalbum The Power to Believe njuhčâmáánust 2003. Album pitáh lijjii iänááš kyevti oovdeb EP:st. Tot ij pajanâm Britanniast teikâ Ovtâstum staatâin 100 juávkun, mut Suomâst tot pajanij sajan 25. Juávkku lávdástâlâi loppâive já skammâmáánust Levin poođij maasâd Gunn sajan. Algâivveest juávkku čokkânij rähtiđ uđđâ materiaal. Materiaal ij kuittâggin šoddâm, já juávkku pieđgânij oppeet vala siämmáá ive.

2008–[mute | mute käldee]

Juávkku maacâi ive 2008 já ornij turnee 40 toimâive kunnen. Juávhust čuojâttii ovdebeh jesâneh Fripp, Belew, Levin já Mastelotto sehe nubbe rumbal Gavin Harrison. Belew iävtuttij, ete King Crimson 1980-lovo čuojâtteijeejuávkku juáđháččij turnee maŋa, mut sehe Fripp ete Bill Bruford, kii lâi lamaš juávhu tooimâ ulguubeln jo love ihheed, láin ton vuástá.

Čohčâmáánust 2013 Fripp almottij, ete juávkku juáđháččij tooimâs. Fáárust lijjii oovdeb čuojâtteijeejuávhust Levin, Mastelotto já Harrison sehe Jakko Jakszyk já Mel Collins, kiäh láin čuojâttâm Fripp oovdeb projektist. Juávkun servij meid kuálmád rumbal Bill Rieflin. Adrian Belew ij lamaš kočodum fáárun já návt suu masa 30 ihheed pištám karrieer King Crimsonist nuuvâi. Suu saje lávlon já nubben kitaristin valdui Jakszyk.

Uđđâ čuojâtteijeejuávkku ij nuotâstâm uđđâ materiaal, mut lávdástâlâi já čuojâttij puáris pittáid. Juávkku lávdástâlâi iivij 2014 já 2019 kooskâst jyehi ive. Ive 2016 Rieflin ij puávtám čuojâttiđ turneest já suu sajan poođij Jeremy Stacey. Rieflin maacâi čuávuváá ive já juávkku joođhij neljin rumbaláin. Rieflin sirdui kuittâg-uv čuojâttiđ maŋeláá kuoskâttâsčuojânâsâid.

Vuáđudeijeejeessân Greg Lake jaamij juovlâmáánust 2016 já čuávuváá mánuppaje jaamij meid John Wetton, kii lâi toimâm juávhu lávlon já basistin 1970-lovo pelimuddoost. Kesimáánust 2017 juávkku almostitij "Heroes"-nommâsâš EP oovdeb ive jáámmám David Bowie kunnen. Fripp čuojâttij kiitaar Bowie "Heroes"-pittáást sehe albumist 1970-lovo loopâst. Loppâivveest 2017 Fripp almottij, ete lâi čuávdám sierâmielâlâšvuođâidis Belewáin. Sun eeđâi, ete sunnust ij lamaš vuáváámijd, ete Belew puáđáččij tonáigásii čuojâtteijeejuávhu fáárun, mut eeđâi, ete "uuvsah puátteevuotân láá ávusin".

Ive 2019 Rieflin kuođij oppeet juávhu persovnlij suujâi tiet, já suu saje turneest vaaldij Theo Travis. Rieflin jaamij purâttâhtaavdân njuhčâmáánust 2020.

Juávkku lávdástâlâi ive 2021 Tave-Amerikist sehe Japanist. Levin čaalij blogistis, ete majemuš Jaapaan konsert lâi "turnee majemuš konsert já tuođânálásávt juávhu majemuš konsert". Taam já váhá maŋeláá Fripp kommentijd sosiaallâš mediain tulkkojii nuuvt ete King Crimson, teikâ aainâs-uv taat čuojâtteijeejuávkku, lâi lopâttâm.

Kuovâmáánu 9. peeivi 2022 juávhu vuáđudeijeejeessân Ian McDonald jaamij purâttâhtaavdâ tiet.

Diskografia[mute | mute käldee]

Studioalbumeh[mute | mute käldee]

Jesâneh[mute | mute käldee]

Táálááh jesâneh[mute | mute käldee]

  • Robert Fripp – kiitaar, mellotron, piano (1968–)
  • Mel Collins – saksofon, huilo (1970–72, 2013–)
  • Tony Levin – basso, Chapman Stick, tuáváášlaavlâ (1981–1999, 2003–)
  • Pat Mastelotto – ruumbuh (1994–)
  • Gavin Harrison – ruumbuh (2007–)
  • Jakko Jakszyk – kiitaar, laavlâ, huilo (2013–)

Ovdiih jesâneh[mute | mute käldee]

  • Greg Lake – basso, laavlâ (1968–1970) (jáámmám 2016)
  • Gordon Haskell – basso, laavlâ (1970) (jáámmám 2020)
  • Boz Burrell – basso, laavlâ (1970–1972) (jáámmám 2006)
  • John Wetton – basso, laavlâ (1972–1974) (jáámmám 2016)
  • Adrian Belew – kiitaar, laavlâ (1981–1984, 1994–1998, 2000–2003, 2008)
  • Trey Gunn – Warr-kiitaar, Chapman stick (1994–2003)
  • Michael Giles – ruumbuh (1968–1969)
  • Andy McCulloch – ruumbuh (1970)
  • Ian Wallace - ruumbuh (1971–1972) (jáámmám 2007)
  • Bill Bruford – ruumbuh (1972–1974, 1981–1984, 1994–1997)
  • Jamie Muir – tuáškumčuojânâsah (1972–1973)
  • Bill Rieflin – ruumbuh, kuoskâttâsčuojânâsah, tuáváášlaavlâ (2013–2020) (jáámmám 2020)
  • Ian McDonald – muorâposonjâsah, mellotron, kuoskâttâsčuojânâsah, tuáváášlaavlâ (1968–1969) (jáámmám 2022)
  • David Cross – vivlu, alttovivlu, huilo, mellotron, kuoskâttâsčuojânâsah, tuáváášlaavlâ (1972–1974)
  • Peter Sinfield – sanniittâsah, syntetisaattor (1968–1971)
  • Richard Palmer-James – sanniittâsah (1972–1974)

Fáádást eres soojijn[mute | mute käldee]

Käldeeh[mute | mute käldee]

Jurgâlus
Taat artikkâl teikkâ uási tast lii jurgâlum teikkâ toos láá uccum tiäđuh ereskielâlâš Wikipedia artikkâlist.
Algâalgâlâš artikkâl: en:King Crimson