Nooveel
Nooveel (italiakielân novella "uuđâs"[1]) lii čaabâkirjálâš proosamaainâs, mii muštâl mottoom tábáhtume uánihávt.[1] Novellist iä laavii leđe ennuv persovneh, já tábáhtume lii räijejum. Klassisii miäruštâllâm mield nooveel puáhtá luhâliđ ovttáin čokkáámáin. Ij lah kuittâggin ain čielgâs, kuás tyeje kolgâččij kočodiđ novellin já kuás uánihis romanin.
Nooveelčälleeh
[mute | mute käldee]Tobdos syemmiliih nooveelčälleeh láá el. F. E. Sillanpää, Veikko Huovinen, Martti Joenpolvi, Rosa Liksom já Joni Skiftesvik. Maailmist ohtâ peeggâlmumos nooveelčuágálduvâin lii Giovanni Boccaccio Decamerone. Teháliih nooveelčälleeh lijjii el. ranskalâš Guy de Maupassant já ryeššilâš Anton Tšehov.
Anarâškielâliih novelleh
[mute | mute käldee]Anarâškiel novelleh láá čallum mottoom verd. Novelleh láá šoddâm tondiet ko čaabâkirjáliih teevstah iä lah ennuv, já taid lii jotelub čäälliđ ko romanijd. Anarâškielân láá almostum kyehti nooveelčuágálduv: Kyelisieidi maccâm já eres novelleh (Anarâškielâ servi, 2005) já Kielâ, mii ij kuássin jáámmám (Anarâškielâ servi, 2023). Anarâš novelleh láá almostum Anarâš-loostâst, Tejâblogist já Čyeti čälled -blogist. Anarâškielâ Tuhháát sijđod nuorâikirjálâšvuotâ -proojeekt ääigi meiddei nuorah láá jurgâlâm novellijd anarâškielân. Iänááš novelleh láá jurgâlum suomâkielâst, motomeh meid eŋgâlâskielâst.
Fáádást eres soojijn
[mute | mute käldee]
Wikimedia Commonsist láá koveh teikkâ eres tiätuvuárháh fáádást Nooveel.
Käldeeh
[mute | mute käldee]- ↑ a â Mikkola, Anne-Maria jna: Äidinkieli ja kirjallisuus: Käsikirja, s. 252. WSOY, 2008. ISBN 978-951-0-26300-6.