Iäluspellâ
Iäluspellâ (orjâlâškielân Eallospeallu já nuorttâlâškielân Jeällspeâll) lii lyevdispellâ, mon lii ráhtám Sämitige "Sämikielâlij vuálá škovlâahasij párnáámateriaal" -haahâ. Iäluspellâ lii kuulmâkielâg spellâ: puoh teevstah láá čallum anarâškielân, pajekielân já nuorttâlâškielân. Spellâ lii uáivildum eromâšávt arâšoddâdem já škoovlâi várás – paijeel kuulmâ ihásijd.[1]
Speelâ ij pyevti uástiđ kaavpijn, mutâ Sämitigge juáhá tom škoovlâi já peivikiäjui kiävtun.[1]
Speelâ ulme
[mute | mute käldee]Speelâ ulmen lii uápásmiđ puásuituálu ihejurâmân já toos lohtâšuvvee sánádâhân. Meiddei oovtâkiärdánis matemaatliih tááiđuh láá kuávdášliih taan speelâst, ko párnááh rekinisteh sii poccui mere stuárrum teikâ kiäppánem tábáhtuskoortâi mield.[1]
Speelâ vuávám
[mute | mute käldee]Speelâ vuáváámân lává uásálistám Petra Kuuva lasseen Elle Valkeapää já Onneli Sieppi, kiäi juurdâ spellâ lii lamaš. Pargojuávhust lâi meiddei fáárust Tytti Bräysy, kii lii tuáijám speelâ graafisávt. Meiddei Aanaar škoovlâ, Avveel vyelitääsi já Čevetjäävri škoovlâ uáppeeh láá lamaš fáárust kuvviimin speelâ. Puoh koveh láá párnái sárgum koveh.[1]
Speelâ tahheeh muštâleh, ete speelâ vuáváámist hástun lâi pasteđ väldiđ vuotân sierâ kuávluid já palgâsij ereslágán toimâmvuovijd já nomâttâsâid sierâ aašijn. Tondiet speelân láá kuođđum meiddei kuárus koortah, vâi juáháš puáhtá, jis haalijd, sovâttiđ taid já čäälliđ teevstâid jieijâs kuávlu toimâm- já ettâmvuovvijd mudágâžžân.[1]
Tahheeh muštâleh vala, ete säämi pedagogiik mield speelâst ij lah tergâd tot, ete kii vuáittá, ete kiäst láá enâmus poccuuh speelâ loopâst, pic tehálumos lii, ete pargoh šaddeh oovtâst porguđ. Poccui meeri speelâ loopâst muštâl tuše tom, ete maht puásui-ihe já puásuipargo lii ubânâsân moonnâm.[1]