Elsa Laula Renberg

Elsa Laula Renberg

Elsa Laula Renberg (29. skammâmáánu 1877 Tärnaby, Ruotâ – 22. syeinimáánu 1931 Mosjøen, Taažâ) lâi maadâsämmilâš puásuiolmooš, aktivist já politikkár.

Elsa Laula šoodâi skammâmáánu 29. peeivi 1877 perruus niäljádin pärnin. Suu vaanhimeh láin puásuiulmuuh Kristina Laula já Lars Thomasson Laula. Nuorrân Laula luuvâi selgiennin Tukholmast. Laula lâi tehálâš vaikutteijee sämmilii servitooimâ aalgâst. Sun tooimâi ive 1904 vuáđudum vuossâmuu sämiseervi Lapparnas Centralförbund saavâjođetteijen. Siämmáá ive almostui suu pamflet Inför lif eller död? Sanningsord i de Lappska förhållandena, mii kietâdâlâi sämmilij vuoigâdvuođâid, škovlim já eennâmkevttim. Ive 1908 Laula naajâi Tomas Petersen Tovein já varrij suin Taažân. Sunnui šoddii kuttâ párnáá. Puásuipargo lasseen Laula mađhâšij sárnumin sämiaašijn. Sun lâi meid vuáđđudmin sämiseervi Brurskanken samiske lag já vuossâmuu säminisonij seervi Brurskankens samiske kvindeforening Taažâst. Brurskankens samiske kvindeforening kočoi čuákán vuossâmuu tave-eennâmlii sämičuákkim, mii tollui kuovâmáánu 6. peeivi 1917 Ruándimist. Laula sahâvuáru leehâi taam historjálii čuákkim. Čuávuváá ive Laula lâi orniimin vuossâmuu väldikodálii sämičuákkim Ruotâ Östersundist. Laula jaamij syeinimáánu 22. peeivi 1931. Suu šoddâmpeivi lii lamaš virgálâš Säämi liputtempeivi ive 2017 rääjist.