Ive 2023 Säämi kielâtaho -palhâšume
Ive 2023 Säämi kielâtaho -palhâšume lii Säämi kielâtaho -palhâšume, mon Sämitige Säämi kielârääđi mieđettij čuákkimstis roovvâdmáánu 3. peeivi 2023 Laapi pyereestvaijeemkuávlun.
Säämi kielârääđi vuáđustâlmeh[mute | mute käldee]
Säämi kielârääđi vuáđustâl miärádâsâs toin naalijn, ete Laapi pyereestvaijeemkuávlu lii aaibâs tooimâs vuáđudem rääjist váldám sämikielâid huámmášumán ornijdumestis já toimâstis sehe tot ain äŋgirávt huksee sämikielâlijd já kulttuurmiäldásijd palvâlusâid jieijâs tooimâ já ornijdume fastâ uássin.[1][2]
Laapi pyereestvaijeemkuávlu lii ovdil mainâšum uulmij olášuttem várás vuáđudâm sämikielâlij já kulttuurmiäldásij palvâlusâi ovdedemhoovdâ já palvâlemhoovdâ viirgijd. Laapi pyereestvaijeemkuávlu lii meid pieijâm naavcâid sämikieláid pálkkáátmáin nuorttâlâš-, anarâš- já tavesämikielâ kielâpargeid. Ton lasseen Laapi pyereestvaijeemkuávlu sämikielâ lävdikode toimâ tuárju sämikielâi sajattuv já kielâlij vuoigâdvuođâi olášume.[1][2]
Laapi pyereestvaijeemkuávlu tuáimá pyerrin ovdâmerkkân tast, maht puáhtá já kalga väldiđ sämikielâlijd palvâlusâid ornijdume uássin jo tai vuáđudemmuddoost, kuás sämikielâliih palvâlusah šaddeh ornijdume tooimâ luándulâš já fastâ uássin. Säämi kielâtaho -palhâšume mieđeetmáin Säämi kielârääđi haalijd ain movtijdittiđ Laapi pyereestvaijeemkuávlu ton sämikielâlij já kulttuurmiäldásijd palvâlusâi oovdedmist já naanoodmist.[1][2]
Käldeeh[mute | mute käldee]
- ↑ 1,0 1,1 1,2 Olthuis, Marja-Liisa: Säämi kielârääđi lii mieđettâm ive 2023 Säämi kielâtaho -palhâšume Laapi pyereestvaijeemkuávlun anarasaavis.fi. 3.11.2023. Čujottum 6.11.2023.
- ↑ 2,0 2,1 2,2 Säämi kielâtaho-palhâšume Samediggi. Čujottum 6.11.2023.