Anarâškielâlâš Wikipedia
Anarâškielâlâš Wikipedia teikka Anarâškielâg Wikipedia lii Wikipedia anarâškielâlâš versio, mii vuáđudui roovvâdmáánu 19. peeivi 2020.[1] Orjâlâškielâlii Wikipedia lasseen taat lii maailm nubbe sämikielâlâš Wikipedia. Jo vuossâmuu peeivi tast lijjii paijeel 1 000 artikkâlid. Ko váldoo huámmášumán anarâškielâ sárnoomeeri, te taan Wikipedia artikkâlmeeri lii viehâ styeres.
Juovlâmáánu 31. peeivi 2020 anarâškielâlii Wikipediast lijjii paijeel 2 000 artikkâlid. Kuovâmáánu 25. peeivi 2021 anarâškielâlii Wikipediast lijjii jo 2 500 artikkâlid. Ive maŋa anarâškielâlii Wikipediast lijjii 3 643 artikkâlid.
Wikipedia anarâškielâlii versiost láá 6 733 artikkâlid, 16 aktiivlâš kevtted já 4 haldâšeijee.
Historjá
[mute | mute käldee]Vuosmuu tove anarâškielâlii Wikipedia irâttii finniđ jo ive 2005, mutâ talle Wikimedia-siättus kielâkomitea ij tom tuhhiittâm. Komiteast smiettii, ete anarâškielâst iä lah tuárvi sárnooh toos, ete projektist šodâččij pyeri – eromâšávt talle, jis eenikielâliih sárnooh iä seervâ mieldi čäälliđ.[2]
Anarâškielâlâš Wikipedia lâi maŋgâ ive nuuvt kočodum "láláttuvâst" ađai Wikimedia Incubatorist, mon vuáđuld visásmiteh tom, ete jieškote-uv Wikiprojektist lii maid taarbâš talle ko tast šadda olmâ wiki.[3] Láláttuvân anarâškielâlii Wikipedia finnejii ive 2011 ađai oovce ihheed ovdilgo tast šoodâi olmâ Wikipedia. Jo láláttuvâst orroom ääigi šoddii maaŋgah artikkâleh, ovdâmerkkân artikkâl Anarâškielâ lii rahtum jo cuáŋuimáánu 8. peeivi 2011.[4] Aainâs-uv jieškote-uv sämikielâst, Anarist sehe mánuppoojijn šoddii artikkâleh ive 2012, ko vuod artikkâlij Kielâpiervâl, Delfiin já Moottorkiälkká vuosmuuh hammiimeh láá ivveest 2014. Ive 2015 šoddii ovdâmerkkân tagareh artikkâleh ko Agatha Christie já Jyväskylä, já 2017 vuod šoddii aainâs-uv artikkâleh P. D. James já Leena Lehtolainen.
Ive 2019 loppâkeejist já ive 2020 aalgâst servii anarâškielâlii Wikipedian mottoom verd uđđâ kevtteeh já šoddii suulâi 50 uđđâ artikkâlid, mii pajedij artikkâlij mere 114 artikkâl räi,[5] ovdilgo kuovâmáánust 2020 Anarâškielâ servi tarvanij meiddei Wikipedia paargon. Tast maŋa Wikipedia vijđánškuođij jotelubboht, ko servi ornij pargopaajijd já pálkkááttij kesipargeid-uv čäälliđ Wikipedian.[6][7]
Vuosmuš Wikipedia-pääji lâi kuovâmáánu 21. peeivi 2020 Anarist, nubbe lâi káidusin Skype peht njuhčâmáánu 27. peeivi, já ovdil cuáŋuimáánu 2020 artikkâleh lijjii masa 200.[8] Meid ohtsâšpargo Giellagasâin išedij anarâškielâlii Wikipedia vijđedmist, ko Oulu ollâopâttuv anarâškielâ lohheeh čäliškuottii Wikipedian kuursâi ääigi.
Vâi uđđâ Wikipedia "čalga" ađai piäsá láláttuvâst šoddâđ olmâ Wikipedian, tast ferttee eres lasseen leđe maaŋgah čälleeh, kiäi čäällim juátkoo kuhheeb ääigi, sehe meid tehálumosiih kevtteeloovtâ viestah jurgâlum translatewikist.[3] Anarâškielâlâš Wikipedia uulij kriterijd ive 2020 ääigi – motomeh aaibâs rámmojii mon šiev kvaliteet tast lâi myensterij, käldei já luokittâllâm tááhust[9] – já nuuvt tast šoodâi Wikipedia roovvâdmáánu 19. peeivi 2020.
Fáádáh
[mute | mute käldee]Kuovâmáánu 28. peeivi 2023 anarâškielâlii Wikipediast lijjii 8 687 luokkad. Talle stuárráámus luokka, mii ij lah čiehhum, lâi Iveh, mast lijjii 1 280 jesânid (artikkâlid já/teikkâ vyeliluokkad). Nubben lâi luokka Ulmuuh staatâ mield, mast lijjii 195 jesânid. Koskâmiärálávt jyehi luokkaast lijjii 4 jeessân.
Statistiikeh
[mute | mute käldee]| Artikkâlij meeri | Peivimeeri | Äigikoskâ (pv) |
|---|---|---|
| 1 | cuáŋuimáánu 2011 | – |
| suulân 1 000 | roovvâdmáánu 19. peeivi 2020 | maŋgâ ive |
| 2 000 | juovlâmáánu 31. peeivi 2020 | 73 |
| 2 500 | kuovâmáánu 25. peeivi 2021 | 56 |
| 3 000 | kesimáánu 15. peeivi 2021 | 110 |
| 3 500 | čohčâmáánu 5. peeivi 2021 | 82 |
| 4 000 | uđđâivemáánu 31. peeivi 2022 | 148 |
| 4 500 | porgemáánu 4. peeivi 2022 | 185 |
| 5 000 | kuovâmáánu 17. peeivi 2023 | 197 |
| 5 500 | juovlâmáánu 20. peeivi 2023 | 306 |
| 6 000 | skammâmáánu 20. peeivi 2024 | 336 |
| 6 500 | juovlâmáánu 4. peeivi 2025 | 379 |
Käldeeh
[mute | mute käldee]- ↑ Brecciaroli, Fabrizio. Anarâškielâlâš Wikipedia lii tääl olmâ Wikipedia. Anarâškielâ servi. Loostâš 03/2020. Čujottum 18.12.2020
- ↑ Requests for new languages/Wikipedia Inari Sami - Meta-Wiki meta.wikimedia.org. Čujottum 17.5.2026. (eŋgâlâskielân)
- 1 2 Brødreskift, Mali: From the Incubator to the World – Congratulations Inari Sámi Wikipedia Diff. 23.10.2020. Čujottum 17.5.2026. (eŋgâlâskielân)
- ↑ Anarâškielâ: Nubástushistorjá – Wikipedia smn.wikipedia.org. Čujottum 17.5.2026.
- ↑ Wikistats - Statistics For Wikimedia Projects stats.wikimedia.org. Čujottum 18.6.2026.
- ↑ Seipiharju, Sáárá: Anarâškielâ seervi mediapargee čaalij jyehi peeivi anarâškielâlâš Wikipedian – puáttee ohhoost almostuvá olmâ anarâškielâlâš Wikipedia Yle Säämi. 16.10.2020. Čujottum 17.5.2026.
- ↑ Seipiharju, Sáárá: Kuldâl jienâ: Anarâškielâlâš Wikipedia vijđán já ovdán – tääl tot lâi mieldi maailmvijđosâš Wikimedia kielâkonferensist Yle Säämi. 28.6.2021. Čujottum 17.5.2026.
- ↑ Brecciaroli, Fabrizio: Anarâškielâlâš Wikipedia láláttuvâst. Anarâš lostâ, Vyesimáánu 2020, s. 6.
- ↑ Requests for new languages/Wikipedia Inari Sami 2 - Meta-Wiki meta.wikimedia.org. Čujottum 17.5.2026. (eŋgâlâskielân)