Praha pääččim 2023
Praha pääččim tábáhtui juovlâmáánu 21. peeivi 2023 Kaarle ollâopâttuv filosofisii tieđâkode táálust Prahast, Tšeekist. Tábáhtusâst 15 olmožid ruáppánii já 25 olmožid karttii pyecceiviäsun haavij keežild.[1] Maaŋgâin ulmuin, kiäh lijjii pääihi alne tábáhtus ääigi, láá lamaš post-traumaatlii stressihemâdâs symptomeh.[2]
Ovdil pääččim já ton ääigi
[mute | mute käldee]Poolis uážui koskâpeeivi maŋa tiäđu, et 24-ihásâš historjá uáppee David Kozák[3] áigu surmiđ jieijâs. Poolis usâškuođij suu. Suu aassâmsaajeest poolis kaavnâi uáppee eeji, mut sun lâi jáámmám. Talle poolis ij vala tiättám, et eidu Kozák lâi surmim jieijâs eeji. Poolis luhostui sajostittiđ uáppee puhelin Celetná kááđu alda, kost uáppest lâi meiddei forgâ älgimin oppâtijme. Poolis evakuistij filosofisii tieđâkode táálu Celetná kááđust já uusâi uáppee. Sun ij kuittâggin lamaš tobbeen, tastko sun lâi moonnâm ollâopâttuv nube táálun Jan Palach torin. Tot lii suullân kilomeetter keččin táálust, mon poolis lâi evakuistmin. Pääččim aalgij tme 14:59.[4] Poolis poođij sajan viiđâ miinut siste. Päččee surmij jieijâs talle ko poolis aldanij suu, já pääččim nuuvâi tijme 15:20.[4]
Tábáhtusâst ruáppánáin kyehti ollâopâttuv pargee: musikologia lágádâs hovdâ Lenka Hlávková já syemmilii kirjálâšvuođâ máttáátteijee já totkee Jan Dlask.[5][6] Päčimist jammii meiddei 12 uápped. Vittnubálovváád uhre lâi päččee jieš.[7]
Pääččim maŋa
[mute | mute käldee]Tšekki uážui maaŋgâid viestâid olgoenâmij jođetteijein, et sij väldih uási murrâšân já fäälih iše. Filosofisâš tieđâkodde meridij juátkiđ máttááttâs luuhâmpaje loopâ räi já kulluuttij, et iskospaje iskoseh láá iävtutátuliih. Ollâopâttâh meiddei nurâškuođij ruuđâid uhrij perrui, uáppei já ollâopâttuv pargei várás. Uđđâivemáánu 24. peeivi 2024 tile lâi taggaar, et ruttânurâmân lijjii jo uásálistám paijeel 41 300 olmožid, kiäh lijjii skeŋkkim ohtsis paijeel 52 miljovn ruvnâd (paijeel 2 miljovn eurod).[8]
Kyehti oho tábáhtus maŋa uđđâivemáánu 4. peeivi 2024 ollâopâttuv uáppeeh uárnejii uhrij muštotilálâšvuođâ. Sij rahtii olmoošvitjá táálu pirrâ, já toin naalijn sij solâstii tom. Solâstem maŋa ulmuuh cokkiittii muštotuulâ, mii puálá oovtâ mánupaje. Loopâst láávlui uáppei lávlumjuávkku.[9]
Fáádást eres soojijn
[mute | mute käldee]
Wikimedia Commonsist láá koveh teikkâ eres tiätuvuárháh fáádást Praha pääččim 2023.
Käldeeh
[mute | mute käldee]- ↑ Praga, sparatoria all'Università Carlo: 14 morti e 25 feriti. A fare fuoco, uno studente di 24 anni RaiNews. 21.12.2023. Čujottum 24.1.2024. (italiakielân)
- ↑ Kalábová, Hana: Ulmuuh väldih uási murrâšân Praha pääččim maŋa anarasaavis.fi. 23.1.2024. Čujottum 24.1.2024.
- ↑ Prague shooting: Who is David Kozak, the gunman who left 14 dead at Charles University WION. Čujottum 24.1.2024. (eŋgâlâskielân)
- ↑ 4,0 4,1 How killer left a trail of victims across Prague bbc.com. 22.12.2023. Čujottum 24.1.2024. (eŋgâlâskielân)
- ↑ Česko halí státní smutek www.novinky.cz. 23.12.2023. Čujottum 24.1.2024. (tšeekikielân)
- ↑ Suutari, Elli: Yksi Prahan ampujan uhreista oli suomalaisen kirjallisuuden lehtori Ilta-Sanomat. 22.12.2023. Čujottum 24.1.2024. (suomâkielân)
- ↑ La fine del killer di Praga. Suicida di fronte agli agenti www.agi.it. 22.12.2023. Čujottum 24.1.2024. (italiakielân)
- ↑ Pomoc zasaženým tragédií na FF UK Darujme.cz. Čujottum 24.1.2024. (tšeekikielân)
- ↑ Holakovský, Milan & Stodolová, Eliška & Cihla, Radek: Tisíce lidí po průvodu objaly fakultu. Na náměstí byl zapálen památný oheň Pražský deník. 4.1.2024. Čujottum 24.1.2024. (tšeekikielân)