Meccihaldâttâs
Meccihaldâttâs (nuorttâlâškielân Meäʹcchalltõs, orjâlâškielân Meahciráđđehus já suomâkielân Metsähallitus) lii Suomâ staatâ finnodâhlájádâs, mii pyevtit luándusyergi palvâlusâid. Ton mittomeerijd tuhhit ovdâskodde ihásávt staatâ budjet uássin. Meccihaldâttâs puáđusstivriimist västid eennâm- já meccituáluministeriö. Almos haldâttâhpargoid stivree meid pirâsministeriö jieijâs haldâttâhsyergi aašijn.[1]
Meccihaldâttâs haaldâš suullân 12,5 miljovn hehtaarid eennâm- já čäcikuávluid, maid Suomâ staatâ oomâst. Tot lii masa kuálmádâs Suomâ vijđoduvvâst. Eennâmkuávlu styeresvuotâ lii 9 139 000 hehtaarid já čäcikuávlu 3 419 000 hehtaarid.[2] Stuárráámus uási täin kuávluin lii Nuorttâ- já Tave-Suomâst. Meccihaldâttâs västid tai kuávlui hoittáámist já kevttimist nuuvt, ete tain lii ävkki syemmilii ohtsâškoodán nuuvt ennuv ko máhđulâš.
Ive 2020 puátusist Meccihaldâttâs puátudij staatân 120 miljovn eurod. Meccihaldâttâs eennâm- já čäciomâduv árvu lii suullân nelji miljard eurod.[3] Meccihaldâttâs váldukonttur lii Vantaa Tikkurilast, toimâttâh- já finnodâhkuávdáš Dixi niäljád keerdist, čujottâsâst Ratatie 11 B.[4]
Almos haldâttâhpargoh[mute | mute käldee]
Finnodâhtooimâ lasseen Meccihaldâttâs hoittáá viärutuáváiguin almos haldâttâhpargoid, maid staatâ tast tiiláá. Taah pargoh láá luándusuojâlem sehe vandârdeijei já pivdei palvâlusah.
Luándusuojâlem- já vandârdemkuávluid hoittáá Meccihaldâttâs Luándupalvâlusah.[5] Tot västid Suomâ puoh aalmugmeecijn já eres luándusuojâlemkuávluin. Ive 2021 ulmuuh ellii aalmugmeecijn, staatâ vandârdemkuávluin, historjáčuosâttuvâin, luándukuávdáin já eres pivnohis čuosâttuvâin ohtsis paijeel 8,5 miljovn kerdid.
Lahâaasâtlii luándusuojâlemkuávlui vijđodâh lii 1 778 000 hehtaarid. Ton lasseen Luándupalvâlusah hoittáá eres suojâlemkuávluid já staatâ almolijd čäcikuávluid.
Meccihaldâttâs Pivdempalvâlusah västid kuálástem já meccipivdo orniimist staatâ kuávluin. Tot vuábdá kuálástem- já pivdoluuvijd sehe norá staatâ kyelinälitipšommáávsuid eennâm- já meccituáluministeriön.[6]
Meccitärhisteijeeh vákšojeh laavâi paittum staatâ eennâm- já čäcikuávluin. Ton lasseen meccivákšojeijeeh já eres Meccihaldâttâs pargoviehâ išedeh vakšuumist, mutâ sist iä lah siämmááh vuoigâdvuođah ko meccitärhisteijein.[7]
Finnodâhtoimâ[mute | mute käldee]
Meccihaldâttâs Meccituálu Us (suomâkielân Metsähallitus Metsätalous Oy) hoittáá lonolâskiävttumeecijd (suomâkielân monikäyttömetsä) sehe västid markkânistmist já vuábdá muorâid.
Meccihaldâttâs Kiddodâhovdánem (suomâkielân Metsähallitus Kiinteistökehitys)
- västid kaavaamist Meccihaldâttâsâst,
- vuábdá já laigut kuávluid finnoduvváid já ovtâskâs ulmuid,
- västid Meccihaldâttâs eennâmvyebdimist já -uástuin,
- laigut keđgiamnâsij väldimsoojijd sehe
- västid aktiivlii hahâoovdedmist pieggâvuáimán kyeskee finnodâhtooimâst.[8]
Ton lasseen Meccihaldâttâsâst láá kyehti eres nieidâfinnoduv. Siemen Forelia Oy pyevtit já vuábdá vyevdimuorâi siemânijd Suomâst já Tave-enâmijn. MH-Kivi Oy laigut keđgiamnâskuávluid infrastruktuur rähtei kevttimân já vuábdá jáludâsâid keđgiamnâskuávluin, maid tot haaldâš.[9]
Fáádást eres soojijn[mute | mute käldee]
Wikimedia Commonsist láá koveh teikkâ eres tiätuvuárháh fáádást Meccihaldâttâs.
- Meccihaldâttâs nettisiijđoh (suomâkielân)
Käldeeh[mute | mute käldee]
- ↑ 1,0 1,1 Hallinto ja johtaminen (metsa.fi). Čujottum 30.3.2022 (suomâkielân)
- ↑ 2,0 2,1 Metsähallituksen hallinnoimat valtion maa- ja vesialueet (metsa.fi). Čujottum 30.3.2022 (suomâkielân)
- ↑ 3,0 3,1 Valtion maaomaisuuden haltijat paljon vartijoina (maanmittauslaitos.fi). Čujottum 30.3.2022 (suomâkielân)
- ↑ 4,0 4,1 Yhteystiedot (metsa.fi). Čujottum 30.3.2022 (suomâkielân)
- ↑ 5,0 5,1 Luontopalvelut – elinvoimaa luonnolle ja ihmisille (metsa.fi). Čujottum 30.3.2022 (suomâkielân)
- ↑ 6,0 6,1 Eräpalvelut (metsa.fi). Čujottum 30.3.2022 (suomâkielân)
- ↑ 7,0 7,1 Erätarkastajat (eraluvat.fi). Čujottum 30.3.2022 (suomâkielân)
- ↑ 8,0 8,1 Metsähallitus Kiinteistökehitys – lisäarvoa maille ja vesille (metsa.fi). Čujottum 30.3.2022 (suomâkielân)
- ↑ 9,0 9,1 Muut tytäryhtiöt (metsa.fi). Čujottum 30.3.2022 (suomâkielân)