Francis Scott Key -šalde koččâm

Wikipedia:st
Francis Scott Key -šalde já Dali-tamppâ
Kartta
Francis Scott Key -šalde

Njuhčâmáánu 26. peeivi 2024 2,6 kilomeetter kuhes Francis Scott Key -šalde koočâi meerân Ovtâstum staatâi Baltimorest.[1] Lastâtamppâ suojâi šalde coggâstuálpun, mon keežild šalde koočâi. Ubâ šalde ij koččâm meerân, mutâ stuárráámus uási tast.

Tuávváš[mute | mute käldee]

Šalde huksimpargoh algii ive 1972, já šalde valmâštui njuhčâmáánu 23. peeivi 1977.[1] Ađai šalde lâi lamaš kiävtust 47 ihheed ovdil päärti.[1] Baltimore šalde rastalditij Pataspco-juuvâ, já ton alne lâi ain ennuv jotolâh.

Dali-tamppâ[mute | mute käldee]

Dali-nommâsâš lastâtamppâ lii 300 meetterid kukke, já tot vuolgij joton Baltimore hamânist Sri Lanka kulij.[2] Tamppâ purjâstij Singapore liipu vyelni, já ton sáátust lijjii 22 parged.

Pärtti[mute | mute käldee]

Pärtti tábáhtui iho pel kyevti ääigi páihálii ääigi. Taampâ uigâmvyeimisysteem cuovkkânij já taampân šoodâi šleđgâpotkâ tuše muáddi miinuut ovdil šaaldan teivâm. Uigâmvyeimisysteem cuovkkânem já šleđgâpoođhâ keežild lastâtaampâ ij puáhtám innig stivriđ. Taampâst lijjii lamaš ovdil-uv vaigâdvuođah uigâmvyeimisysteemáin.[3]

Taampâ pargoviehâ vuolgâttij Mayday-signaal jotelávt, já tot adelij lase ääigi virgeomâháid evakuistiđ šalde. Dali-taampâ luocci kočoi, ete haammânáákkár kalga lyeštiđ vuálus, te taampâ liähtu hiđoččij. Pargovievâ jotelis toimâm piäluštij maaŋgâid ulmuid.[3]

Viehâ jotelávt päärti maŋa arvâlui, ete ličij-uv pärtti porgum tátulávt, ovdâmerkkân terrorism keežild. Baltimore poolishovdâ Richard Worley kuittâg eeđâi, ete ij lah maggaargin tuođâštus toos, ete pärtti ličij porgum tátulávt. Ovtâstum staatâi president Joe Biden eeđâi meid siämmáánáál. Sun meid ceelhij, ete tábáhtus lâi "kavhâdis pärtti".[3]

Uhreh[mute | mute käldee]

Šalde alne lijjii käävci olmožid, ko tamppâ suojâi toos. Virgeomâhááh puohtii piäluštiđ kyehti sist.[4] Kuttâ huksimpargee láá jáámmám päärtist.[5][6] Sist ohtâ lâi honduraslâš, kyehti láin meddâl Guatemalast, já loopah lijjii meddâl El Salvadorist já Meksikost.[7][8]

Fáádást eres soojijn[mute | mute käldee]

Käldeeh[mute | mute käldee]

  1. ↑ 1,0 1,1 1,2 Francis Scott Key Bridge (Baltimore, 1977) Structurae. Čujottum 1.4.2024. (eŋgâlâskielân)
  2. ↑ What We Know About Ship That Crashed Into the Baltimore Bridge web.archive.org. 26.3.2024. Čujottum 1.4.2024.
  3. ↑ 3,0 3,1 3,2 Gahmberg, Emma: Francis Scott Key -šalde lii koččâm meerân Baltimorest anarasaavis.fi. 1.4.2024. Čujottum 1.4.2024.
  4. ↑ Baltimore bridge collapses after being hit by ship web.archive.org. 26.3.2024. Čujottum 1.4.2024. (eŋgâlâskielân)
  5. ↑ Coast Guard Ends Search for 6 Missing in Bridge Disaster web.archive.org. Čujottum 1.4.2024. (eŋgâlâskielân)
  6. ↑ Cargo ship lost power before colliding with Baltimore bridge; 6 remain missing after collapse web.archive.org. 26.3.2024. Čujottum 1.4.2024.
  7. ↑ Baltimore Key bridge collapse: Divers recover 2 bodies from water web.archive.org. 29.3.2024. Čujottum 1.4.2024. (eŋgâlâskielân)
  8. ↑ Lost power, a mayday call and the crash that brought down a Baltimore bridge web.archive.org. 26.3.2024. Čujottum 1.4.2024. (eŋgâlâskielân)
Viežžum saajeest "https://smn.wikipedia.org/w/index.php?title=Francis_Scott_Key_-šalde_koččâm&oldid=100600"