Václav Havel
Václav Havel (5. roovvâdmáánu 1936 Praha, Tšekkoslovakia – 18. juovlâmáánu 2011 Vlčice, Tšekki)[1] lâi aalmugijkoskâsávt pegâlmâs tšekkilâš kirječällee já čaaitâlmčällee. Pegâlmâs čaitâlmeh láá ovdâmerkkân Zahradní slavnost (Muorâkärdijuhle, 1964), Vyrozumění (Muštottâs, 1965) já Audience (Savváidpeessâm, 1975). Havel lâi meiddei politikkár já Tšekkoslovakia majemuš president sehe Tšeeki vuossâmuš president iivij 1989–2003. Sun lâi moddii Nobel-palhâšume iävtukkâs. Sun masa jo finnij tom ive 1989, mutâ talle tom finnij Havel pyeri ustev Dalai-lama.
Eellim[mute | mute käldee]
Václav Havel šoodâi roovvâdmáánu 5. peeivi 1936 Prahast já jaamij juovlâmáánu 18. peeivi 2011 jieijâs kesitáálust Vlčice.[1][2] Havel naajâi kuohtii: suu kálgun láin Olga Havlová (j.s. Šplíchalová) já Dagmar Havlová (j.s. Veškrnová).
Karrieer[mute | mute käldee]
Nuuvt kočodum saameetvääldikomettem ääigi, mii aalgij skammâmáánust 1989 Prahast, Václav Havel lâi ohtâ Občanské fórum -nubástuslihâstâs vuáđudeijein. Talle juovlâmáánu 29. peeivi sust šoodâi vuossâmuu tove president. Sun tooimâi presidentin ohtsis kulmânubáloh ihheed.
Čällen sun ruokkâdávt kieđâvušâi tagarijd teemaid ko vääldi, byrokratia já rijjâvuotâ. Siämmáid aašijd kieđâvušeh meiddei suu ive 1990 almostittum reeivah, moh sun čaalij kálgusis Olgan iivij 1979–1983 ko sun lâi pooliitlij suujâi tiet faŋgâlist.
Fáádást eres soojijn[mute | mute käldee]
Wikimedia Commonsist láá koveh teikkâ eres tiätuvuárháh fáádást Václav Havel.
Käldeeh[mute | mute käldee]
- ↑ 1,0 1,1 Vaclav Havel www.britannica.com. Čujottum 30.11.2022. (eŋgâlâskielân)
- ↑ Dan Bilefsky, Jane Perlez: Vaclav Havel, Former Czech President, Dies at 75 The New York Times. 18.12.2011. Čujottum 1.12.2022. (eŋgâlâskielân)
