Skábma – Snowfall

Wikipedia:st

Skábma – Snowfall lii ive 2022 videospellâ, mii lii uážžum inspiraatio sämmilii kulttuurist já sämmilijn mainâsijn.[1] Tamperelâš spellâirâttâs Red Stage Entertainment lii vuávám speelâ. Ohtâ spellâirâttâs vuáđudeijein já speelâ vuávájeijein, Marjaana Auranen, lii jieš sämmilâš.[2]

Skábma – Snowfall lii fantasia- já mainâsspellâ. Speelâ vuávájeijeeh láá jiejah ráhtám speelâ juonâ, veikkâ eres ulmui vuáttámušah láá movtijdittâm speelâ rähtimist. Mainâseh láá nurrum pirrâ Säämi. Siämmáá mainâsist kávnojeh távjá eenâb ko ohtâ versio. Speelâ vuáváámist mainâs uásih láá valdum tiebbin tääbbin, já toh láá ovtâstittum ohtân mainâsin. Ton lasseen, ete speelâ tyehin lii sämmilâš kulttuur, taat lii meiddei vuosmuš tohe, ko stuorrâ videospellâ lii jienâčaittâlum ollásávt tavesämikielân.

Juonâ álgá tast, ko nuorâ puásuikeččee Áilu kávná puáris já vájáldittum nuáidiruumbu. Sun aalgât pálgás, vâi sun šodâččij uáinojeijen já pyeredeijen. Spellâ lii spellâmnáál tiäturáin, já tom puáhtá uástiđ spellâkaavpijn neetist. Vuáváámeh láá, ete spellâ almostuvá meiddei konsolspellân aldapuátteevuođâst.[3]

Palhâšumeh[mute | mute käldee]

Skábma – Snowfall vuoitij ive 2022 palhâšume Suomâ pyeremus kreatiivlâžžân spellân.[3]

Ive 2023 Nordic Games Awards -kištoost Skábma – Snowfall vuoitij kyehti palhâšume: tave-enâmij pyeremus spellâ já pyeremus taaiđâ.[4] Kišto eehidjuhle uárnejui vyesimáánu 25. peeivi 2023 Malmöst, Ruotâst.[5]

Fáádást eres soojijn[mute | mute käldee]

Käldeeh[mute | mute käldee]

  1. Virtanen, Jori: Peliarviossa suomalainen Skábma - Snowfall – saamelaistarinoita saameksi on ensimmäinen lajiaan Mikrobitti. 28.5.2023. Čujottum 28.5.2023. (suomâkielân)
  2. Saamelaisten tarinoista ammentava suomalaispeli on saanut runsaasti huomiota maailmalla – oli vaikea valinta tehdä peli oman kulttuurin traumoista, sanoo käsikirjoittaja Helsingin Sanomat. 20.6.2022. Čujottum 28.5.2023. (suomâkielân)
  3. 3,0 3,1 Ylänne, Tuula: Skábma – Snowfall videospellâ lii nomâttum iävtukkâssân tave-eennâmlâš kištoost | Anarâš aavis anarasaavis.fi. 25.5.2023. Čujottum 28.5.2023. (suomâkielân)
  4. Suomalainen Skabma - Snowfall palkittiin vuoden parhaana pohjoismaisena pelinä Nordic Game Awardsissa pelaaja.fi. 27.5.2023. Čujottum 28.5.2023. (suomâkielân)
  5. Nordic Game Awards • Nordic Game 2023 Nordic Game 2023. 5.5.2023. Čujottum 28.5.2023. (eŋgâlâskielân)