Nerskogen kappel
| Nerskogen kappel | |
|---|---|
 Nerskogen kappel porgemáánust 2008 |
|
| Staatâ |
 Taažâ |
| Lääni | Trøndelag |
| Kieldâ | Rennebu |
| Pispekodde | Nidaros pispekodde |
| Ruávástkodde | Gauldal ruávástkodde |
| Huksejum | 1962 |
| Vihkum kiävtun | čohčâmáánu 2. peeivi 1962[1] |
| Vuávájeijee(h) | John Egil Tverdahl[2] |
| Materiaal | hirssâ |
| Čokkámsajeh | 110[3] |
| Äigi | UTC+1 |
Nerskogen kappel lii ive 1962 huksejum já kiävtunvihkum kuheskirkko Rennebu kieldâst, Trøndelag läänist.[4] Kirho vuávái taažâ arkkiteht John Egil Tverdahl. Kirho pirrâ lii kirkkoeennâm.
Historjá
[mute | mute käldee]Ovdil ko kirkkohuksiittâs huksejui ive 1962, servikodde keevtij siärvádâhviste kirkkon.[1] Ive 1950 siämmáá toontin huksejui kiällutornâ. Ive 1958 huksimkomitea nurâškuođij ruuđâid kirho já kirkkoeennâm huksimpaargon.[2] Servikodde pálkkááttij John Egil Tverdahl vuáváđ kirho. Kesimáánust 1962 muorâkirkko lâi jo vaalmâš, já pispe Tord Godal viihkâi tom kiävtun čohčâmáánu 2. peeivi 1962.[2][5]
Huksiittâs
[mute | mute käldee]Kappel lii rahtum salvum hirssâkeerdijn keđgijyelgi oolâ. Ulguubeln kirho hiirsâi alne láá ruopsâdin máálájum ciägulyevdih. Siskiibeln tuše káátust láá lyevdih. Toh láá kuovgisčuovjâdin máálájum. Hiirsah vist iä lah máálájum. Ubâ kirho vyelni lii stuorrâ kiällár, kost láá ei. purâdemsali, čuákkimviste, kievkkân, pivtâsviste já hiivsigeh.[2]
Kirho já kirkkoeennâm pirrâ lii vyeligis meetaaläiđi. Ääiđist lii kirho máddáákeččin uáiviuksâ, mon räi piäsá kiäinu mield. Siämmáá kiäinu juátkoo kirho olgouuvsâ já kivkkáás porthái räi. Olgouksâ lii kirho veeskiruásist, mii lii vyeligub ko kirkkotupe.
Kirkkotupe
[mute | mute käldee]Kiirkon čäähih siämmáá ääigi suulân 110 olmožid.[3] Tuuveest láá kuovgisčuovjis peeŋkah já Ingebrigt Kosbergløkk skuážurdem särnistovli.[6] Kirkkotuve maadânuorttiikeččin láá ollâ kiällutornâ já maŋgâ lasârääigi. Toornâ kiälu kirkko finnij ive 1952 Olsen Nauen Klokkestøperist.[1] Tom Kirho vuossâmuuh uurguh lijjii ovdalist Tiller kirhoost.[2] Tääl tuuveest láá Norsk Orgel- og Harmoniumfabrikk rähtim uurguh, maid kirkko finnij ive 1974.[1]
Kuori
[mute | mute käldee]Kuori lii kirkkohuksiittâs taveviestârkeččin, já tot lii vyeligub ko kirkkotupe, mut ollâgub ko veeskiruási. Kuorist lii álttár, álttártavlu já kaastâcerkki. Kirho kaastâcerkki lii ivveest 1880 ađai tot lii puárásub ko kappel.[1]
Álttártavlu
[mute | mute käldee]Kirhoost lii ivnáás álttártavlu, mon máálái taažâ taaiđâmáálár Mikael Hoel.[6] Pirâldâs raahtij já skuážurdij Ola Bakk.[1][6]
Iästuttesvuotâ
[mute | mute käldee]Kappel lii luáhá alne já ton oovdâst láá kivkkáás porthááh, mut ij lah njuáidus; njuáidus lii kirho tyehin. Kirkkotuuveest iä lah porthááh ađai kirkkotupe lii iästuttem. Ij lah tiäđust, lii-uv kiällár meiddei iästuttem.
Fáádást eres soojijn
[mute | mute käldee]
Wikimedia Commonsist láá koveh teikkâ eres tiätuvuárháh fáádást Nerskogen kappel.
Käldeeh
[mute | mute käldee]- ↑ 1,0 1,1 1,2 1,3 1,4 1,5 Nerskogen kapell Norske kirker. Čujottum 29.9.2023. (kirjetárukielân)
- ↑ 2,0 2,1 2,2 2,3 2,4 Nerskogen kapell ferdig til høsten. Opdalingen, 14.6.1962, 26. ihekerdi, nr 24, s. 2. Artikkâl nettiversio Čujottum 29.9.2023. (kirjetárukielân)
- ↑ 3,0 3,1 Nerskogen kapell Kirkesøk. Čujottum 29.9.2023. (kirjetárukielân)
- ↑ Prestegjeld og sogn i Sør-Trøndelag Sognehistorikk for Sør-Trøndelag. arkivverket.no. 5.7.2017. Čujottum 29.9.2023. (kirjetárukielân)
- ↑ Nerskogen kapell vigslet av biskop Godal i går. Nationen, 3.9.1962, 45. ihekerdi, nr 203, s. 2. Artikkâl nettiversio Čujottum 29.9.2023. (kirjetárukielân)
- ↑ 6,0 6,1 6,2 Biskop og dalførets prester til kapellinviing på Nerskogen. Sør-Trøndelag, 30.8.1962, 54. ihekerdi, nr 97, s. 1. Artikkâl nettiversio Čujottum 29.9.2023. (kirjetárukielân)