Berkåk kirkko
| Berkåk kirkko | |
|---|---|
 Berkåk kirkko ive 2013 |
|
| Staatâ |
 Taažâ |
| Lääni | Trøndelag |
| Kieldâ | Rennebu |
| Pispekodde | Nidaros pispekodde |
| Ruávástkodde | Gauldal ruávástkodde |
| Servikodde | Berkåk servikodde |
| Huksejum | 1878 |
| Vihkum kiävtun | roovvâdmáánu 30. peeivi 1878[1] |
| Vuávájeijee(h) | Henrik Nissen |
| Materiaal | hirssâ |
| Čokkámsajeh | 200[2] |
| Stijlâ | uđđâgootiiklâš |
| Äigi | UTC+1 |
Berkåk kirkko lii uđđâgootiiklâš, hiirsâin huksejum kuheskirkko Berkåkist, Rennebu kieldâst, Trøndelag läänist, Taažâst. Tot kulá siämmáánommâsii servikoodán. Kirho vuávái taažâ arkkiteht Henrik Nissen.[1] Kirho pirrâ lii kirkkoeennâm.
Historjá
[mute | mute käldee]Ive 1862 Rennebu kieldâst šoodâi nk. pappâkieldâ ađai pitejâš. Ive 1877 kieldâstivrâ meridij, ete Berkåkân kalga huksiđ kirho.[3] Tääl ko servikodde finnij love huksiđ kappelkirho kunâgâslâš miärádâs 4.6.1877 vuáđuld, te vuávám- já huksimpargo aalgij.[1][4] Servikodde pálkkááttij Henrik Nissen vuáváđ kappelkirho. Skammâmáánust 1878 kirkko lâi jo vaalmâš, já pispe viihkâi muorâkirho kiävtun roovvâdmáánu 30. peeivi 1878.[1]
Ive 1953 aalgâst kirkko tivodui ko tot lâi kirho 75. ihe. Tivvoompargo ääigi kirkkotupán já kuorin huksejuvvojii káttukeevlih.[1] Ive 1971 rahtui ohtâsâš ruumâš- já palvâlusvisti.[1] Ko kirkko teevdij 100 ihheed ive 1978, te kirkko tivodui uđđâsist.
Huksiittâs
[mute | mute käldee]
Kirkko lii rahtum salvum hirssâkeerdijn. Ulguu- já siskiibeln kirho hiirsâi alne láá lyevdih. Ulguubeln toh láá vielgâdin máálájum. Siskiibeln lyevdih láá lättest lasâraaigij vuoluubel räi ränisin máálájum já vielgis ivnijn hervâttum. Tast pajaskulij lyevdih láá fiskâdin máálájum káttukeevli räi, mii lii vuod vielgâd.
Kirho já kirkkoeennâm pirrâ lii vyeligis äiđi, mii lii kirho aldasijn keđgiäiđi já eres soojijn vielgâdin máálájum lyevdiäiđi. Ääiđi uáiviuksâ lii kirho máddáákeččin, já kirho olgouuksân piäsá pálgá mield. Olgouksâ lii kirho veeskiruásist, mii lii vyeligub ko kirkkotupe. Kirkkotuve viestârkeččin láá ollâ kiällutornâ já jurbâ laasâ.[5] Kiälu ooptij Lars Rustad ive 1874.[1]
Kirkkotupe
[mute | mute käldee]Kiirkon čäähih siämmáá ääigi suulân 200 olmožid.[2] Tuuveest láá ruopsis peeŋkah, särnistovli já kaastâcerkki, moh láá muorâst rahtum. Kaastâceerhi raahtij já skuážurdij berkåklâš Ola Hoel.[1]
Kuori
[mute | mute käldee]Kuori lii kirkkohuksiittâs nuorttiibeln, já tot lii vyeligub ko kirkkotupe. Kuorist lii álttár já álttártavlu. Kuori paaldâst lii tääl káttudum särnistovli; ovdil särnistoovli alne ij lamaš káttu. Kyevtpeln kuori láá sákásteh.
Álttártavlu
[mute | mute käldee]Aalgâst kirhoost ij lamaš álttártavlu, pic kirhoost lâi muorâristâ. Ive 1918 kirkko finnij ivnáás álttártaavlu, mon máálái taažâ taaiđâmáálár Harald Brun. Pirâldâs raahtij já skuážurdij Ola Hoel.[1] Ive 1958 kirkko finnij uđđâ álttártaavlu, mon máálái Mikael Hoel. Uđđâ álttártaavlu pirrâ lii vistig Hoel rähtim pirâldâs.
Iästuttesvuotâ
[mute | mute käldee]Kirkko lii lätis saajeest, já parkkisaje lii Kjerkveien (Kirkkokiäinu) tovnbeln. Kirho oovdâst láá porthááh já njuáidus. Kirho siste iä lah porthááh ađai kirkko lii iästuttem.
Kovegalleria
[mute | mute käldee]-
Historjálâš kove kirhoost (suulân ive 1895) -
Puáris kove kirhoost -
Áimukove kirhoost já hävdienâmist syeinimáánust 2018
_(20._juli_2018).jpg)
Fáádást eres soojijn
[mute | mute käldee]
Wikimedia Commonsist láá koveh teikkâ eres tiätuvuárháh fáádást Berkåk kirkko.
Käldeeh
[mute | mute käldee]- ↑ 1,0 1,1 1,2 1,3 1,4 1,5 1,6 1,7 1,8 Berkåk kirke Norske kirker. Čujottum 28.9.2023. (kirjetárukielân)
- ↑ 2,0 2,1 Berkåk kirke Kirkesøk. Čujottum 28.9.2023. (kirjetárukielân)
- ↑ Kirkejubileum i Berkåk søndag. Trøndelagen, 1.11.1928, 27. ihekerdi, nr 157, s. 3. Artikkâl nettiversio Čujottum 28.9.2023. (kirjetárukielân)
- ↑ Prestegjeld og sogn i Sør-Trøndelag Sognehistorikk for Sør-Trøndelag. arkivverket.no. 5.7.2017. Čujottum 28.9.2023. (kirjetárukielân)
- ↑ Lange, Fredrik Borchgrevink: Hvilken av kirkene våre er den fineste?. Opdalingen, 19.2.2020, 83. ihekerdi, nr 14, s. 13. Artikkâl nettiversio Čujottum 28.9.2023. (kirjetárukielân)