Almenähki
Almenähki teikkâ almenäkki lii uuccâmkirje, mast láá távjá tiäđuh čuávuváá ive jurâmist, almepittáin, tehálâš tábáhtusâin, merkkâpeeivijn jna. Jyehi ive almostuvá uđđâ versio.
Ereslágán almenaahkijn láá távjá tiäđuh eres kevtteejuávhoid. Ovdâmerkkân eennâmviljâleijei almenaahkijn láá tiäđuh tast, kuás ferttee kalveđ, maggaar šoŋŋâ lii já kuás sehe kuás piäiváš já mánudâš pajaneh já lyeštih.
Motomijn almenaahkijn láá meid nommâpeeivih. Ollâopâttuv nommâpeivialmenähki lii tággáár almenähki. Tast láá meid ereslágán tiäđuh tegu Suomâ já Säämi liputtempeeivih, pivnohumos suomâ- já ruotâkielâlâš noomah muáddi ive tassaaš, nommâpeeivih suomâ-, ruotâ- já orjâlâškielân já mottoom verd meid čalluuh, moh kyeskih almenäähki fáddáid.
Onnáá peeivi kávnojeh meid šleđgâlâš almenäähkih tegu Ollâopâttuv nommâpeivialmenähki, mii ive 2016 rääjist lii lamaš finnimnáál sehe teddilum version já moobiilheiviittâssân.[1] Uási teddilum almenäähki tiäđuin kuittâg váiluh moobiilversiost tegu mánudáá já planetij pajanem- já lyeštimtiäđuh já oovdebij iivij šoŋŋâlovottuvah.[1]
Käldeeh[mute | mute käldee]
- ↑ 1,0 1,1 Yliopiston almanakka 2016 nyt myös mobiilisovelluksena. Ollâopâttuv almenähkitoimâttâh. 3.12.2015. Čujottum 24.1.2021 (suomâkielân)
