Čuhčá

Wikipedia:st
Siirry navigaatioon Siirry hakuun
Čuhčá
Tetrao urogallus
(Linnaeus, 1758)
Metsis ehk mõtus (Tetrao urogallus), Euroopa suurim kanaline 2012.jpg
Tile LC (eellimvuáimálâš)
Tile Suomâst LC (eellimvuáimálâš)
Tieđâlâš luokittâllâm
Doomeen Sellâvááimusliih Eucarya
Kodde Elleekodde Animalia
Uáiviráiđu Savosuonâsiih Chordata
Vyeliráiđu Čielgitávtáliih Vertebrata
Luokka Lodeh Aves
Lahko Känilodeh Galliformes
Čerdâ Puigâkäänih Phasanidae
Vyeličerdâ Meccikäänih Tetraonidae
Suuhâ Čuuvčáh Tetrao
Šlaajâ urogallus

Čuhčá lii Suomâ stuárráámus meccikänilodde, mii kulá puigâkaanij čeerdân. Čuhčá lii Koskâ-Suomâ eennâmkoddelodde.

Stuárudâh já tobdomeerhah[Mute | Mute käldee]

Kuáppil

Čuhčá lii 54–90 cm kukke. Puáris ores tiäddá koskâmiärálávt 4 kg já niŋálâs ađai kuáppil 1,9 kg. Nuorâ lodeh láá keppisuboh. Orráás čalme paajaabeln lii ruopsis liškepuáimu já käŋŋirist vielgis tiälkku, mut mudoi tot lii čappâd já ruškiskirjáá. Stuorrâ poođâš lii čappâd vielgis tiälhuigijn. Kuáppil lii ränis- já ruškiskirjáá já ucceeb ko ores.[1]

Lavdâm já eellimpiirâs[Mute | Mute käldee]

Čuhčá lii EuroopAasia taveoosij kuácceevyevdistiellâs lodde. Suomâst tot iälá masa ubâ enâmist, eereeb peesi ordârääji taavaabeln.[2] Čuhčá lii päikkilodde. Tot iälá mielâstubbooht puáris vuovdijn. Lasanemääigi ulguupeln oráseh já niŋálâsah joteh eres juávhoin. Suomâ čuhčánääli lii áárvu mield 540 000 ohtâgâssâd.[1]

Lasanem[Mute | Mute käldee]

Kiđđâtäälvi oráseh čokkâneh kiihâmsoojijd kištottâllâđ koskânis, já kuáppil väljee kyeimis toi juávhust. Čuuvčáh kiheh siämmáin soojijn jyehi ive. Kuáppil piervâld muorâ teikkâ miestuu suáján. Tot mannee cuáŋui-vyesimáánust táválávt 6–8 manneed já láálá taid 24–29 peivid. Uđâgááh kirdeškyetih 24–29 peeivi ahasâžžân.[1]

Raavâd[Mute | Mute käldee]

Keessiv čuhčá porá umolijd, versoid já siemânijd já tälviv pecikuácceid.[1]

Miäcástem[Mute | Mute käldee]

Čuuvčá miäcástem lii loválâš čohčuv ubâ Suomâst, eereeb UđđâeennâmVarsinais-Suomâ eennâmkuudijn.[3]

Käldeeh[Mute | Mute käldee]

  1. 1,0 1,1 1,2 1,3 Luontoportti.fi Čujottum 9.4.2021 (suomâkielân)
  2. Suomen lintuatlas Čujottum 9.4.2021 (suomâkielân)
  3. Suomen riistakeskus Čujottum 9.4.2021 (suomâkielân)