Taažâ Sämitige vaaljâpirrâduvah (ive 2009 rääjist)
Taažâst Sämitige vaaljâpirrâduvah láá lamaš ive 2009 sämitiggevaaljâi rääjist čiččâm.[1] Vaaljâpirrâduvâin jienâvuoigâdvuotâ lii tagarijn ulmuin, kiäh tobbeen ääsih já kiäh láá merkkejum Taažâ sämitige vaaljâluvâttâlmân ton vaaljâpirrâdâhân.
Historjá[mute | mute käldee]
Ivveest 1989 ihán 2005 Taažâ sämitiggevaaljâin lijjii 13 vaaljâpirrâdâhhâd, mut taat vuáhádâh nubásmittui ovdil ko ive 2009 sämitiggevaaljah uárnejuvvojii. Ive 2009 rääjist láá lamaš tuše 7 vaaljâpirrâdâhhâd.
Onnáá peeivi sämitiigán väljejuvvojeh vaaljâin 39 sämitiggeairâsid. Ovdil vuod vaaljâin väljejuvvojii 43 sämitiggeairâsid. Jyehi vaaljâpirrâduvvâst väljejuv sämitiigán kyehti airâs.[1] Tast maŋa loopah 25 mandaatid juáhhojeh koskâvuođâlávt puoh vaaljâpirrâduvâi kooskâst täi olmoošlovo vuáđuld nuuvt, ete Maadâ-Taažâ vaaljâpirrâduvvâst iä väljejuu vaaljâin ohtsis eenâb ko 6 sämitiggeairâs.[1]
Nuorttâkuávlu vaaljâpirrâdâh[mute | mute käldee]
Nuorttâkuávlu vaaljâpirrâdâhân ađai vaaljâpirrâdâhân 1 kuleh ohtsis oovce kieldâd Finnmarkist.[1] Toos kuleh tääl ovdii Vaarjâg vaaljâpirrâduv kieldah ađai Maadâ-Vaarjâg, Uunjargâ, Čäcisuálui, Várgááh já Båtsfjord, ovdii Tiänu vaaljâpirrâduv kieldah ađai Tiänu, Berlevåg já Gamvik sehe Lebesby ovdii Porsaŋg vaaljâpirrâduvvâst.[2]
Ávjuvääri vaaljâpirrâdâh[mute | mute käldee]
Ávjuvääri vaaljâpirrâdâhân ađai vaaljâpirrâdâhân 2 kuleh ohtsis kulmâ kieldâ Finnmarkist.[1] Toos kuleh ovdiih Kárášjuv já Kuovdâkiäinu vaaljâpirrâduvah sehe Porsaŋg kieldâ ovdii Porsaŋg vaaljâpirrâduvvâst.[3]
Tavekuávlu vaaljâpirrâdâh[mute | mute käldee]
Tavekuávlu vaaljâpirrâdâhân ađai vaaljâpirrâdâhân 3 kuleh ohtsis 10 kieldâd, čiččâm Finnmarkist já kulmâ Tromsist. Vaaljâpirrâdâhan kuleh oovdii Alta/Kvalsund vaaljâpirrâduv kieldah Kvalsund, Hammerfest, Alta, Hasvik já Lappea, ovdii Porsaŋg vaaljâpirrâduv kieldah Tavenjargâ já Moseija já ovdii Tave-Tromsa vaaljâpirrâduv kieldah Kierua, Návuonâ já Raisi.[1][4]
Väričokkekuávlu vaaljâpirrâdâh[mute | mute käldee]
Väričokkekuávlu vaaljâpirrâdâhân ađai vaaljâpirrâdâhân 4 kuleh ohtsis 10 kieldâd Tromsist: Kaivuonâ, Omasvuonâ, Yykeä, Kalsa, Tromssa, Paccvuonâ, Målselv, Bardu, Senja já Raisivuonâ.[1] Ovdil ive 2020 vaaljâpirrâdâhân kullii meid Lenvik, Berg, Torsken já Tranøy kieldah.
Viestârmeerâ vaaljâpirrâdâh[mute | mute käldee]
Viestârmeerâ vaaljâpirrâdâhân ađai vaaljâpirrâdâhân 5 kuleh ohtsis 34 kieldâd. Vaaljâpirrâdâhan kuleh ovdii Tave-Tromsa, Koskâ-Tromsa já Maadâ-Tromsa vaaljâpirrâduvâi kieldah eereeb Raisivuonâ, mii kulá Väričokkekuávlu vaaljâpirrâdâhân.[5]
Maadâ-Säämi vaaljâpirrâdâh[mute | mute käldee]
Maadâ-Säämi vaaljâpirrâdâhân ađai vaaljâpirrâdâhân 6 kuleh puoh ovdii Maadâ-Säämi vaaljâpirrâduv kieldah, moh iä kuulâ vaaljâpirrâdâhân 5 ađai Nordland lääni kieldah, moh láá Ranast já Rødøyst máádás, Trøndelag lääni kieldah sehe Engerdal, Rendalen, Os, Tolga, Tynset já Folldal Innlandet läänist. Täi lasseen ovdii Maadâ-Taažâ vaaljâpirrâduv Surnadal já Sunndal kieldah Møre já Romsdal lääniist kuleh meid tááláá vaaljâpirrâdâhân.[6]
Maadâ-Taažâ vaaljâpirrâdâh[mute | mute käldee]
Maadâ-Taažâ vaaljâpirrâdâhân ađai vaaljâpirrâdâhân 7 kuleh puoh Taažâ kieldah, moh láá Trøndelagist máádás, eereeb Surnadal, Sunndal já Rindal Møre já Romsdalist sehe Rendalen, Os, Tolga, Tynset já Folldal Hedmarkist. Puoh eres kieldah kuleh Maadâ-Säämi vaaljâpirrâdâhân.[1]
Käldeeh[mute | mute käldee]
- ↑ 1,0 1,1 1,2 1,3 1,4 1,5 1,6 1,7 Lov om valg til Stortinget, fylkesting og kommunestyrer (valgloven) Lovdata. 16.6.2023. Čujottum 31.10.2023. (kirjetárukielân)
- ↑ Aslaksen, Eilif Andreas: 1. Nuortaguovllu válgabiire/Østre valgkrets 22.10.2008. NRK Sápmi. Čujottum 18.10.2023. (kirjetárukielân)
- ↑ Aslaksen, Eilif Andreas: 2. Ávjovári válgabiire/Ávjovári valgkrets 22.10.2008. NRK Sápmi. Čujottum 20.10.2023. (kirjetárukielân)
- ↑ Aslaksen, Eilif Andreas: 3. Davveguovllu válgabiire/Nordre valgkrets 22.10.2008. NRK Sápmi. Čujottum 21.10.2023. (kirjetárukielân)
- ↑ Aslaksen, Eilif Andreas: 5. Viesttarmeara válgabiire/Vesthavet valgkrets 22.10.2008. NRK Sápmi. Čujottum 31.10.2023. (kirjetárukielân)
- ↑ Aslaksen, Eilif Andreas: 6. Åarjel-Saepmie veeljemegievlie/Sørsamisk valgkrets 22.10.2008. NRK Sápmi. Čujottum 31.10.2023. (kirjetárukielân)