Suomâ luándusuojâlemlitto
Suomâ luándusuojâlemlitto adai SLL (suomâkielân Suomen luonnonsuojeluliitto) lii luándu maaŋgâhámásâšvuođâ, kilelis ovdánem, pirâssuojâlem já kulttuuräärbi kattim ovdedeijee väldikodálâš aalmugservi. Suomâ luándusuojâlemlitto vuáđudui vyesimáánu 21. peeivi 1938. Luándusuojâlemlitto lii Suomâ stuárráámus luándusuojâlemservi, já toos kuleh paijeel 28 000 jesânid. Persovnjesânij lasseen irâttâsah já seervih tuárjuh lito tooimâ toorjâ- já olgojesânin.
Historjá
[mute | mute käldee]Luándusuojâlemlito oovdâstmannee Suomâ luándusuojâlemservi vuáđudui vyesimáánu 21. peeivi 1938 Helsigist. Aalgâst tot lâi viehâ uccâ tieđâlâš servi. 1960-lovvoost servi muttui nuuvt, ete uđđâ jesâneh nubásmittii lito tooimâ vuáđujurduid. Talle tast šoodâi 'ubâ aalmug' servi, kuus kulâškuottii eenâb já eenâb meid eres ulmuuh, iäge tuše tietteeh já totkeeh. Ive 1969 Suomâ luándusuojâlemservi lohtui oohtân maaŋgâi eres luándusuojâlemservijgijn. Uđđâ lito nommân šoodâi Suomâ luándusuojâlemlitto.
Luándusuojâlemlito suojâlempargo áárvuh
[mute | mute käldee]Luándu kunnijâttem
[mute | mute käldee]Suomâ luándusuojâlemlitto oovded ohtsâškoddeest luándu já ton maaŋgâhámásâšvuođâ kunnijâttem já suojâlem. Olmooš lii uási luándu já ohtâ šlaajâ miljovnij juávhust, já tondiet ulmust lii kenigâsvuotâ suojâliđ luándu.
Ulmuu luándukoskâvuođâ siäluttem já nanodem
[mute | mute käldee]Suomâ luándusuojâlemlitto lasseen toimâmáin ibárdâs tast, ete luándu kuávdášlâš elementij já tooimâi suojâlem lii uáli tehálâš pargo já kuhes äigikooskâst suojâl meid ulmuid. Luándu feerimáin ulmuuh pyehtih hammiđ jieijâs ibárdâs tast, maggaar lii pyeri piirâs.
Tiervâslâš, torvolâš já makkuus eellimpirrâs kattim
[mute | mute käldee]Suomâ luándusuojâlemlito ulmen lii ulmuu tiervâslâš, torvolâš já makkuus eellimpiirâs. Litto oovded eennâmvuáđu, ááimu já čácáduvâi suojâlem sehe kättee enâduvâi já huksejum pirrâs áárvuid.[1]
