Metroidvania

Metroidvania lii toimâfiäráánspeelâi vyelišlaajâ. Šlaajâ ovtâstit jurduid Metroid já Castlevania -videospeelâin, moi mield tot lii finnim noomâs. Taan šlaajâ speelah ovtâstiteh távjá meiddei elementijd eres spellâšlaajâin tegu roguelike-speelâin já roolâspeelâin. Puoh tehálumos jiešvuotâ taan šlaajâ speelâin lii spellâmaailm. Ton puoh kuávluh láá ovtâstittum, já lii máhđulâš maccâđ puáris kuávloid. Jiešalnees spellee kalga maccâđ puáris kuávloid – teikâ tot lii aainâs-uv avžuuttettee – tastko spellee ij peesâ jyehi sajan aaibâs aalgâst. Taan šlaajâ speelâin láá estuuh, moi čoođâ spellee ij peesâ speelâ aalgâst já maid spellee puáhtá lekkâđ maŋeláá tastmaŋa ko sun lii finnim mottoom uđđâ naavcâ teikâ tiiŋgâ.

Pivnohis Metroidvania-speelah láá ovdâmerkkân Hollow Knight, Blasphemous, Bloodstained já Ori and the Will of the Wisps.