Wikipedia:Oho artikkâleh 2026

Oho artikkâleh
2023 – 2024 – 2025 – 2026

Oho artikkâleh láá anarâškielâlii Wikipedia ovdâsiijđoost lamaš artikkâleh, moh västideh šiev artikkâl tobdomeerhâid.

Vyelni ive 2026 oho artikkâleh.

1. okko

Niillas Holmberg (2025)

Niillas Holmberg teikkâ Jalvvi Anna-Liissá Niillas (š. syeinimáánu 2. peeivi 1990, Ucjuuhâ, Suomâ) lii sämmilâš tihtâčällee, kirječällee, musikkár, čaittâleijee, TV-jođetteijee já aktivist.

Jo škoovlâ ääigi Holmberg lâi ive 2009 valmâštum Yleisradio minirááiđust Lopun alku, mii muštâl vyevdičuoppâmčuolmâin Anarist. Siämmáá ive Holmberg jođetškuođij Yle pyevtittem sämikielâg Unna Junná -párnáiohjelm. Sun lii čaittâlâm eereeb iärrás Kuovdâkiäinust tuáimee Piäiváš Säämi Aalmugteatterist já lii lamaš sämikielâg párnáiohjelmist NRK:st Taažâ peln.

Holmberg elimist já määđhist jieijâslágán taidârin muštâleijee Soajálaččat-elleekove vuosâeehid lâi kuovâmáánu 2. peeivi 2013 Skammâkoveh-elleekovefestivaalist. Elleekove lii stivrim Ima Aikio-Arianaick.

Poppoo-juávhu jesânin 14-ihásâš Holmberg vuoitij ive 2005 Sámi Grand Prix-kišto lávlumuási pitáin Giella ii leat jáddan (anarâškielân Kielâ ij lah časkâm). Holmberg raahtij pitá saanijd já meid ráppái taid.

2. okko

Salla lii kieldâ Suomâst, Laapi eennâmkoddeest. Ive 2024 Sallast ääsih 3 285 olmožid, já ton vijđodâh lii 5 872,39 km², mast 142,64 km² lii čääci. Salla naaburkieldah láá Kiemâjävri, Kuáccám, Pelkosnjargâ, Posio já Suovâkuoškâ.

Salla vuáđudui ive 1857.

Salla jieŋâjävri šoodâi rusomáin moonnâm jieŋâääigi maŋa suulân 10 500 ihheed tassaaš. Vuossâmuuh ulmuuh pottii kuávlun talle. Ovdâhistorjálâš aassâm čokkâšui jaavrij já juuvâi riddoid. Puárásumos tobdos aassâmsaje lii Kenttälampi alda, já tot lii 7 000 ihheed puáris.

Kieldâ koskâčuákkipäikki lii Salla kirkkosijdâ. Stuárráámuuh siijdah láá Kursu, Salmivaara já Saija. Kelloselkäst lii almugijkoskâsâš rääjirastaldittemsaje. Salla lii tobdos maađhâšmist, mut meid ollâ pargottesvuođâst. Sallatuoddâr mađhâšemkuávdáš já Salla Wilderness Park (oovdiš Poropuisto teikkâ Puásuimuorâstâh) sehe Salla, Oulanka já uási Värrio aalmuglâšmeecijn láá meid Sallast. Väldikodálâš UKK-vandârdemkiäinu jotá meid Salla peht. Tuntsa meccikuávlu lii Tave-Sallast.

3. okko

Eva Magdalena Andersson (š. uđđâivemáánu 23. peeivi 1967 Uppsala, Ruotâ) lii ruátálâš politikkár. Sun lii Ruotâ sosialdemokraatlâš piäláduv saavâjođetteijee. Toos lasseen sun lii lamaš Ruotâ uáiviminister ive 2021 rääjist já staatâ vuossâmuš nissoonuáiviminister.

Suu eeči lâi ruátálâš lehtor Göran Andersson, kii máttááttij statistiik Uppsala ollâopâttuvvâst. Suu enni lii ruátálâš amnâsmáttáátteijee Birgitta Granell Andersson. Magdalena lii sunnuu áinoo páárnáš.

Roovvâdmáánu 3. peeivi 2014 Andersson nomâttui Ruotâ staatâvarijminister viirgán Löfven haldâttâsân. Sun tooimâi taan virgeest ton räi ko sun väljejui Ruotâ uáiviministerin skammâmáánust 2021.

Skammâmáánust 2021 Andersson väljejui Ruotâ sosialdemokraatlâš pargeipiäláduv saavâjođetteijen. Sun lii nubbe nissoon, kii lii toimâm taan virgeest piäláduv historjá ääigi.

4. okko

Amurleopard

Amurleopard (Panthera pardus orientalis) lii leopard vyelišlaajâ. Eŋgâlâskielân amurleopardist láá noomah "Amur leopard", "Siberian leopard", "Far Eastern leopard" já "Korean leopard". Suomâkielân tot lii "amurinleopardi".

Nuorttâ-Ruošâst amurleopard iälust kuávlust, mii lii 7 000 km² vijđosâš. Tot lii hárjánâm kolmâ šoŋŋâdâhân. Amurleopard jotá enâmist nuubán Ruošâst, Kiinast já máhđulávt meiddei Tave-Koreast. Oovtâ amurleopard eellimkuávlu lii táválávt 5 000–30 000 ha viijđes, já vijđodâh lii kiddâ ton avveest, suhâpeeleest já peerâstuáruduvâst. Eellimkuávlu sáttá leđe joba 100 km² viijđes talle ko salâselleeh tegu kyeppirkozzâliih láá uccáá.

Kiinast amurleopard kovvejui pivdokamerain vuossâmuu keerdi ive 2010 Hunchun aalmuglâšmeecist Changbai váráduvâst. Tobbeen láá sehe lostâvyevdih já kuácceevyevdih, moh láá 600–1 200 meetter aloduvâst, já ive koskâliegâsvuotâ lii suullân 1,5 °C. Kiina eres kuávluin amurleopard tiättoo iänáážin tuárispeln leijee aalmuglâšmeecijn.

5. okko

Čiđđâ

Fluori lii algâaamnâs, mon kemiallâš merkkâ lii F (fluor) já oornigloho 9. Fluori lii halogeen já rijjân mirhâlâš, kuovgisfiskis kaasu, mast lii časkelis haajâ. Fluori lii reaktiivlumos algâaamnâs.

Fluori lii halogeen ađai tast láá čiččâm olgoelektronid já ohtâ elektron vááijuv okteetist ađai elektronij energiaminimist. Fluori ij lah reaktiivlâsvuođâs tiet luándust kuássin putesin, mut ain ovtâstuvâin hapittemlovvoost -I. Rijjân tot tiättoo fluorimolekyylin F₂. Fluori elektronegatiivlâšvuotâ 3,98 lii puoh stuárráámus já tot puáhtá sopâvâš tiileest rähtiđ ovtâstuvâid joba jálukaasuiguin. Algâamnâsijn kloori, typpi já happi iä räähti ovtâstuvâid fluorijn.

Fluori lii visteliegâsvuođâst fiskis kaasu. Fluorist lii jiešvuođâlâš haajâ, mon puáhtá huámmášiđ uáli vyeligis nalliisvuođâst. Olmooš puáhtá huámmášiđ jo 20 nmol/l nalliisvuođâ. Fluori saahâdvuotâ lii 1,696 g/l ađai tot lii váhá sahâdub ko áimu. Ton tuoldimčuogâstâh lii -182 já suddâmčuogâstâh -220 °C.

6. okko

Kuovdâkiäinulâš Rasmus Josefsen Utsi peskâ pajalist ive 1884.
Kove: Prince Roland Bonaparte

Peskâ (nuorttâlâškielân piâckk, orjâlâškielân beaska já suomâkielân peski) lii vyesi- tâi čiermihnaahkijn koorrum tälvipiivtâs. Vyesinaahkijn koorrum peskâ kočoduvvoo purgâpeskân. Jis peskâ vuod kuárroo čiermihnaahkijn, te tot kočoduvvoo čiermihâtpeskân.

Peskâ lâi vijđáht aanoost 1800-lovvoost já čuávuváá ihečyeđe aalgâst, mut ton kiävttu kiäppánij kuuloold 1900-lovvoost eromâšávt nube maailmsuáđi maŋa. Peskâ kiävttoo ain-uv, veikkâ tot álgá leđe tááláin anarâšâin härvinâš. Onnáá peeivi kiälkkáhaalareh láá puáttám ärbivuáválii peeskâ argâkiävtu sajan.

Peskâ tollui táválávt kiävtust ton räi ko tast lâi šoddâm šišnelum spálččá. Talle tot kevttui iänááš pääihist tälvipivtâsin. Motomeh pieijii spáálčá pajalân meiddei keessiv – eromâšávt iho kuáláástdijnis teikâ jis lâi čuáskidâm.

7. okko

Vuovdâkuoškâ škovlâ

Vuovdâkuoškâ škovlâ, ovdil Vuovdâkuoškâ aalmugškovlâ (orjâlâškielân Vuovdaguoikka skuvla, ovdil Vuovdaguoikka álbmotskuvla) lâi škovlâ Savonist, Vuovdâkuoškâst, Ucjuuvâst iivij 1885–2002. Skoovlâst já máttáátteijein láá lamaš eromâš stuorrâ vaikuttâs Orjâlâškielâg čaabâkirjálâšvuotân.

Ive 1873 Ucjuv pitejâščuákkim meridij vuáđudiđ kulmâ aalmugškovlâ Ucjuuhân: Ucjuv markkânân, Vuovdâkuoskân já Njuárgámân. Vuossâmuš aalmugškovlâ vuáđudui ive 1878 Ucjuv markkânân. Aalgâst škoovlâst lijjii 22 uápped.

Čuávuvâžžân meridui vuáđudiđ Vuovdâkuoskâ škoovlâ. Ruávvást Jonathan Gummerus oostij škoovlâ várás kyehti stuorrâ eennâmpitá já staatâ adelij ruuđâid máttáátteijee várás. Čohčuv 1885 Vuovdâkuoškâ škovlâ vuáđudui uccâ tuše 35 m² rukkoosviistán. Čuávuváá ive škovlâ sirdui eđâbiššáá viistán já ive 1889 nubbáá, uđđâ škovlâviistán.

8. okko

Kunâgâspingviin

Kunâgâspingviin (Aptenodytes patagonicus) lii pingviinšlaajâ. Kunâgâspingviinist láá kyehti vyelišlaajâ: A. p. patagonicus já A. p. halli.

Kunâgâspingviin lii nubben stuárráámus pingviinšlaajâ kiäisárpingviin maŋa. Kunâgâspingviineh láá 70–100 cm kuheh, já toh teddih 9,3–18 kg. Oráseh láá váhá stuárráábeh ko niŋálâsah. Kunâgâspingviinij nierah láá oranseh, já selgi lii räänis. Kunâgârspingviinij njune lii kuhheeb já njuolgâdub ko kiäisápingviinijn. Kunâgâspingviinijn láá meiddei stuárráábeh suájáh já jolgâdub roppâ.

Kunâgâspingviineh tiättojeh Antarktis taavaapiäláin suolluin, Atlant já India väldimeerâin já Kuálhismeerâst. Kunâgâspingviineh iälusteh eereeb iärásij Falklandsuolluin, Kerguelensuolluin, Prinssâ Edward suolluin, Crozetsuolluin já Maadâ-Georgia suáluikuávlust. Ton lasseen kunâgâspingviineh láá oinum Maadâ-Afrikist, Australiast já Uđđâ-Seelandist.

9. okko

Anu Kaaja (š. 1984 Tampere, Suomâ lii syemmilâš kirječällee já kietâčällee. Sun čáálá suomâkielân.

Kaaja valmâštui medianomin Tampere áámmátollâškoovlâst. Tast maŋa sun luvâškuođij elleekuuvij kietâčäällim Salford ollâopâttuvvâst, mast sun maŋeláá valmâštui taiđuu maisterin. Helsigist sun luuvâi kreatiivlii čäällim Kriittisii ollâškoovlâst. Tobbeen sun čäliškuođij vuossâmuu kirjees Muodonmuuttoilmoitus.

Kaaja vuossâmuš kirje Muodonmuuttoilmoitus lii ive 2015 almostum surrealistisâš nooveelčuágáldâh. Kirje lâi iävtukkâssân siämmáá ive Helsingin Sanomat -kirjálâšvuotâpalhâšumán, mii mieđettuvvoo ive pyeremuu suomâkielâg vuosâkiirján. Kirje poođij nubben já finnij kunneemainâšume. Čuávuváá ive kirje lâi iävtukkâssân Mahdollisen Kirjallisuuden Seura -palhâšumán-uv, mut ij vuáittám. Ive 2017 siämmáš kirje lâi oppeet iävtukkâssân, taan keerdi Jarkko Laine -palhâšumán. Taam palhâšume kirje vuoitij-uv.

10. okko

Muusikmuseo Fame já siämmáánommâsii raavâdviäsu olgouuvsah

Muusikmuseo Fame (suomâkielân Musiikkimuseo Fame, ruotâkielân Musikmuseet Fame já eŋgâlâskielân Finnish Music Hall of Fame) lâi čohčuv 2019 lekkum muusikmuseo kävppikuávdáš Triplast, koskâ-Pasilast, Helsigist, Suomâst. Fame lâi vuossâmuš syemmilii museo, mii kieđâvušâi syemmilâš muusik vijđásávt šlaajâst peerusthánnáá. Muusikmuseo lopâttij toimâidis vyesimáánu 8. peeivi 2024.

Tukholmast, Ruotâst leijee ABBA: The Museum lâi tehálâš inspiraatio käldee, mut muusikmuseo Fame lâi interaktiivlub ko ruátálâš museo. Taan tááhust muusikmuseo Fame lâi pyerebeht-uv siämmáálágán ko Ragnarock, Tanskaast já Rockheim-museo, Ruándimist, Taažâst, moh lijjii meid Fame inspiraatio käldeeh.

Kuhháá ij lamaš visesvuotâ tast, et finnee-uv museo tuárvi ruuđâ suulân 4,5 miljovn euro budjetsis. Museo vuáđudui iänáážin priivaatruttâdmáin, mut sehe Helsig kaavpug já Suomâ staatâ meid ruttâdii tom. Neelji ive vuávám maŋa museo lekkui roovvâdmáánu 17. peeivi 2019 ađai siämmáá peeivi ko kävppikuávdáš Tripla-uv.

11. okko

Jack Lemmon (1968)

Jack Lemmon ađai John Uhler Lemmon III (8. kuovâmáánu 1925 Newton, Massachusetts, Ovtâstum staatah – 27. kesimáánu 2001 Los Angeles, Kalifornia, Ovtâstum staatah) lâi ovtâstumstaatâlâš čaittâleijee, stivrejeijee já pyevtitteijee. Sun lii vuáittám maaŋgâid palhâšuumijd, ovdâmerkkân kyehti Oscar-palhâšume já maaŋgâid Golden Globe -palhâšuumijd. Ive 1988 American Film Institute palhâšij Jack Lemmon Life Achievement Award -palhâšuumijn, já ive 1991 American Comedy Awards palhâšij suu Lifetime Achievement in Comedy -palhâšuumijn.

Jack Lemmon šoodâi Massachusettsist, jiešalnees Newton-Wellesley pyecceeviäsu hiisist. Suu enni lâi Mildred Burgess LaRue Noel Lemmon já suu eeči lâi John Uhler Lemmon Jr. Jack eeči lâi muŋkkisiärvus toimâttâshovdâ. Jack vanhimij näimilitto lâi uáli nirráá, já tot vaiguttij sunjin. Jack lâi perruu áinoo páárnáš.

Jack Lemmon lávdástij vuosmuu tove jo neelji-ihásâžžân. Sun lávdástij ejijnis, kiän puđâldâsah lijjii tánssám já lávlum.

12. okko

Stuorrâkaavrâs

Stuorrâkaavrâs (Cervus elaphus) lii jálukavrâsij vyelihiäimun kullee kavrâsšlaajâ.

Stuorrâkaavrâs lii soorvâ, vaapiit já sambar maŋa niäljádin stuárráámus sorvâelleešlaajâ. Stuorrâkavrâsores tiäddá 160–240 kg, mutâ tot sáttá teddiđ joba 340 kg. Niŋálâsah láá ucebeh, já toh teddih suullân 120–170 kg. Tiäddu kuittâg mulsâšud ennuv vyelišlaajâi kooskâst. Stuárráámus vyelišlaajâ lii Cervus ephalus ephalus. Ton oráseh teddih joba 500 kg. Ucemus vyelišlaajâ vist lii Cervus ephalus corsicanus, mon ohtâgâsah teddih 80–100 kg.

Stuorrâkavrâs turkkâ lii keessiv ruopsisruškâd. Čohčuv puoh vyelišlaajah šoddâdeh assab tuurhâ täälvi várás. Tälviv vyelišlaajâi tuurhâ ivne mulsâšud eenâb ko eres iveaaigij: Euroop vyelišlaajâin lii ränisruškis tälviturkkâ, já ovdâmerkkân kaspiastuorrâkavrâsist lii ránásub turkkâ. Vuosijn láá aalgâst tiälhuh, mutâ toh láppojeh keesi ääigi. Motomijn ohtâgâsâin tiälhuh iä kuittâg lappuu kuássin.

13. okko

Ruth Mabel Arthur Huggins, motomin puástud čallum häämist Higgins (vyesimáánu 26. peeivi 1905 Lanark, Glasgow, Skotland – njuhčâmáánu 6. peeivi 1979) lâi skotlandlâš máttáátteijee já kirječällee. Suu kirjeh almostuvvii noomáin Ruth M. Arthur, mii lâi suu jieijâs suhânommâ ovdil ko sun naajâi. Arthur čaalij iänááš párnái- já nuorâikiirjijd. Sun čaalij eŋgâlâskielân.

18-ihásâžžân Arthur jođeškuođij Froebel Training College Roehamptonist, Lontoost. Talle almostuvvii motomeh novelleh, maid sun lâi čáállám. Kulmâ ive maŋeláá ađai ive 1926 sun valmâštui ovdâškovlâmáttáátteijen. Valmâštum maŋa sun maacâi Glasgowân, kost sun tooimâi ovdâškovlâmáttáátteijen Laurel Bank -škoovlâst kulmâ ive. Ive 1930 sun varrij Loughtonân, Essexân, Eŋlandân, kost sun máttááttij páihálii luvâttuvvâst ive 1932 räi.

Ive 1967 Requiem for a Princess väljejui Ovtâstum staatâi kongres kirjerááju párnáikirjálâšvuođâ kuávdáš kirjen luokkaast Mainâseh puárásub kandáid já nieidáid. Tot lii maainâs nuorâ nieidâst, kiän nommâ lii Willow. Sun poođij tiettiđ naharij peht, ete sun lii adoptistum. Naharáid iiđij táálu oovdiš ässee Isabel.

14. okko

Algeria lippu

Algeria, virgálávt Algeria demokraatlâš aalmugtäsiväldi, lii staatâ Afrikist. Ton uáivikaavpug lii Alger.

Algeria vijđodâh lii 2 381 740 miljovn km², mast 0 km² lii čääci. Vijđoduv mield Algeria lii maailm 11. stuárráámus staatâ já Afrik stuárráámus staatâ, mutâ paijeel nelji viiđâduási tast kuleh Sahara ävđinenâmân.

Algeria lii staatâ Tave-Afrikist. Ton ránnjástaatah láá tavenuorttân Tunisia, nuorttân Libya, maadânuorttân Niger, maadâviestârist Mali já Mauritania sehe uárjin Marokko. Toos lasseen uárjin lii Viestâr-Sahara. Algeriast staatârääjih láá ohtsis 6 734 km. Kuhemus rääji lii rääji Marokkoin, mii lii 1 941 km. Uánihumos rääji vist lii 460 km rääji Mauritaniain. Algeria rájášuvá tavveen Koskâmeerân. Merâriddo lii ohtsis 998 km.

15. okko

Petteri Orpo ive 2025

Antti Petteri Orpo (š. skammâmáánu 3. peeivi 1969, Köyliö, Suomâ) lii syemmilâš politikkár. Orpo lii lamaš Aalmuglâš Kokoomus saavâjođetteijee ive 2016 rääjist, já sun lii lamaš Suomâ uáiviministerin kesimáánu 2023 rääjist.

Petteri Orpo lii šoddâm Köyliöst, Satakuntast. Sun pajasšoodâi táálunkuávlust Vuorenmaa-nommâsii siijdâst. Sust láá kyehti stuorrâuábi. Suu vanhimeh lává máttáátteijeeh. Suoi porgáin máttáátteijen siämmáá vyeliškoovlâst kost Orpo juuđij párnážin.

Orpo valmâštui pajeuáppen Säkylän seudun lukio -nommâsii luvâttuvâst ive 1989, já ton maŋa sun čođâlditij suátipalvâlus Parolannummi suátiviehâsaajeest. Sun lii jieš ettâm, ete sun makkui suátipalvâlusâst já viekkiistâlâi Eennâmpiäluštâsollâškoovlân (suomâkielân Maanpuolustuskorkeakoulu) uuccâm.

16. okko

Bengaltiiger

Bengaltiiger teikâ indiatiiger (Panthera tigris tigris) lii tiiger vyelišlaajâ. Tot lii uhkevuálásâš, já luándust eelih suullân 4500 bengaltiigerid.

Bengaltiigerores tiäddá 200–260 kg, já niŋálâs 110–180 kg. Bengaltiiger kukkodâh njuuneest seibikiäčán lii orásijn 280–310 cm já niŋálâsâin 250–280 cm. Seibi lii suullân meetter kukkosâš ađai seibittáá bengaltiiger lii suullân kyevti meetter kukkosâš. Ores lii tuše váhá stuárráb ko niŋálâs. Sevealodâh lii váhá paijeel meetter.

Bengaltiiger turkkâ lii fiskâd teikkâ kuovgisooraans, já tast láá čapis teikkâ tevkisruškis sárgáh. Čuávji já ruovjij sisuásih láá vielgâdeh. Tiättojeh meiddei tagareh bengaltiigereh, moi turkkâ lii vielgâd ige ooraans. Vielgis tiigereh kočoduvvojeh "rewatiigerin". Rewatiigerij sárgáh láá ruškâduboh ko bengaltiigerij sárgáh. Suijân tuurhâ vielgâdvuotân lii ruopsis pigment váilum.

17. okko

Anna Lumikivi (2018)

Anna Lumikivi-Lemmetty (j.s. Anna Lumisalmi, nuorttâlâškielân Siʹrǧǧi Ääʹrhep Äʹnn; š. 1987 Avveel) lii nuorttâlâš lávloo, leuddajeijee, musikkár já kulttuurpargee Avelist.

Lumikivi já Hanna-Maaria Kiprianoff leuddav Suõmmkar-muusikjuáhust. Lumikivi lâi mieldi meiddei ive 2021 almostum singlest Äʹvvceeʒʒaž artistnoomáin Äʹnn. Pittá lii rahtum oovtâst Pauliina Feodoroffáin já Tiina Sanila-Aikioin. Nuotâsteijen pittáást lâi Mio Negga Ruotâbeln Säämist.

Ive 2019 Lumikivi uásálistij Sámi Grand Prix-kiišton pittáin Mõõn tiõrvân, moos sun raahtij sehe nuotâ já lavluu saanijd. Ive 2024 Lumikivi uásálistij The Voice of Finland-rááiđu 13. pajan. Algâvuárust sun láávlui Tiina Sanila nuorttâlâškielâg pitá Ton <3 Mon. Välmejeijein Maija Vilkkumaa, Arttu Wiskari já Elastinen halijdii Lumikivi jieijâs juávkun, já te sun peesâi juátkiđ. Lumikivi lii vuossâmuš olmooš, kii lii kuássin lávlum The Voice of Finlandist nuorttâlâškielân.

18. okko

Ghana lippu

Ghana, virgálávt Ghana täsiväldi (eŋgâlâskielân Republic of Ghana), lii staatâ Afrikist, Guinealuovtâ riddoost. Ton uáivikaavpug lii Accra. Ghana nommâ meerhâš "suátikunâgâs" soninkekieláin.

Ghana lii staatâ Viestâr-Afrikist, Guinealuovtâ riddoost. Ton nuorttiibeln lii Togo, tavveen Burkina Faso já viestârist Elefanttähtiriddo. Mäddin Ghana rájášuvá Atlant väldimeerân. Merâriddo lii ohtsis 539 km.

Peeivitäsideijee aldavuotâ taha tom, ete Ghanast lii trooppisâš šoŋŋâdâh. Tavveen lii liegâs já viehâ koške, mäddin oppeet kume já laavtâs. Meccikuávluh väldih 21 % Ghana vijđoduvvâst. Mäddin já viestârist lii arvemecci, tavveen eenâb saavaan. Ghanast lii suulân 736 km² stuárusâš Mole aalmuglâšmecci, mii lii luándusuojâlemkuávlu.

19. okko

Haakon VII

Haakon VII (š. porgemáánu 3. peeivi 1872 Charlottenlund paalaac, Kööbenhaammân, Tanska – čohčâmáánu 21. peeivi 1957 Oslo, Taažâ) lâi Taažâ kunâgâs iivij 1905–1957. Haakon VII šoodâi kunâgâssân ovdil ko vistig suu eeči Frederik VIII já talle stuorrâviljâ Christian X šoddáin Tanska kunâgâssân.

Christian Frederik Carl Georg Valdemar Axel šoodâi porgemáánu 3. peeivi 1872 vaanhimijdis kesipääihist Charlottenlund palacist, mii lii Kööbenhaammân taavaapeln, Tanskaast. Sun lâi tallaa Tanska ruuvnâprinssâ Frederik (maŋeláá Tanska kunâgâs Frederik VIII) já Ruotâ prinses Lovisa (maŋeláá Tanska roonnig Lovisa) nubbe páárnáš.

Syeinimáánu 22. peeivi 1896 Tanska prinssâ Carl já prinses Maud naajáin Buckingham Palacest ubâ suuvâ oovdâst. Suoi varrijn heejâi maŋa Kööbenhamânân, tastko prinssâ Carl lâi Tanska kunâgâslij merâvuoimij upseer. Suoi aasáin iänááš Tanskaast ive 1905 räi.

20. okko

Nemo (2024)

Euroviisuh-lávlumkišto 2024 lâi 68. kerdi, ko lávlumkišto uárnejui. Kišto uárnejui Malmöst, Ruotâst tondiet ko Ruotâ ovdâsteijee Loreen vuoitij ive 2023 kišto, ko sun finnij finalist 583 čyegisid pitástis Tattoo. Ko Loreen vuoitij ive 2012 Euroviisuh-lávlumkišto, te čuávuváá ive Euroviisuh uárnejuvvojii meid Malmöst. Malmö Arenast meid uárnejui Ruotâ Melodifestivalen 2023 4. uásikišto, mon vuoitij Loreen ovdilgo sun vuoitij ubâ festivaal já peesâi ovdâstiđ Ruotâ ive 2023 Euroviisuin.

Sveeici ovdâsteijee Nemo finnij finalist 591 čyegisid pitástis The code já vuoitij kišto. Sun finnij aalmugijkoskâsijn raađijn 365 čyegisid já telejienâstmist 226 čyegisid. Kroatia ovdâsteijee Baby Lasagna poođij nubben, ko sun finnij finalist 547 čyegisid.

21. okko

Muotâleopard

Muotâleopard (Panthera uncia) lii Koskâ-Aasia váráduvâin iälusteijee kissáelleešlaajâ.

Muotâleopard lii váhá ucceeb ko eres Panthera-šlaajah. Tot lii 91–130 cm kukke, já ton sevealodâh lii suullân 56–66 cm. Muotâleopard seibi lii suullân 80–105 cm kukke. Ores tiäddá táválávt 45–55 kg, mutâ tot puáhtá teddiđ joba 75 kg. Niŋálâs vist tiäddá suullân 35–40 kg.

Muotâleopard turkkâ lii vielgissiähá teikkâ räänis, já seelgist, ertpeeleest já seeibist láá čapis tiälhuh. Turkkâ lii saahâd, já soksâmeh láá suullân 5–12 cm kukkosiih. Muotâleopard čuávjivuálááš lii vielgâd.

Muotâleopard piergee kolmâ kuávluin já váráduvâin maaŋgâi adaptaatioi áánsust. Ton peeljih láá uceh já jurbâseh, nuuvt ete toi peht ij lappuu ennuv liegâsvuotâ. Muotâleopard kubdâ kepileh išedeh muottuu alne väzzimist, já kepilij assaas turkkâ iästá liegâsvuođâ lappum. Kuhes já sojelis seibi iššeed talle ko muotâleopard kuárŋu kiäđgáás soojijn. Seibi lii viehâ kossuv, tastko toos vyerkkejuvvoo pyeidi.

22. okko

Roland TB-303 ovdâpaaneel

Roland TB-303 Bass Line (tobdoo meid noomáin 303) lii bassosyntetisaattor, mon Roland Corporation almostitij ive 1981 já valmâštij ive 1984 räi.

Roland TB-303 sundáttâlâi Tadao Kikumoto. Tot lii sundáttâllum bassokitarij ađđiistâlmân, mut ton jienâ ij sulâstit ollágin bassokiitaar. Tast lii ohtâ analogâlâš oskillaator (VCO), mii pyevtit jo-uv sááhá- tâi neljihâšpárusignaal. Taan maŋa signaal jotá 24 dB/oktaav jienâsillee (LPF) čoođâ, maid stivree lijnekavregeneraattor. Čuojânist lii meid oovtâkiärdánis sekveensser. Sekveensser ohjelmistem lâi hiđes já vaigâd, já tot ij iššeed, et ruustig fáárust lâi tuše raavâkirje jaapaankiellân. Tai suujâi tiet TB-303 vuobdui hyeneest, já Roland Corporation lopâttij ton valmâštem. Tuše 10 000 pittád valmâštuvvojii. Roland Corporation vuobdij majemuš čuojânâsâid hälbis hodijguin.

23. okko

Haslumseter kappel

Haslumseter kappel lii ive 1969 kiävtunvihkum valastâllâmkappel Bærumsmarkast, Bærumist, Taažâst. Tom vuávái taažâ arkkiteht Magnus Poulsson, kii jaamij ive 1958 ovdil ko kappel huksim aalgij. Suu alge Anton Poulsson tooimâi ovdâsvástádâslâžžân arkkitehtin huksim ääigi.

Huksiittâs vuáđukeeđgi muvrái pispe Johannes Smemo roovvâdmáánu 22. peeivi 1967. Tilálâšvuođâst lijjii paijeel 1 000 olmožid. Täkkitupe valmâštui vistig, já tom viihkâi kiävtun kuovâmáánu 9. peeivi 1969 pappâ Kaare H. Skollerud. Tobbeen tuállojii immeelpalvâlusah ton räi, ko kappeltupe valmâštui ive 1969. Pispe Fridtjof Birkeli viihkâi muorâkappel kiävtun čohčâmáánu 21. peeivi 1969.

Kappel lii rahtum salvum hirssâkeerdijn. Tot lii 10 m kubduv já 12 m kukke. Kappel kuori lii 5 m kubduv já 6 m kukke ađai kappel vijđodâh lii 150 m2. Huksiittâsâst láá kyehti eresstuárusâš tuve: ucceeb täkkitupe já stuárráb kappeltupe. Kappelist lii meid vyelikerdi, kost láá el. riišâ, hiivsigeh já molsomviste. Tuuvij kooskâst láá kiällutornâ. Kappelân čäähih siämmáá ääigi suulân 300 olmožid.

24. okko

Paulette Goddard

Paulette Goddard (š. Marion Pauline Levy; 3. kesimáánu 1910 New York – 23. cuáŋuimáánu 1990 Ronco sopra Ascona, Ticino, Sveicci) lâi ovtâstumstaatâlâš čaittâleijee. Suu tobdeh eromâšávt nissoonuáiviroolâ čaittâleijen Charlie Chaplin elleekuuvijn Modern Times (1936) já The Great Dictator (1940). Sun lâi meid Chaplin kuálmád kálgu.

Goddard šoodâi ive 1910 New Yorkist noomáin Marion Pauline Levy, mutâ suu enni Alta Mae Goddard kočodij suu Paulinen jo aaibâs uccen. Suu eeči lâi juuvdálâš Joseph Russell Levy. Vanhimeh iäránáin ko Goddard lâi ucce, já tast maŋa suu eeči ij eidu lam uási suu eellim.

Goddard poorgâi mallin nubálovihásâžžân, já 16-ihásâžžân sun lâi kuoronieidân Broadway čaitâlmist No Foolin’. Muáddi ive maŋeláá sun varrij Hollywoodân aaigân šoddâđ elleekovetäsnin. Tobbeen sun čaittâlij motomijn ucebijn projektijn, ko Charlie Chaplin huámášij suu. Forgâ, ovdilgo Goddard lâi ubâ lamaš merhâšittee roolâst oovtâgin elleekooveest, ulmuuh tubdii suu jo Chaplin peht.

25. okko

Veepsis

Viäpsáh (Vespidae) láá segisaaleemlij vyelilaahkon (Apocrita) kullee čuággoohiäimu. Hiäimun kuleh sosiaalliih ohtsâškoddeviäpsáh, moi vyelihiäimuh láá Vepsinae já Polistinae, sehe maaŋgah ohtuunisorroo ađai erakkovepsisjuávhuh. Vepsisšlaajah láá paijeel 4 000, mut hiäimu raijiimist láá kuittâg sierâlágán uáinuh.

Viäpsáh láá mirkkâčuággooh (Aculeata), main láá mirkkâsäägih, mut nubenáál ko mietâmiäđušijneh, toh iä táválávt jäämi ko čyeggejeh ulmuu. Motomin mirkkâsäggi sáttá kuittâg pääcciđ ulmuu liiškán kiddâ já talle veepsis jáámá

Ohtsâškoddeviäpsáh rähtih kuáđis eennâm siisâ tâi muorâuáksán.Viäpsá suovsah poreh eres tiivrijd já pargeeviäpsáh kirdeh-uv ohtânmaanoost ucâmin saallâs, mon toh koddeh vievsâs uálujijdiskuin já tuálvuh suovsáid. Rävis viäpsáh herskusteleh kukái mieđáin. Ohtsâškoddeest tálvástâl tuše kunâgâtâr já tondiet viäpsáh iä nuurâ mieđâ kuátán täälvi várás, tegu mietâmiäđušijneh.

43. okko

Amoc Riddu Riđđust 2022

Amoc (Mikkâl Antti Morottaja ađai Kuobžâ-Saammâl Maati Mikkâl, š. juovlâmáánu 24. peeivi 1984, Aanaar, Suomâ) lii anarâš ráppájeijee. Nommâ Amoc puátá saanijn Aanar Master of Ceremony (Aanaar seremoniamiäštár). Amoc lii šoddâm tobdosin tast, et sun ráppáá anarâškielân. Sun keikkaastâl tyellitälli pirrâ Säämi já motomin meid Maadâ-Suomâst.

Amoc ráppááškuođij 1990-lovvoost. Sun raahtij vistig muáddi pitá suomâkielân, mutâ luvâttuvâst meridij molsođ kielâ anarâškielân. Sun lâi vuossâmuš, kote ráppááškuođij anarâškielân, já sáttá leđe, ete meid vuossâmuš sämikielâlâš ráppájeijee ubânâssân.

Amoc vuossâmuš single "Šaali" almostui juovlâmáánu 13. peeivi 2006. Suu vuossâmuš studioalbum Amok-kaččâm, mii siskeeld single "Šaali", almostui kuovâmáánu 6. peeivi 2007. Skiäru pyevtittij Tuupa Records.