Vinokino

Vinokino lii ive 1991 vuáđudum syemmilâš elleekovefestivaal, mon Tuurku Seta (TuSeta) uárnee jyehi ive čohčâ-roovvâdmáánust. Vinokinost čáittojeh tagareh elleekoveh, moh muštâleh seksuaal- já suhâpeliucceeblovoi mainâsijd. Aalgâst festivaal uárnejui tuše Tuurkust, mut maŋeláá tot lii vijđánâm meiddei eres kaavpugáid tegu Helsigân, Oulun, Jyväskylän já Tamperen. Toos lasseen Vinokino lii távjá fáárust jieškote-uvlágánijn pride-tábáhtusâin Suomâst noomáin Pridekino.

Historjá

Ive 1991 TuSeta ávudij 20 ive pargoos já tooimâs já meridij orniđ muáddi kulttuurtábáhtus ton kunnen. Proojeektčällee Hannele Lehtikuusi iävtuttij, ete TuSeta puávtáččij meiddei čäittiđ lesbo- já homoelleekuuvijd, já te Suomâ vuossâmuš lesbo- já homoelleekovefestivaal uárnejui Tuurkust čuávuváá ive cuáŋuimáánu 22.–24. peeivi noomáin Lesbo- ja homoelokuvan & kulttuurin tapahtuma.

Festivaal nommâ lii mulsâšum maŋgii iivij mield. Vuossâmuš nommâ Lesbo- ja homoelokuvan & kulttuurin tapahtuma kevttui ive 1994 festivaal räi. Ive 1995 festivaal nommâ muttui Pervoplanetin. Festivaal uárnejeijeeh lijjii keččâlâm jurgâliđ queer-sääni suomâkielân, mut ko toos ij kávnum šiev jurgâlus, te sij meridii kevttiđ pervo-sääni. Festivaal kolliistâllei mielâst tot ij kuittâg heivim queer-sääni jurgâlemvaastân, já te sij iävtuttii, ete uđđâ nommâ väljejuuččij nommâkišto peht. Enâmustáá jienâid uážui nommâ Vinokino, já te tast šoodâi festivaal nommâ ive 1998.