Sunita Williams
Sunita Lyn "Suni" Williams (j.s. Pandya; čohčâmáánu 19. peeivi 1965 Euclid, Ohio, Ovtâstum staatah) lii ovtâstumstaatâlâš astronaut já iäláttâhân pááccám Ovtâstum staatâi merâvuoimij upseer.
Eellim
[mute | mute käldee]Sunita Lyn Pandya šoodâi čohčâmáánu 19. peeivi 1965 Euclidist, Ohiost.[1] Suu eeči lâi indialâš-ovtâstumstaatâlâš neuroanatomist Deepak "Dee" N. Pandya (1932–2020), já suu enni lii Ursuline "Bonnie" Pandya (j.s. Zalokar; 1943–).[2][3] Sunita lii perruu nuorâmus. Sust lii stuorrâviljâ Jay Thomas (1961–) já stuorrâuábbi Dina Annad (1962–).
Komovuotâmätki iivij 2024–2025
[mute | mute käldee]Sunita Williams já Barry Wilmore vuolgijn komovuotâsajattâhân algâalgâlávt tuše käävci piäiván Boing Starliner -rakettáin kesimáánu 5. peeivi 2024. Teknisij vädisvuođâi keežild Starliner ij lamaš innig tuárvi torvolâš maccâmân, nuuvt et NASA miärádâs keežild astronautkyevtis passijn kuhheeb ááigán Aalmugijkoskâsii komovuotâsajattâhân. Sirdum päikkimääđhi keežild suoi oroin komovuotâsajattuvvâst loopâloopâst oovce mánuppaijeed, ohtsis 286 peivid. Taan ääigi suoi juuráin 4 576 kerdid Eennâm pirrâ (16 kerdid pirrâmpeeivist) já porgáin 150 tieđâlii iskosid. Starliner maacâi kuárosin Enâmân.[4]
Porgemáánust 2024 čielgâi, et Williams já Wilmore macâččáin Enâmân Dragon-vuáru astronautijgijn. Dragon-juávkku vuávájui uđđâsist, já Williams já Wilmore šoddáin uássin taan juávhu. Dragon-juávhu rakkeet päčimist kuáđđojii kyehti rijjâ stoovli Williamsân já Wilmoren. Taan miärádâs keežild Williams já Wilmore kolgáin vyerdiđ Enâmân maccâm Juávkku 9 -missio loopâ räi.[4]
Kuhes oromis ääigi Williams já Wilmore vazzijn oovtâst oovtâ komovuotâväzzim Almugijkoskâsii komovuotâsajattuv tivvoomtooimâi keežild. Taat tábáhtui uđđâivemáánu 30. peeivi. Väzzimis ääigi suoi valdijn meid iskospittáid asemateriaalijn Destiny-laboratoriost já Quest áimutoppâmist. Sunnuu komovuotâväzzim piištij kuttâ já peeli tiijme. Sunita Williams vaazij meid astronaut Nick Haguein komovuotâväzzim muáddi oho ovdeláá, uđđivemáánu 16. peeivi, já taat väzzim piištij kuttâ tiijme.[4]
Williams já Wilmore maccáin Enâmân koskoho 19.3. suullân oovtâ ääigi iđedisiijâ Suomâ ääigi.[5][6]
Fáádást eres soojijn
[mute | mute käldee]
Wikimedia Commonsist láá koveh teikkâ eres tiätuvuárháh fáádást Sunita Williams.
Käldeeh
[mute | mute käldee]- ↑ Deutsch, James I.: ”Sunita Williams”, Great Lives from History: Asian and Pacific Islander Americans, s. 803–804. Pasadena: Salem Press, 2012. Tyeje nettiversio (PDF) (čujottum 22.3.2025). (eŋgâlâskielân)
- ↑ Sunita L. Williams NASA. Vyerkkejum 20.3.2025. Čujottum 22.3.2025. (eŋgâlâskielân)
- ↑ Rajen Kilachand Center for Integrated Life Sciences and Engineering: Anatomists and Neurobiologists Convene for Deepak Pandya Memorial Symposium bu.edu. Čujottum 22.3.2025. (eŋgâlâskielân)
- ↑ a â b Olthuis, Marja-Liisa: Astronautkyevtis Sunita Williams já Barry Wilmore lává maccâm Enâmân anarasaavis.fi. 21.3.2025. Čujottum 22.3.2025.
- ↑ Astronauts Butch Wilmore and Suni Williams return to Earth after nine unplanned months in space BBC News. Čujottum 22.3.2025. (eŋgâlâskielân)
- ↑ Livestream NASA-astronauten Sunita Williams en Barry Wilmore (bijna) weer terug op aarde www.astroblogs.nl. Čujottum 22.3.2025. (hollandkielân)