Sentineleh
Sentineleh láá algâalgâlii čeerdâ jesâneh, kiäh ääsih Tave-Sentinel suollust, Andamaanijn. Sij ääsih masa jo tievâslávt sierâlum maailmist. Sij ääsih jiešrahtum ohtsâš viistijn, já sehe nisoneh já almaah iälusteh suollust piättáá. Sij kuálásteh kanotijgijn meerâ alne alda suolluu. Totkeeh iä tieđe maiden sentinelij kielâst, kulttuurist já historjást.[1] Sentineleh láá negriiteh, já totkeeh oskoh, ete sij láá puáttám Andamaanij suolluid 30 000–60 000 ihheed tassaaš. DNA-tuođâštusâi mield sentineleh sättih leđe vuosmužžân Afrikist vuálgám ulmui maajeeldpuátteeh.[2]
Sentineleh láá ohtâ maailm puoh enâmustáá sierâlum čeerdâin. Sentinelij tärhis lohomeeri ij lah tiäđust. Ive 2011 porgui India aalmugrekinistem, mon mield čeerdâst lijjii 12 almad já kulmâ nissoon. Rekinistem várás čerdâ tarkkui helikopteráin.[3] Eres arvâlusah láá meid porgum, já toi mield lohomeeri lii máhđulávt stuárráb: suullân 150 olmožid. Arvâlusah láá 39–400 kooskâst.[4][5] Sentinelij eellimvyehi lii siämmáálágán ko ulmuin lâi paleoottisii äigipaajeest.[6]
Kielâ
[mute | mute käldee]Sentinelij kielâst ij tiettuu ennustkin mihheen (toos lii adelum ISO-639-3-koodi std[7]), já kielâst iä tiettuu suhâkielah.[3] Áárvu mield aldasuolluin ässee jarawa- já öngeaalmugij kielah láá sentinelij kielâ hyelkkikielah, mutâ äšši ij lah vises. Jarawah láá irâttâm aldaniđ sentinelijd, mutâ sij iä lah iberdâm sentinelij kielâ.[3]
Kuáhtáámij historjá
[mute | mute käldee]Vuossâmuš mainâšume Tave-Sentinel suollust lii ive 1771. Talle ulmuuh, kiäh lijjii vuálgám Stuorrâ-Britannia suollust tamppáin, oinii suollust čuovâid iho. Ive 1867 indialâš kävppitamppâ Nineveh lâi merâpäärtist alda Tave-Sentinel káárgu. Taampâ viehâ piäluštui suollui, já kuálmád peeivi sentineleh volliittii sii njuolâigijn. Taampâ viehâ muštâlij, ete suolluu ässeeh lijjii piättáá, sii vuoptah lijjii uánihááh, sii njuneh lijjii máálájum ruopsâdin já sij jienâdii ovdâmerkkân pa an ough. Sentinelij njuolâin urruu lemin ryevdist rahtum keejih. Taampâ viehâ patârij piäluštemkárbáin muádi peeivi keččin, ko nubbe tamppâ lâi jotemin suolluu lappâd.
Andamaanij virgealmai Maurice Vidal Portman (š. 1879) ornij tutkâmmääđhi Tave-Sentinel suollui. Mätkikodde tuuđhâi suolluu uáli tárkká, mutâ ohtâgin olmooš ij kavnum. Muádi peeivi uuccâm maŋa sij kavnii oovtâ puáris parâkode já nelji päärni. Taah kuuđâs puáhtojii Port Blairân tutkâmnáálá. Sij kuittâg puosâškuottii jotelávt, já parâkodde jaamij. Párnááh vist tuálvojii maasâd suollui.
Ive 1896 mottoom hindifaŋgâ patârij Stuorrâ Andamaansuollust já rievdâi Tave-Sentinel suollui. Uuccâmjuávkku kaavnâi faaŋgâ muádi peeivi keččin. Sun lâi säggejum njuolâigijn já skainâšum čuddust.
Kiđđuv 1974 mottoom filmâjuávkku kollij suollust. Sij lijjii kuvviimin Man in Search of Man -dokument. Fáárust lijjii antropologeh, pooliseh já National Geographic -loostâ kovvejeijee. Sentineleh paččii juávhu njuolâigijn. Juávkku lâi puáhtám skeŋkkân šave, nuke já kookospähkinijd. Sentineleh hävdidii šave já nuke, mut sij purrii kookospähkinijd.[8]
1970- já 1980-lovoin suollust ellii ennuv ulmuuh, já ive 1981 aalgâst kolliistâlmeh lijjii jo tiätu ääigi kooskâi. Motomin uáinojii meid suolluu ässeeh. Mätkikodeh kuođđii suollui skeeŋkâid, ovdâmerkkân spejâlijd, ruopsis paadijd, kumipááluid já čevečiiŋâid. Motomin sentineleh lättejii ustevlávt, motomin vist sij paččii njuolâigijn kolliistâlleid. Uđđâivemáánust 1991 lâi vuossâmuš ustevlâš kuáhtám sentinelij já kolliistâllei kooskâst, ko sentineleh pottii viežžâđ kookospähkinijd riddoost já sentinelij lattim lâi ustevlâš.
India virgeomáhij virgáliih kolliistâlmeh nuhhii 1990-lovo pelimuddoost, já tastmaŋa sentineleh láá iälustâm ráávhust suolluustis. Juovlâmáánu 2004 tsunami maŋa helikopter kiirdij suolluu paajaabeln täärhistmin, magareh vahâgeh láá máhđulávt šoddâm, já sentineleh paččii oppeet njuolâigijn.[9] Uđđâivemáánust 2006 sentineleh kuddii kuálásteijeekuáhtá, kiäh láin lovettáá alda Tave-Sentinel suolluu. India räjikosáttâh irâttij viežžâđ almai rummâšijd helikopteráin, mutâ sentineleh paččii tom njuolâigijn. Huámmášumij mield rummâšeh lijjii hävdidum riidon.[10]
Ive 2018 skammâmáánust ovtâstumstaatâlâš John Allen Chau irâttij tuálvuđ ristâosko saavâ suolluu ässeid, mut sun sormejui njuolâigijn já tavgijgijn.[4]
Käldeeh
[mute | mute käldee]- ↑ Isoniemi, Jaakko: Syrjäisellä saarella tapettu lähetyssaarnaaja jäänee niille sijoilleen - ”ei ole hyvä idea mennä lähellekään” www.iltalehti.fi. Čujottum 25.1.2025. (suomâkielân)
- ↑ Roth, Tim: Sentinelese -- Science Reports web.archive.org. 6.11.2008. Čujottum 25.1.2025. (eŋgâlâskielân)
- ↑ a â b Miettinen, Jarmo: Tällainen on maailman eristynein, kivikautta elävä heimo, joka surmasi saarnaaja-Johnin: Jättitsunamin tuhoja tutkinut helikopterikin sai vastaansa nuolisateen – jopa saaren kuvaaminen kiellettiin lailla mtvuutiset.fi. Čujottum 25.1.2025. (suomâkielân)
- ↑ a â Numminen, Pekka: Turisteilta kielletyn syrjäisen saaren asukkaat surmasivat amerikkalaissaarnaajan nuolilla Intiassa www.iltalehti.fi. Čujottum 25.1.2025. (suomâkielân)
- ↑ Rasi, Maarit: Syrjäisellä saarella asuva heimo välttelee muuta maailmaa – elävät alasti ja taklaavat tunkeilijat Ilta-Sanomat. 1.6.2017. Čujottum 25.1.2025. (suomâkielân)
- ↑ Earth from Space: North Sentinel Island www.esa.int. Čujottum 25.1.2025. (eŋgâlâskielân)
- ↑ Sentinel Ethnologue (Free All). Čujottum 25.1.2025. (eŋgâlâskielân)
- ↑ Goodheart web.archive.org. 25.8.2012. Čujottum 25.1.2025. (eŋgâlâskielân)
- ↑ Charles, Jonathan: Tribe shoots arrows at aid flight news.bbc.co.uk. 4.1.2005. Čujottum 25.1.2025. (eŋgâlâskielân)
- ↑ Foster, Peter: Stone Age tribe kills fishermen The Sydney Morning Herald. 9.2.2006. Čujottum 25.1.2025. (eŋgâlâskielân)
