Sämirääđi kulttuurtorjuuh
Sämirääđi kulttuurtorjuuh láá ruđâliij torjuuh, maid Sämirääđi juáhá jyehi ive. Toi ulmen lii tuárjuđ, iäláskittiđ já ovdediđ ohtâlii sämitaaiđâ- já kulttuursyergi. Torjuu pyehtih uuccâđ ovtâskâs sämmiliih, sämijuávhuh já sämiseervih. Kulttuurtorjuid ruttâd Tave-enâmij ministerrääđi.[1]
Uđđâ toorjâhäämi ive 2025 rääjist
[mute | mute käldee]Sämirääđi almostitij ive 2025 aalgâst uđđâ toorjâhäämi, mon nommâ lii Dalán-doarjja (anarâškielân Tállán-toorjâ). Uđđâ toorjâhäämi lii uáivildum sämitaaiđâ- já kulttuursyergi vyerdimettum, huápulijn já tiätu äigimiärán čonnum tábáhtusâin. Taggaar tábáhtus puáhtá leđe ovdâmerkkân festivaalân, konsertân, čáitáldâhân, kuursân teikkâ eres taaiđâ- já kulttuursyergi tilálâšvuotân uásálistem, moos ij veltihánnáá lah puáhtám uuccâđ ruttâdem eres saajeest. Torjuu stuárudâh lii enâmustáá 20 000 NOK. Taam išeruuđâ puáhtá uuccâđ kulmii ivveest.[1]
Ive 2025 kulttuurtorjuuh
[mute | mute käldee]Kulttuurtorjuuh juáhhojii ohtsis 1 965 000 NOK. Sämirääđi juovij ihán 2025 ohtsis nelji oovtâ ive kukkosii pargoišeruuđâ. Taid ožžuu Inga-Wiktoria Påve já Lova Lundberg (tyeji), Hildá Länsman (muusik), Cecilia Persson (elleekove) sehe Simon Issát Marainen (kirjálâšvuotâ). Oovtâ pargoišeruuđâ stuárudâh lâi 200 000 NOK.[1][2]
Oovtâ ive kukkosij pargoišeruuđâi lasseen Sämirääđi juovij kulttuurtorjuu ohtsisi 33 projektân. Ohtâ tain lâi Šuoŋâsuonjâreh-haahâ, mon ulmen lâi rähtiđ já almostittiđ sämikielâg párnáimuusik, mon puáhtá kevttiđ arâšoddâdmist, škoovlâin sehe paaihijn. Sämirääđi mieđettij Šuoŋâsuonjâreh-haahân 34 000 NOK.[1][2]
Käldeeh
[mute | mute käldee]- ↑ a â b c Schreck, Jasmina: Taažâ Sämirääđi lii juáhám ive 2025 kulttuurtorjuid Anarâš aavis. 21.1.2025. Čujottum 21.1.2025.
- ↑ a â Sámiráđđi jugii jagi 2025 kulturdoarjagiid Sämirääđi. Čujottum 21.1.2025. (tavesämikielân)