Njuškii siskáldâsân

Roland TB-303

Wikipedia:st
Roland TB-303 ovdâpaaneel

Roland TB-303 Bass Line (tobdoo meid noomáin 303) lii bassosyntetisaattor, mon Roland Corporation almostitij ive 1981 já valmâštij ive 1984 räi.[1]

Historjá

[mute | mute käldee]

Roland TB-303 sundáttâlâi Tadao Kikumoto.[1][2] Tot lii sundáttâllum bassokitarij ađđiistâlmân,[3] mut ton jienâ ij sulâstit ollágin bassokiitaar.[4] Tast lii ohtâ analogâlâš oskillaator (VCO), mii pyevtit jo-uv sááhá- tâi neljihâšpárusignaal. Taan maŋa signaal jotá 24 dB/oktaav jienâsillee (LPF) čoođâ,[5] maid stivree lijnekavregeneraattor. Čuojânist lii meid oovtâkiärdánis sekveensser. Sekveensser ohjelmistem lâi hiđes já vaigâd, já tot ij iššeed, et ruustig fáárust lâi tuše raavâkirje jaapaankiellân. Tai suujâi tiet TB-303 vuobdui hyeneest, já Roland Corporation lopâttij ton valmâštem. Tuše 10 000 pittád valmâštuvvojii.[4] Roland Corporation vuobdij majemuš čuojânâsâid hälbis hodijguin.

1980-lovo aalgâst motomeh artisteh kevttii TB-303. Ovdâmerkkân Charanjit Singh keevtij tom albumist Ten Ragas to a Disco Beat (1982), já Orange Juice singlest Rip It Up (1983).[6] Sij iä kuittâg lamaš uáli pegâlmeh.

Chicagolâš artist Phuture almostitij ive 1987 pitá Acid Tracks. Taat pittá šoddâdij uđđâ muusikstiijlâ: acid house. Taan stiijlâst TB-303 čuojât oovtâkiärdánis já kiärdoo bassokovvoos já jienâšuoŋâ muttoo juurâtmáin jienâsillee távjus (eŋgâlâskielân cutoff frequency) já resonans (eŋg. resonance) -regulaattorijd.

Melodia puáhtá iäláskittiđ piejâmáin motomáid nuottáid nanodâs (eŋg. accent) teikâ snjagottem (eŋg. slide). Maaŋgah artisteh keksejii, et čuojânâs siähánij, jis ton pattereh váldojii meddâl. Taan maŋa čuojânist lii šoddâm uđđâ sätihámásâš melodia. Motomin taat melodia lâi pyeri já artist keevtij tom. Távjá jienâ muttoo kevttimáin pehtilitteerustigijd tegu tävismašinijd tâi juármi (eŋg. distortion). Távjá TB-303 kiävttoo oovtâst Roland TR-808- tâi Roland TR-909 -rumbumašináin, mon Tadao Kikumoto lii meiddei sundáttâllâm.[2]

Čuojânâsâst šoodâi piivnoh já maaŋgah artisteh kevttii tom uđđâ elektronlii tanssâmuusikist, ovdâmerkkân Derrick May já Jeff Mills (muusikstijlâ Detroit techno, 1980-lovo loopâst), Hardfloor (album Acperience, 1992), Josh Wink (pittá Higher State of Consciousness, 1995)[7] já Daft Punk (pittá Da Funk, 1996).[8]

Ive 2011 The Guardian -aavis čaalij, et TB-303 almostittem ive 1981 lii ohtâ 50 tehálumos tábáhtusâin tanssâmuusik historjást.[1]

Tááláá ääigi aalgâlâš Roland TB-303 lii uáli härvinâš já tiivrâs.[4] Tot puáhtá mäksiđ 2 000–5 000 dollarid. Rustigist láá meid muttum versioh, ovdâmerkkân Devilfish, Acidlab, Kenton já Borg. Toh láá meid uáli tivrâseh já vaigâdeh kavnâđ. Ton tiet čuojânâsâst láá valmâštum ennuv kopioh,[9][10] ovdâmerkkân Behringer TD-3 (2019), Roland Aira TB-3[11] já Roland TB-03.[12] Láá meid ennuv tiätturohjelmeh (ovdâmerkkân ReBirth RB-338, 2005), moh šoddâdeh siämmáálágánijd jienâid ko olmâ Roland TB-303. Toh mäksih ennuv ucceeb ko aalgâlâš Roland TB-303.

Fáádást eres soojijn

[mute | mute käldee]

Käldeeh

[mute | mute käldee]

  1. ↑ a â b Vine, Richard: Tadao Kikumoto invents the Roland TB-303 The Guardian. 14.6.2011. Čujottum 9.2.2025. (eŋgâlâskielân)
  2. ↑ a â McCabe, Paul: Tadao Kikumoto: An Exclusive Conversation Roland Articles. 31.7.2020. Čujottum 9.2.2025. (eŋgâlâskielân)
  3. ↑ The History Of Roland: Part 2 www.soundonsound.com. Čujottum 9.2.2025. (eŋgâlâskielân)
  4. ↑ a â b Hamill, Jasper: The world's most famous electronic instrument is back. Will anyone buy the reissued TB-303? Forbes. Vyerkkejum . Čujottum 9.2.2025. (eŋgâlâskielân)
  5. ↑ Flashback: TB-303 Bassline Synth Roland Resource Centre. 2.7.2020. Čujottum 9.2.2025. (eŋgâlâskielân)
  6. ↑ Buzzcocks: Boredom / Orange Juice: Rip It Up web.archive.org. 4.6.2011. Stylus Magazine. Čujottum 9.2.2025. (eŋgâlâskielân)
  7. ↑ You Just Have To Move Your Feet: 30 Years Of Acid web.archive.org. 17.10.2015. Attack Magazine. Čujottum 9.2.2025. (eŋgâlâskielân)
  8. ↑ Brewster, Will: The 13 most iconic Roland TB-303 basslines of all time Mixdown Magazine. 6.3.2024. Čujottum 9.2.2025. (eŋgâlâskielân)
  9. ↑ Reidy, Tess: Retro electronics still popular – but why not just use modern software? The Guardian. 15.2.2014. Čujottum 9.2.2025. (eŋgâlâskielân)
  10. ↑ Warwick, Oli: Attack of the clones: Is Behringer's Minimoog a synth replica too far? Fact Magazine. 8.4.2017. Čujottum 9.2.2025. (eŋgâlâskielân)
  11. ↑ Roland TB3 Touch Bassline www.soundonsound.com. Čujottum 9.2.2025. (eŋgâlâskielân)
  12. ↑ Aisher, Bruce: Roland TB-03 Bass Line review MusicRadar. 14.3.2017. Čujottum 9.2.2025. (eŋgâlâskielân)
Viežžum saajeest "https://smn.wikipedia.org/w/index.php?title=Roland_TB-303&oldid=128014"