Ringette
Ringette teikâ riegisskiärru lii juávkkuspellâ, mii spiälloo jieŋâ alne. Tot sulâstit jieŋâskiäru já kooripáálu. Ringette ovdedij kanadalâš valastâllâmsyergi olmooš já utkee Sam Jacks ive 1963. Algâalgâlávt ringette lâi uáivildum nisonáid. Stuárráámuuh ringette-enâmeh láá Kanada já Suomâ. Suomân speelâ puovtij jieŋâskiärruspellee Juhani ”Juuso” Wahlsten ive 1979.
Spellâm
[mute | mute käldee]Ringette spiälloo jieŋâskiärrukiedist. Koskâvijve, čuovjisviijveh já moolâviijveh láá siämmáá saajeest. Algâttemriäggáh iä tarbâšuu. Čuovjisviijvij já moolâviivjij kooskâst láá vala eromâš ringetteviijveh.[1][2]
Ringettest spellih kyehti juávhu. Kuohtuin juávhuin uážžuh leđe jieŋâ alne siämmáá ääigi moolâvahtâ já vittâ kieddispellee. Moolâvaavtâin lii siämmáálágán maila ko jieŋâskiäru moolâvaavtâin, mutâ kieddispellei maila lii njuolgâd. Skiäru saajeest ringettest lii eromâš kumirieggee.[1][2]
Njuolgâdusâi iäruh jieŋâskiärun
[mute | mute käldee]Ringette njuolgâdusâin láá muáddi stuorrâ iäru jieŋâskiäruin. Taa láá čallum puoh tehálumoseh:
- Spelleeh iä uážu luisteliđ rieggein čuovjisviijve rasta, peic sij ferttejeh adeliđ tom nube spellei, kote lii viijve nube peln.[1][2]
- Ringetteviijvij kooskâst uážžuh leđe puoh vittâ kieddispellee, mutâ toi já kiedi keejij kooskâst uážžuh leđe tuše kulmâ kieddispellee.[1][2]
- Ko juávkku finnee rieggee olssis, te tot ferttee pääččiđ rieggee 30 seekunt siste.[1][2]
- Vuástálistei kuoskâttem, tego suáibuttem, ij lah loválâš.[1][2]
Maailmmiäštárkištoh
[mute | mute käldee]Vuosmuuh ringette MM-kištoh uárnejuvvojii ive 1990 Gloucester kaavpugist Ontariost, Kanadast. Toid uásálistii kuttâ kanadalii juávhu, Suomâ juávkku já Ovtâstum staatâi juávkku. Suomâ poođij čiččâdin, Ovtâstum staatah vist paasij majemužžân.[3]
Nubeh kištoh uárnejuvvojii Helsigist ive 1992. Kole vuoitij Kanada uárjijuávkku, siilbâ vist eennâm nuorttâjuávkku. Suomâ vuoitij proonsi. Ovtâstum staatah poođij niäljádin, Ruoššâ viđâdin já Ruotâ kuđâdin.[3]
Kuálmádeh kištoh uárnejuvvojii Minnesotast Ovtâstum staatâin ive 1994. Juávhuh lijjii siämmááh ko ovdebáin kištoin. Suomâ vuoitij vuosmuu MM-kollees, Kanada nuorttâjuávkku poođij nubben já uárjijuávkku vist kuálmádin. Eres puátuseh lijjii siämmááh.[3]
Tastmaŋa kištoid uásálistii Kanada, Suomâ, Ovtâstum staatah já Ruotâ. MM-kištoi lasseen uárnejuvvojii meid eres kištoh tego servijuávhui miäštárvuotâkištoh já vuálá 19-ihásij kištoh.[3]
Suomâ lii haldâšâm šlaajâ ive 2004 rääjist. Áinoo eennâm, mii lii pastam västidiđ Suomân, lii Kanada. Tondiet ringette 50. juhleive adai ive 2013 kištoin valdui anon eromâš kištovuáhádâh, mast tuše Suomâ já Kanada spellih kolleest. Eres juávhuh spellih jieijâs kištoid MM-proonsist. Siämmáá ääigi rävisulmui kištoiguin spiällojeh meid vuálá 21-ihásij kištoh. Návt rááiđuh láá kulmâ:[3]
- Sam Jacks Pool lii rävisulmui válduráiđu. Tast Suomâ já Kanada spellih kyehti speelâ já čuávdih miäštárvuođâ. Jis juávhui čuággáh láá kyevti speelâ maŋa táásá, te spiälloo vala ohtâ uási.[4]
- President’s Pool lii rävisulmui vyeleeb ráiđu, mast spellih Ruotâ, Ovtâstum staatah já Tšekki. Jyehi juávkku spiällá kuohtii eres juávhui vuástá. Algâspeelâi vyeittee piäsá njuolgist finalân, já kyehti eres juávhu vist spellih pelifinalist. Fiinaalspeelâ vyeittee vuáittá keevâtlávt MM-proonsi.[4]
- Juuso Wahlsten Pool lii vuálá 21-ihásij ráiđu. Tast-uv Suomâ já Kanada spellih kyehti speelâ já čuávdih vuálá 21-ihásij miäštárvuođâ. Täsitiileest spiälloo vala ohtâ uási.[4]
Sam Jacks Pool miitaaltavlustâh
[mute | mute käldee]| Ihe | Saje | Kolle | Silbâ | Pronssi |
|---|---|---|---|---|
| 1990[3] |  Gloucester, Ontario
|
 Alberta
|
 Ontario
|
 Quebec
|
| 1992[3] |  Helsig
|
Kanada, uárji
|
Kanada, nuorttâ
|
Suomâ
|
| 1994[3] |  Saint Paul, Minnesota
|
Suomâ
|
Kanada, nuorttâ
|
Kanada, uárji
|
| 1996[3] |  Tukholma
|
Kanada
|
Suomâ
|
Ovtâstum staatah
|
| 2000[3] | Espoo já Lahti
|
Suomâ
|
Kanada
|
Ovtâstum staatah
|
| 2002[3] | Edmonton, Alberta
|
Kanada
|
Suomâ
|
Ovtâstum staatah
|
| 2004[3] | Tukholma
|
Suomâ
|
Kanada
|
Ovtâstum staatah
|
| 2007[3] | Ottawa, Ontario
|
Suomâ
|
Kanada
|
Ruotâ
|
| 2010[3] | Tampere
|
Suomâ
|
Kanada
|
Ovtâstum staatah
|
| 2013[3] | North Bay, Ontario
|
Suomâ
|
Kanada
|
Ovtâstum staatah
|
| 2016[3] | Helsig
|
Suomâ
|
Kanada
|
Ruotâ
|
| 2017[3] | Mississauga, Ontario
|
Suomâ
|
Kanada
|
Ruotâ
|
| 2019[3] | Burnaby, Brittilâš Kolumbia
|
Suomâ
|
Kanada
|
Ruotâ
|
| 2022[3] | Espoo
|
Suomâ
|
Kanada
|
Ovtâstum staatah
|
| 2025[5] | Lahti
|
Suomâ
|
Kanada
|
Ruotâ
|
Ive 2025 MM-kištoh
[mute | mute käldee]Ringette ive 2025 maailmmiäštárkištoh uárnejuvvojii Lahtist 3.–9. peeivi. Suomâ vuoitij kole sehe Sam Jacks Poolist já Juuso Wahlsten Poolist. Rävisulmui MM-kolle lâi Suomâ oovcád maŋaluvâi.[5]
Sam Jacks Pool vuossâmuu finalist Suomâ vuoitij Kanada 4–2. Nube finalist Kanada paajij vuosmuu moolâ, mutâ tast maŋa Suomâ lavkkij njunošân. Speelâ pelimuddoost lovoh lijjii jo 4–1. Niäljád adai majemuu uási aalgâst Suomâ lâi njunošist 7–1. Kanada finnij vala kyehti moolâ, mutâ toh pottii liijkás maŋŋeed, já nuuvt Suomâ šoodâi miäštárin lovoiguin 7–3.[5]
Ohtâ Suomâ sáŋgárijn lâi Ida Adler, kiäs taah kištoh lijjii vuossâmuuh eennâmjuávhust. Adler paajij kulmâ moolâ já falâlij kyehti moolâ. Nube fiinaal maŋa sun väljejui speelâ puoh pyeremussân spellen já kištoi puoh mávsulumos spellen Suomâ juávhust.[5]
Meiddei Juuso Wahlsten Pool vuosmuu finalist Suomâ vuoitij Kanada 4–2. Nube finalist Kanada lâi pyereeb lovoiguin 4–3 já tassij vuáituid. Nuuvtpa tállán spellui vala jotkâuási, mon Suomâ vuoitij 3–1.[5]
Talle ko Suomâ já Kanada kištottellii rävisulmui já vuálá 21-ihásij kolleest, te Ruotâ, Tšekki já Ovtâstum staatah spellii President’s Poolist jieijâs kištoid. Ruotâ vuoitij puoh algâspelâidis já peesij njuolgist finalân. Ton vuástá poođij Ovtâstum staatah, mii lâi vuáittám Tšeeki 8–5 pelifinalist. Fiinaal nuuvâi Ruotâ 8–7-vuáitun jotkâääigi.[5]
Käldeeh
[mute | mute käldee]- ↑ a â b c č d Ringeten lyhyt oppimäärä www.luviankiekko.fi. Čujottum 24.11.2025. (suomâkielân)
- ↑ a â b c č d What is Ringette Ringette Canada. Čujottum 24.11.2025. (eŋgâlâskielân)
- ↑ a â b c č d đ e f g h i j k l m n nj ŋ WRC MM Ringette. Čujottum 24.11.2025. (eŋgâlâskielân)
- ↑ a â b Valkeapolku, Valtteri: Ringette MM-kištoh láá joođoost Lahtist – Suomâ já Kanada spellih tuše kolleest anarasaavis.fi. 7.11.2025. Čujottum 24.11.2025.
- ↑ a â b c č d Valkeapolku, Valtteri: Suomâ piergiimettum ringette maailmmiäštárkistoin anarasaavis.fi. 12.11.2025. Čujottum 24.11.2025.