Petteri Laiti
Petteri Laiti ađai Mihku Biehttár (j. njuhčâmáánu 24. peeivi 2025 Aanaar, Suomâ) lâi aanaarlâš sämituáijár já silbârävdee sehe sämityeje ovdedeijee. Sun šoodâi tobdosin silbâ-, čuárvi-, tähti- já päkki- sehe taaiđâtuojijnis. Suu tyejeh uáinojii čáitálduvâin pirrâ Suomâ já pirrâ maailm. Petteri Laiti juovij mielâstis tiäđuidis já mátuidis eres ulmuid já lâi viššâl máttááttiđ nuorâid.[1][2][3]
Eellim já pargo
[mute | mute käldee]Ärbivuáváliih sämityejeh šoddii Laitin uápisin jo suu pärnivuođâ pääihist, ko suu eeči tuoijui ärbivuáválijd sämituojijd. Lase Laiti oopâi škoovlâin. Lahti kollečeppiškoovlâst sun valmâštui silbârävden ive 1984.[1][2][3]
Laiti lâi fáárust vuáđđudmin tááláá Sámi Duodji -seervi ive 1975 sehe Suomâ Säämi taaiđâseervi (Suoma Sámi Dáiddasearvvi) ive 1992. 1980-lovo pelimuddoost sun vuáđudij Samekki-nommâsii irâttâs já sämityejikäävpi Anarân. Ubâ Suomâ aalmugân Laiti šoodâi tobdosin ive 1992, ko sun lâi fáárust Juhla Mokka -TV-máinusist nijberähten.[1][2][3]
Laiti uážui maŋgâ palhâšume pargostis sämityejičeppin. Ovdâmerkkân ive 1989 sun palhâšui Suomâ staatâ taaiđâráhtálâšvuotâpalhâšuumijn, já sun lii uážžum meiddei Aanaar kieldâ kulttuurpalhâšume. Kiđđuv 2019 sun nomâttui Laapi ollâopâttuv kunneetuáhtárin.[1][2][3]
Laiti paasij iäláttâhân ive 2015, já čuávuváá ive sunjin mieđettui taidâriäláttâh. Sun jaamij 75-ihásâžžân vuossaargâ njuhčâmáánu 24. peeivi 2025 Aanaar siijdâst jotolâhluhottesvuođâst.[1][2][3]
Käldeeh
[mute | mute käldee]- ↑ a â b c č Paltto, Anni-Saara: Saamen käsityöntekijä ja hopeaseppä Petteri Laiti on kuollut yle.fi. 26.3.2025. Čujottum 28.3.2025. (suomâkielân)
- ↑ a â b c č Paltto, Anni-Saara: Sámeduojár Petteri Laiti lea vádjolan yle.fi. 26.3.2025. Čujottum 28.3.2025. (tavesämikielân)
- ↑ a â b c č Schreck, Jasmina: Anarâš aavis anarasaavis.fi. 28.3.2025. Čujottum 28.3.2025.