Paavo Hohti
Paavo Hohti (19. roovvâdmáánu 1944 – 26. syeinimáánu 2025)[1] lâi syemmilâš kulttuurolmooš já klassiklii filologia totkee.[2] Hohti poorgâi maaŋgâ siättusist. Stuorrâ eellimpargoos sun poorgâi Suomâ Kulttuurruttâráájust.
Eellim já pargo
[mute | mute käldee]Hohti čođâlditij luvâttuv Joensuust. Valmâštume maŋa sun joođhij uápuidis Helsig ollâopâttuvâst.[3] Ive 1976 Hohti nágáttâlâi antiik Kreika já Rooma kirjálâšvuođâst já valmâštui filosofia tuáhtárin. Suu náguskirje kieđâvušâi Historjákirje, mon lii čáállám antiikkreikkalâš historjistee Herodotos.[4]
Škovlâääigis 1960-lovo loopâst Hohti vietij kiiđâid 1967 já 1968 Roomast, Villa Lante al Gianicolo -nommâsii huksiittâsâst, kost tuáimá Suomâ Rooma-tieđâlágádâs. Tobbeen sun uásálistij professor Patrick Bruun etruskáid kyeskee pargojuávkun. Ton maŋa Hohti kolliistâlâi Roomast jyehi ive. Italian suu láá tuálvum meid haldâttâs jeessânvuotâ já maŋeláá saavâjođetteijeevuotâ tieđâlágádâs tyehin leijee Institutum Romanum Finlandiae -siättusist.[5]
Iivij 1973–1980 Hohti poorgâi läättinkielâ lehtorin Tampere ollâopâttuvâst.[2]
Ive 1980 Hohti algâttij Suomâ Kulttuurruttârááju äššialmajin. Tobbeen sun poorgâi 24 ihheed. Majemui 14 ive ääigi sun poorgâi pajeäššialmajin. Taan paargon sun lijkkui ennuv. Hohti lii kommentistám pargo návt:[5]
”Kulttuurruttârááju lâi uáli jo mielâsâš pargosaje. Pargo lâi tuođâi positiivlâš, tastko tot faalâi tieđâ- já taaiđâulmuid máhđulâšvuođâid kavnâđ uđđâ aašijd. Ton lasseen uážui porgâđ eromâš puorij ulmuiguin já jieškote-uvlágánij suorgij äššitobdeiguin. Aaibâs jieijâs äššin lii lamaš máhđulâšvuotâ uáiniđ ruttârááju skeŋkkejeijei jiegâlii styeresvuođâ.”[5]
Bysant tutkâmuš seervist Hohti poorgâi toimâttempargo iivij 1985–1990.[2] Sun tooimâi kuhháá meid seervi saavâjođetteijen.[6]
Hohti lâi WSOY kirjálâšvuotâsiättus haldâttâs jesânin iivij 1991–1999 já talle saavâjođetteijen iivij 2000–2016.[1]
Hohti finnij professor árvunoomâ ive 2003. Eres kunneemeerhah, maid sun finnij, láá Suomâ Vielgis Ruusu riitaarkode (SVR) vuosmuu luoka riitaar, Pase Lábbá riitaarkode (PKR) hovdâ já Kreika kunneeriitaarkode vuosmuu luoka hovdâ.[2]
Merhâšume anarâššáid
[mute | mute käldee]Suomâ Kulttuurruttârááju pajeäššialmajin Hohti poorgâi eromâš tehálii pargo anarâškielâ kielâpiervâltooimâ oovdân.[8][9] Suu iššijn Anarâškielâ servi finnij nuuvt stuorrâ išeruuđâ, ete kielâpiervâl puovtij porgâđ toin vittâ ive já čäittiđ kieldân já staatân, ete seervi pargovyehi lii pehtil já tuáimee. Taan lasseen Hohti eelij sárnuttâlmin Aanaar tallaa kieldâhoovdâ tast, maid kolgâččij porgâđ talle viiđâ ive maŋa. Jieijâs 60. šoddâmpeeivi skeeŋkâi saajeest Hohti avžui juhlekuosijd skeŋkkiđ ruttâsume Anarâškielâ siärván. Ruttâ čoggâšui-uv suulân 13 500 eurod.[8]
Kirjeh
[mute | mute käldee]- Retoriikka ja runousoppi (1997), suomâkielâ jurgâlus antiikkreikkalii filosof Aristoteles teevstâin Retoriik já Tihtâoppâ.
- Bysantti – Tuhat draaman vuotta (2021).
- Bysantin hovimies – Elämäni keisarivallan kulisseissa (2024), suomâkielâ jurgâlus bysantlii Mikael Psellos teevstâin.
Käldeeh
[mute | mute käldee]- 1 2 WSOY:n kirjallisuussäätiö ottaa osaa säätiön pitkäaikaisen puheenjohtajan Paavo Hohdin poismenon johdosta WSOY Kirjallisuussäätiö. 5.8.2025. Čujottum 8.8.2025. (suomâkielân)
- 1 2 3 4 Paavo Hohti - 375 Humanistia 375humanistia.helsinki.fi. 22.9.2015. Čujottum 8.8.2025. (suomâkielân)
- ↑ Osakuntien vankkumaton kannattaja - 375 Humanistia 375humanistia.helsinki.fi. Čujottum 8.8.2025. (suomâkielân)
- ↑ Julkaisuja ja teoksia - 375 Humanistia 375humanistia.helsinki.fi. Čujottum 8.8.2025. (suomâkielân)
- 1 2 3 Tutkimuksen teosta sen tukemiseen - 375 Humanistia 375humanistia.helsinki.fi. Čujottum 8.8.2025. (suomâkielân)
- ↑ In memoriam – Paavo Hohti 1944–2025 antiikintutkimus.fi. Čujottum 8.8.2025. (suomâkielân)
- ↑ Kaisa-kirjasto tutuksi - 375 Humanistia 375humanistia.helsinki.fi. Čujottum 8.8.2025. (suomâkielân)
- 1 2 3 Morottaja, Matti: Paavo Hohti in memoriam anarasaavis.fi. 7.8.2025. Čujottum 8.8.2025.
- ↑ In Memoriam Paavo Hohti (1944–2025) Suomen Kulttuurirahasto - SKR. 13.8.2025. Čujottum 17.8.2025. (suomâkielân)