Nisonij Ykköspesis-paje 2025 fiinaalráiđu
Nisonij Ykköspesis-paje 2025 fiinaalrááiđust spellii Oulu Lippo Nisoneh já Hamina Palloilijat. Lippo vuoitij fiinaalrááiđu 2–0. Vuáittoin tot pajanij Superpesis-liigan, mii lii pesipáálu alemus liiga.[1][2]
Fiinaalspeelah
[mute | mute käldee]Vuossâmuš fiinaalspellâ
[mute | mute käldee]Vuossâmuš fiinaalspellâ spellui porgemáánu 23. peeivi Oulust Raksila pesipállustadionist. Speelâ aalgâst Lippo, mii algâttij olgovuárust, oroi lemin jierestum. Muádi feeilâ keežild HP finnij oovtâ kaččâm, já Lippo jieijâs vuosmuš sisvuáru vist nuuvâi uáli jo jotelávt.[2]
Vuosmuu uási niäljád ađai majemuu vuárupaarâ aalgâst HP:st lijjii kyehti kaččâm já Lippost ohtâ kaččâm. Olgokiedist Lippo luhostui pyereest ige adelâm HP:n innig kaččâmijd. Siskiedist-uv juávkku piergij pyereest, veikkâ spelleeh lijjii-uv korrâ tedduu vyelni. Iiris Rautio čooskij já Karoliina Soppela kaačâi Lippo táásá, já Sara Kinnusii časkemist Linda Kemppainen puovtij vuosmuu uási vuáittukaččâm.[2]
Nube uásist Lippo speelâi ložžâsávt 1 628 päikkikeččee oovdâst. Tot finnij 5 kaččâm, vuástálistee vist ij oovtâgin. Nuuvt Lippo vuoitij vuosmuu speelâ 2–0 (3–2, 5–0). Nube uásist kyehti kaččâm čoskijn vildáásčaskeeh Aino Kesti já 16-ihásâš Saana Kälkäjä. Rautio čooskij já puovtij oovtâ kaččâm. Kapteen Tossavainen puovtij kyehti kaččâm, já Soppela já Kemppainen kuohtuuh puovttijn oovtâ kaččâm.[2]
Nubbe fiinaalspellâ
[mute | mute käldee]Nubbe spellâ spellui jo čuávuváá peeivi masa 600 km keččin Haminast Vallikenttä-kiedist. Spellâ lâi uáli jo täässiv. Vuosmuu uásist časkee–kaččee-paarâ Mira Heikkilä – Kiira Yrjänen tuálvoin päikkijuávhu njunošân. Kuálmád vuárupaarâst Lippo kuittâg peesâi njunošân, ko Rautio–Heinula já Kinnunen–Soppela uárnejii Lippon kyehti kaččâm. Eenâb kaččâmeh taan uásist iä oinum.[2]
Nube uásist Kesti–Kemppainen adeláin Lippon tállán oovtâ kaččâm. Nube vuárupaarâst HP finnij kuittâg kyehti kaččâm, main västidii Nea Forsell – Krista Piirainen sehe Riina Hallikainen – Annika Utriainen. Speelâ já fiinaalrááiđu čuávdus šoodâi aaibâs majemuu vuárupaarâst.[2]
Sisvuárust Lippost lijjii jo kyehti puálu ovdilgo Kesti puovtij Heinula päikkipiäsán. Nuuvt uási lâi táásá 2–2, ko HP algâttij jieijâs majemuu sisvuáru. Päikkijuávkku tarbâšij oovtâ kaččâm, vâi spellâ jotkuuččij supervuárupaarân. Lippo pehtilis olgokieddi selvâttij kuittâg HP vollitmijd oovtâi oovtâi, ige HP peessâm ko ohtii kuálmád piäsán. Čuávdee kuálmád puálu šoodâi talle ko HP spellee čooskij ovdâlavâttemes časkem majemuu časkemijnis. Spellâ nuuvâi 0–1 (1–2, 2–2). Tastmaŋa Lippo keevtij Hamina päikkikiedi jieijâs miäštárvuotâjuuhlij várás.[2]
Käldeeh
[mute | mute käldee]- ↑ Hiironen, Petri: Lippo Naiset Ykköspesiksen mestariksi ja Superpesikseen! Pesapalloliitto. 24.8.2025. Čujottum 28.8.2025. (suomâkielân)
- ↑ a â b c č d đ Valkeapolku, Valtteri: Nisonij pesipáálu alemus liiga Superpesis máccá Tave-Suomân – Oulu Lippo šoodâi Ykköspesis miäštárin anarasaavis.fi. 28.8.2025. Čujottum 28.8.2025.