Liijkás stuorrâ rähisvuotâ

Liijkás stuorrâ rähisvuotâ lii Katarina von Bredow nuorâiroomaan, mii almostui anarâškielân ive 2022. Tom jurgâlij Sáárá Seipiharju. Algâaalgâlâš kirje almostui ruotâkielân ive 2004 noomáin "Hur kär får man bli?". Tain kirjijn von Bredow vuoitij siämmáá ive Bokjuryn-palhâšume taggaar kategoriast, mast láá fáárust 14–19-ihásáid uáivildum kirjeh.

Juonâ

Kirje uáivipersovn lii Katrin, kote lii táválâš oovcádluokkalâš nieidâ. Katrin pyeremus skippáár lii mučis já pivnohis Frida, kote lii siämmáá luokkaast. Suoi lává ain oovtâst, ige mihheen iärut sunnuu – tassaažân ko luokan puátá uđđâ kandâ, kiän nommâ lii Adam. Tast maŋa mihheen ij lah tego ovdil. Frida lijkkuustuvá tállán Adamân, mut Adam lijkkoo Katrinân. Nuuvtpa Katrin kárttá vaigâdis tilán: väljee-uv sun skippáár vâi rähisvuođâ?

Kirje kieđâvuš rähisvuođâ já ustevvuođâ nuorâi uáinust. Tot kovvee čielgâsávt nuorâi tobdoid, tegu Katrin sujâlâšvuotâ, Frida soro já Adam hiämáskem. Kirje čáittá tom, magarin skippáár pettâšume tobdoo. Siämmást tot kovvee lijkkuustume korrâ vyeimi. Lohhee ibbeerd älkkeht Katrin ruossârijdo já puáhtá mudoi-uv identifisistuđ kirje persovnáid.

Kirje ij kuittâg muštâl tuše rähisvuođâst já Katrin škovlâskipárijn. Tast kieđâvuššojeh meiddei jieškote-uvlágáneh koskâvuođah perruu siste. Katrinist láá vädisvuođah pääihist-uv. Suu perrui kuullâv Kasper-eeči já Viktor-uccviiljâš. Ingrid-enni áásá pargo tiet Brysselist. Katrin-kyevtis Viktoráin lává ucánjáhháá cuovkkânâm. Kenski Kasper-uv, jieijâs naalijn. Sij cuovkkânii ko Ingrid jävkittij. Ingrid tuše kuođij perrus paifakkist, já tast maŋa Katrinist lii lamaš vaigâd lyettiđ kiässán. Sun ij tuostâ lijkkuđ kiässán iärásân. Eeji uđđâ pelikyeimi, Marie, lii meiddei vuálgám meddâl rijdo maŋa. Mondiet enni vuolgij? Nabai Marie? Mondiet uccviiljâš lii muttum? Paifakkist Katrin maailmist puoh oro mooiváskmin. Peerâčuolmah jieŋâlmiteh juonâ. Toh muštotteh, et nuorâ elimist láá maaŋgah huolah siämmáá ääigi.