Leggistâm soroidân lyeniliitán – Tiivtah tobdoin
Leggistâm soroidân lyeniliitán – Tiivtah tobdoin lii Emma Gahmberg já Kaisla Suominen čäällim tihtâkirje, mii almostui ive 2023.[1]
Kirje lii kyevtikielâlâš. Tiivtah láá vistig čallum suomâkielân, já talle toh láá jurgâlum anarâškielân. Kirje kukkodâh lii masa 30 sijđod, já fáárust láá ohtsis 20 tihtâd. Suullân pele tiivtâin lii čáállám Kaisla Suominen, já nube pele lii čáállám Emma Gahmberg. Oovtâ tiivtâ suoi lává čáállám oovtâst.[2]
Siskáldâs
[mute | mute käldee]Inspiraatio tivttáid poođij eellimtoskeest. Kirje lii juohhum viiđâ uásán kieđâvuššum teema mield: soro, vajo, kaaos, palo já ilo. Vuossâmuuh vittâ tiivtâ kieđâvušeh soro. Toi maŋa láá vittâ tiivtâ vaajoost. Kaaos-uásist vist láá nelji tiivtâ, já loopâst láá kulmâ tiivtâ paaloost já kulmâ tiivtâ iiloost. Jyehi uási aalgâst lii čapisvielgis kove, mii kovvee ton uási teema. Emma já Kaisla lává jieijah sárgum puoh taid kuuvijd já meiddei kirje lokkekuuvijd.[2]
Tuávááš
[mute | mute käldee]Juurdâ tihtâkirje čälimist šoodâi Aanaar paješkoovlâst. Eenikielâ tiijmijn lâi ohtii taggaar pargopittá, et ferttij čäälliđ tiivtâ. Emma já Kaisla máttáátteijee huámášij, et suoi láin uáli jo moovtâ tiivtâi čälimist, já sun iävtuttij, et ličij hitruu čäälliđ tihtâkirje. Kirje čäällim lii uáli jo stuorrâ pargo, mut kuuloold šoddii lase tiivtah, já forgâ toh lijjii tuárvi ennuv oovtâ kiirján. Tiivtah printtejuvvojii, já tain šoddii motomeh kieđâi rahtum vihkoh. Kieđâi ij kuittâg puáhtám rähtiđ hirmâd ennuv kopioid.[2]
Anarâškielâ servi lii almostittâm taam tihtâčuágálduv, vâi tot ličij pyerebeht finnimnáál puoh anarâškielâ sárnoid. Ulmen lâi meiddei movtijdittiđ nuorâid čäälliđ eenâb anarâškielân.[2]
Käldeeh
[mute | mute käldee]- ↑ Leggistâm soroidân lyeniliitán – Tiivtah tobdoin kansalliskirjasto.finna.fi. Čujottum 23.6.2025. (suomâkielân)
- 1 2 3 4 Brecciaroli, Fabrizio: Leggistâm soroidân lyeniliitán – Tiivtah tobdoin. Anarâš-kalender 2026, 2025. Anarâškielâ servi ry.