Jean Sibelius -vivlukišto
Jean Sibelius -vivlukišto lii vivlukišto, mii uárnejui vuosmuu tove ive 1965 ađai čyeti ihheed Jean Sibelius šoddâm maŋa. Tot uárnejuvvoo jyehi viiđâd ive. Kišto annoo stuorrâ áárvust pirrâ maailm. Tom láá vuáittám maaŋgah pegâlmâs čuojâtteijeeh tego Viktoria Mullova, Leonidas Kavakos já Sergei Hatšatrjan. Jean Sibelius -vivlukišto áinoo syemmilâš vyeittee lii Pekka Kuusisto, kote vuoitij tom ive 1995 tuše 19-ihásâžžân.[1]
Ive 2020 kišto sirdui ihán 2022 koronapandemia keežild.[2][3][4]
2025
[mute | mute käldee]13. aalmugkoskâsâš Jean Sibelius -vivlukišto uárnájui Helsigist. Tot aalgij vyesimáánu 19. peeivi. Finaleh uárnejuvvojii Helsig Muusiktáálust 27.–29. peeivi.[1]
Sueye Park, kote šoodâi ive 2000 Maadâ-Korea Daegust, vuoitij kišto. Park finnij palhâšummeen 30 000 eurod, nelji persovnlii stivrimkeerdi orkesterjođetteijee John Storgårdsist já vivlučuojâtteijee Pekka Kuusistost sehe vuoigâdvuođâ kevttiđ G. B. Guadagnini 1777 ex Sasson -árvuviivlu oovtâ ive ääigi.[1][5]
Nubben kištoost poođij jaapaanlâš Minami Yoshida, kote finnij 20 000 eurod. Sun vuoitij meiddei 2 000 eurod pyeremuu Sibelius vivlukonserto oovdânpyehtimist. Kuálmádin lâi ovtâstumstaatâlâš Claire Wells. Sun finnij 15 000 eurod.[1][5]
Finalân uásálistii meid Gabrielle Després, Otto Antikainen já Amia Janicki. Juáháš sist finnij 3 000 eurod. Janicki vuoitij meiddei 2 000 eurod pyeremuu tiilájum tyeje oovdânpyehtimist pelifinalist. Taan ive tiilájum tyeji lâi Outi Tarkiaisii The Seasons Remembered.[1][5]
Puoh artisteh, kiäh pessii finalân, ožžuu máhđulâšvuođâ toimâđ syemmilij orkesterij solistin.[1]
John Storgårds jođettem tuámmárkoodán kullii orkesterjođetteijee já vivlučuojâtteijee Jan Söderblom sehe vivlutaidâreh Elise Båtnes, Levon Chilingirian, Jinjoo Cho, Sung-Ju Lee já Réka Szilvay.[1]
Vyeitteeh
[mute | mute käldee]
Käldeeh
[mute | mute käldee]- ↑ a â b c č d đ Valkeapolku, Valtteri: Maadâkorealâš Sueye Park lii vuáittám Jean Sibelius -vivlukišto anarasaavis.fi. 3.6.2025. Čujottum 3.6.2025.
- ↑ Sibelius Violin Competition postponed Sibelius One. 12.6.2020. Čujottum 3.6.2025. (eŋgâlâskielân)
- ↑ 12th International Jean Sibelius Violin Competition Postponed Until Spring 2022 Uniarts Helsinki. 12.6.2020. Čujottum 3.6.2025. (eŋgâlâskielân)
- ↑ Finland's 2020 Sibelius International Violin Competition Postponed to 2022 The Violin Channel. 12.6.2020. Čujottum 3.6.2025. (eŋgâlâskielân)
- ↑ a â b Kansainvälisen Jean Sibelius -viulukilpailun voitti eteläkorealainen Sueye Park Yle. 29.5.2025. Čujottum 3.6.2025. (suomâkielân)
- ↑ Totuuden hetki -dokumentti seuraa vuoden 1990 Sibelius-viulukilpailua Yle. 10.11.2010. Čujottum 3.6.2025. (suomâkielân)