Ive 2025 jyelgipáálu nisonij euroopmiäštárkištoi fiinaal
Ive 2025 jyelgipáálu nisonij euroopmiäštárkištoi fiinaal spellui syeinimáánu 27. peeivi St. Jakob-Park stadionist Basel kaavpugist Sveeicist 34 203 keččee oovdâst. Finalist Eŋland vuoitij Espanja 3–1 ráŋgáštâsčiehčâmijn. Jotkâääigi maŋa spellâ lâi 1–1. Ovdil nisonij euroopmiäštárvuotâ lâi čovdâšum ráŋgáštâsčiehčâmijguin tuše ohtii. Tot tábáhtui ive 1984, ko Ruotâ vuoitij Eŋland nisonij vuossâmuin EM-kištoin.[1]
Eŋland euroopmiäštárvuotâ lâi nubbe maŋaluvâi. Ive 2022 finalist tot vuoitij Saksa 2–1 jotkâääigi. Kuohtuin finalijn čuávdee moolâ lii pááččám Chloe Kelly.[1]
Eŋland moolâvahtâ Hannah Hampton väljejui fiinaal pyeremussân spellen. Fiinaal maŋa Espanja Aitana Bonmatí, kote lâi pááččám 1–0-moolâ jotkâääigi pelifinalist Saksa vuástá já lâi lamaš meid fáárust ive 2023 maailmmiäštárvuotâjuávhust, väljejui kištoi pyeremussân spellen. Finalist sun čievčâstij ráŋgáštâsčiehčâmijn, mutâ ij finnim moolâ.[1]
Kiäinu finalân
[mute | mute käldee]Eŋland
[mute | mute käldee]| Spellâ | Vuástálistee | Puáđus |
|---|---|---|
 Ranska
|
1–2 | |
 Vuáládâhenâmeh
|
4–0 | |
 Wales
|
6–1 | |
 Ruotâ
|
2–2 (jä.) 3–2 (rč.) | |
 Italia
|
2–1 (jä.) |
Eŋland táppái vuosmuu speelâ Raanskan 2–1.[2] Ton maŋa juávkku vuoitij Vuáládâhenâmijd 4–0[3] já Wales 6–1.[4] Niäljádâsfinalist syeinimáánu 17. peeivi Ruotâ masa olâttij miäštárjuávhu. Ruotâ lâi jo joođoost 2–0, mutâ Eŋland poostij tassiđ speelâ. Vyeittee čovdâšui ráŋgáštâsčiehčâmijguin, mast Ruotâst lijjii kyehti máhđulâšvuođâ pääččiđ vuáittumoolâ. Čiččâd rieggest Eŋland piälušteijee Lucy Bronze kuittâg paajij moolâ, já nuuvt Eŋland vuoitij ráŋgáštâsčiehčâmijn 3–2.[5]
Pelifiinaal Italia vuástá spellui syeinimáánu 22. peeivi. Oppeet Eŋland kaartâi táápu pel, ko Italia Barbara Bonansea paajij vuosmuu moolâ 33. minuttist. Čuávuvâš moolâ oinui eidu nube uási laseääigi 96. minuttist, ko Eŋland Michelle Agyemang piejâi páálu moolân já tuálvui juávhus jotkâááigán. Jotkâääigi majemuu minuttist Chloe Kelly finnij ráŋgáštâsčiehčâm. Italia moolâvahtâ Laura Giuliani tuástui páálu, mutâ ij finnim tom kiddâ olmânáál. Kelly kaačâi páálu kuuvl já paajij tom moolân. Eŋland vuoitij 2–1.[6]
Espanja
[mute | mute käldee]| Spellâ | Vuástálistee | Puáđus |
|---|---|---|
 Portugal
|
5–0 | |
 Belgia
|
6–2 | |
| Italia
|
3–1 | |
 Sveicci
|
2–0 | |
 Saksa
|
1–0 (jä.) |
Espanja vuoitij puoh spelâidis ovdil fiinaal. Tot vuoitij vuossâmuu speelâst Portugal 5–0.[7] Ton maŋa juávkku vuoitij Belgia 6–2[8] já Italia 3–1.[9] Niäljádâsfinalist syeinimáánu 18. peeivi tot vuoitij Sveeici 2–0.[10] Pelifinalist syeinimáánu 23. peeivi Saksa táppái jotkâääigi 0–1.[11]
Fiinaal tábáhtusah
[mute | mute käldee]Espanja haldâšij vuosmuu uási čielgâsávt já paajij meid fiinaal vuosmuu moolâ 25. minuttist. Ona Batlle čievčâstij páálu Eŋland moolâkuávlun, kost Mariona Caldentey nurvoi tom viärmán. Caldentey lii uápis eŋlandláid, tastko sun spiällá eŋlandlii Arsenalist já väljejui moonnâm paje Eŋland Superliiga pyeremussân spellen.[12]
Nubbe uási lâi täsivub, mutâ Espanja finnij eenâb máhđulâšvuođâid moolâ päcimân. Nube uási áinoo moolâ paajij kuittâg Eŋland. Chloe Kelly čievčâstij, já Alessia Russo nurvoi páálu moolân 57. minuttist. Love miinut maŋa Kelly mestâ finnij moolâ, mutâ Espanja moolâvahtâ Cata Coll luhostui tuástuđ páálu.[12]
Jotkâääigi Espanjast lijjii oppeet pyerebeh máhđulâšvuođah pääččiđ vuáittumoolâ. Eŋland piäluštâs liijká ceevzij jotkâääigi loopâ räi.[12]
Eŋland algâttij ráŋgáštâsčiehčâmijd. Beth Mead paajij moolâ, mutâ tot hilgui, tastko sun lâi njalahistám já kuoskâttâm páálun kuohtii. Tastko koččâmušâst lâi vaahâg, te sun uážui irâttiđ uđđâsist. Taan tove Coll tuástui páálu.[12]
Čuávuvâžžân poođij Espanja Patricia Guijarro, kote paajij páálu kaskoo moolâ. Eŋland moolâvahtâ Hannah Hampton avâštij puástud já leggistâđâi meddâl páálu oovdâst. Alex Greenwood kuittâg tassij moolâid tállán 1–1:n. Já ko Hampton tuástui Espanja Mariona Caldentey čievčâstem já Niamh Charles vist paajij moolâ, te Eŋlandist moonâi-uv vuod pyereest.[12]
Moolâvaavtah tuástoin Aitana Bonmatí já Leah Williamson čievčâstmijd. Espanja niäljádâssân poođij Salma Paralluelo, kote paajij lappâd moolâst. Eŋland viiđâd ađai majemuš spellee Chloe Kelly vist paajij moolâ ige adelâm Espanjan innig máhđulâšvuođâid tassiđ speelâ. Eŋland vuoitij ráŋgáštâsčiehčâmijn 3–1.[12]
27. syeinimáánu
18:00 |
Eŋland 
|
1–1 (jä.) |  Espanja
|
|---|---|---|
Russo  57'
|
Raapoort | Caldentey 25'
|
| Ráŋgáštâsčiehčâmeh | ||
Mead  Greenwood  Charles Williamson Kelly
|
3–1 | Guijarro Caldentey Bonmatí Paralluelo
|
         Eŋland
|
     Espanja
|
|
_2025-07-27.svg)
|
| ||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||||
Käldeeh
[mute | mute käldee]- ↑ a â b Valkeapolku, Valtteri: Eŋland lii nisonij jyelgipáálu euroopmiäštár anarasaavis.fi. 29.7.2025. Čujottum 29.7.2025. (suomâkielân)
- ↑ France vs England uefa.com. Čujottum 29.7.2025. (eŋgâlâskielân)
- ↑ England vs Netherlands uefa.com. Čujottum 29.7.2025. (eŋgâlâskielân)
- ↑ England vs Wales uefa.com. Čujottum 29.7.2025. (eŋgâlâskielân)
- ↑ Sweden vs England uefa.com. Čujottum 29.7.2025. (eŋgâlâskielân)
- ↑ England vs Italy uefa.com. Čujottum 29.7.2025. (eŋgâlâskielân)
- ↑ Spain vs Portugal uefa.com. Čujottum 29.7.2025. (eŋgâlâskielân)
- ↑ Spain vs Belgium uefa.com. Čujottum 29.7.2025. (eŋgâlâskielân)
- ↑ Italy vs Spain uefa.com. Čujottum 29.7.2025. (eŋgâlâskielân)
- ↑ Spain vs Switzerland uefa.com. Čujottum 29.7.2025. (eŋgâlâskielân)
- ↑ Germany vs Spain uefa.com. Čujottum 29.7.2025. (eŋgâlâskielân)
- ↑ a â b c č d England vs Spain uefa.com. Čujottum 29.7.2025. (eŋgâlâskielân)