Ive 2025 Stanley Cup finaleh
Ive 2025 Stanley Cup finaleh lijjii NHL-paje 2024–2025 loppâspeelah. Toh spiällojii kesimáánu 4.–17. peeivi 2025. Fiinaalrááiđust Florida Panthers vuoitij Edmonton Oilers 4–2. Taat lâi Panthers nubbe miäštárvuotâ. Juávkku vuoitij Stanley Cup vuosmuu keerdi ive 2024, kuás ton vuástá lâi talle-uv Edmonton Oilers. Talle loppâpuáđus lâi 4–3. Taat lâi meiddei Panthers kuálmád fiinaalráiđu maŋaluvâi. Paje 2022–2023 tot táppái Vegas Golden Knights -juávkun 4–1.[1]
Florida Panthersist lijjii nelji syemmilii spellee: kapteen Alexander Barkov, volliitteijeeh Anton Lundell já Eetu Luostarinen sehe piälušteijee Niko Mikkola. Juávhu iševälmejeijen lii oovdiš NHL-spellee Tuomo Ruutu.[1]
Speelah
[mute | mute käldee]Oilers vuoitij vuossâmuu speelâ 4–3 jotkâuásist jieijâs päikkihaalist. Nubbe spellâ piištij nube jotkâuási räi, kuás Panthers viijmâg čoovdij tom 4–5. Talle ráiđu sirdâšui Floridan. Panthers vuoitij kuálmád speelâ čielgâsávt 6–1. Oilers kuittâg tassij rááiđu, ko tot vuoitij niäljád speelâ 4–5 jotkâuásist. Siämmást ráiđu sirdâšui oppeet Edmontonân. Tobbeen Panthers vaaldij läävhi aldeláá miäštárvuođâ, ko tot vuoitij viiđâd speelâ 2–5.[1]
Kuuđâd spellâ
[mute | mute käldee]
Kuuđâd spellâ spellui Sunrise kaavpugist Floridast koskokkoiiđeed Suomâ ääigi. Tot nuuvâi 5–1. Speelâ sáŋgárin lâi kanadalâš volliitteijee Sam Reinhart, kote čooskij nelji moolâ.[2][3]
Panthers algâttij kuuđâd speelâ pehtilávt. Vuálá viiđâ miinut maŋa Sam Reinhart rievvij skiäru Oilers čuovjisviijve alne, puáibildij Oilers piälušteijei kooskâst já čooskij skiäru moolân. Vuosmuu uási loopâst Matthew Tkachuk paajij 2–0-moolâ. Sun finnij skiäru skipárijnis Luostarisiist já Lundellist.[2][3]
Nube uási loopâst skiärru koolpâi Oilers moolâvaavtâ peht Barkovân, kiän paccâm vist koolpâi moolân Reinhart peht. Panthers lâi njunošist 3–0.[2][3]
Oilers koolgâi lonottiđ moolâvaavtâs lasespellei jo talle ko kuálmád uásist lâi vala čiččâm minuttid spellâmäigi, vâi tot puávtáččij tassiđ speelâ. Panthers lâi kuittâg liijkás nanos. Forgâ Barkov adelij skiäru Reinhartân, kote čooskij skiäru kuárus moolân. Miinut maŋa Reinhart pieijâi skiäru kuárus moolân vala uđđâsist. Sun finnij skiäru Carter Verhaeghest, kote lâi fáárust meiddei kyevti ovdebáá moolâst.[2][3]
Sam Reinhart paajij ohtsis čiččâm moollâd Oilers vuástá. Toiguin sun, Wayne Gretzky já Mike Bossy láá áinooh spelleeh, kiäh láá pááččám čiččâm moollâđ oovtâ fiinaalrááiđust.[2][3]
Ko speelâst lijjii tuše vittâ miinut spelâhánnáá, te Oilers finnij oovtâ moolâ. Panthers juhleh lijjii kuittâg jo joođoost, ige Oilers pastam koskâlduttiđ taid. Forgâ kapteen Barkov uážui kaggâđ Stanley Cup -pookaal nube tove.[2][3]
Čuákánkiäsu
[mute | mute käldee]| Juávkku 1 | Puáđus | Juávkku 2 | Spellâ 1 | Spellâ 2 | Spellâ 3 | Spellâ 4 | Spellâ 5 | Spellâ 6 | Spellâ 7 |
|---|---|---|---|---|---|---|---|---|---|
| Edmonton Oilers | 2–4 | Florida Panthers | 4–3 () | 4–5 () | 1–6 | 5–4 () | 2–5 | 1–5 |
Fáádást eres soojijn
[mute | mute käldee]
Wikimedia Commonsist láá koveh teikkâ eres tiätuvuárháh fáádást Ive 2025 Stanley Cup finaleh.
Käldeeh
[mute | mute käldee]- 1 2 3 Valkeapolku, Valtteri: Florida Panthers lii vuáittám NHL Stanley Cup anarasaavis.fi. 19.6.2025. Čujottum 19.6.2025.
- 1 2 3 4 5 6 Gulitti, Tom: Reinhart scores 4, Panthers top Oilers in Game 6 to repeat as Stanley Cup champions www.nhl.com. 18.6.2025. Čujottum 19.6.2025. (eŋgâlâskielân)
- 1 2 3 4 5 6 Servo, Jaakko: Florida on jälleen NHL:n mestari – Sam Reinhartilla uskomaton neljän maalin ilta Yle Urheilu. 18.6.2025. Čujottum 19.6.2025. (suomâkielân)