Ive 2025 Moldova parlamentvaaljah
Ive 2025 Moldova parlamentvaaljah lijjii parlamentvaaljah, moh uárnejuvvojii Moldovast čohčâmáánu 28. peeivi 2025.[1] Vaaljâin väljejuvvojii ohtsis 101 jesânid Moldova parlament iivij 2025–2029 vaaljâpajan.
Vaaljâid vuoitij EU-miäldásâš Toimâm já solidaarlâšvuotâ -piäládâh, mii finnij 50,2 prosentid puoh jienâin. Návt tot meid finnij eenâblovo (55/101 saijeed) parlamentist.[2]
Piäláduv stuárráámussân vuástálisten lâi Ruošâ-miäldásâš Eejieennâmlâš litto -piäládâh, mii finnij 24,2 prosentid jienâin.[2]
Vaaljâi ääigi lâi huolâ tast, ete Ruoššâ siäháničij valjáid. Moldova tallaš president Maia Sandu, kote kulá Toimâm já solidaarlâšvuotâ -piäládâhân, eeđâi, ete Ruoššâ irâttij vaiguttiđ valjáid uástimáin jienâid já leevâtmáin perettemes tiäđuid. Meid ovdâmerkkân Ranska, Saksa já Puola jođetteijeeh ettii siämmáá.[2]
Eejieennâmlii lito tallaš jođetteijee já Moldova oovdiš president Igor Dodon vist eeđâi, ete paijeel 200 000 olmožid Transnistriast iä uážžum jienâstiđ. Ukraina rääijid vuástá leijee Transnistria kuávlu lii kulluuttâm jieijâs jiečânâssân Moldovast. Sandu mield Moldova poorgâi puoh, maid tot poostij, ton oovdân, ete ulmuuh Transnistriast puávtáččii jienâstiđ. Suu mield Moldova ij kuittâg puáhtám vaiguttiđ toos, mii tábáhtuvá kuávlust, mii ij tuubdâst Moldova haldâttâs vääldi.[2]
Fáádást eres soojijn
[mute | mute käldee]
Wikimedia Commonsist láá koveh teikkâ eres tiätuvuárháh fáádást Ive 2025 Moldova parlamentvaaljah.
Käldeeh
[mute | mute käldee]- ↑ Alegerile parlamentare vor avea loc pe 28 septembrie tribuna.md. 16.4.2025. Čujottum 1.10.2025. (romaniakielân)
- ↑ a â b c Valkeapolku, Valtteri: Moldovast EU-miäldásâš piäládâh lii vuáittám parlamentvaaljâid anarasaavis.fi. 1.10.2025. Čujottum 6.10.2025.