Hollow Knight: Silksong
Hollow Knight: Silksong lii videospellâ, mon lii ráhtám australialâš spellâirâttâs Team Cherry.[1] Spellâ almostui čohčâmáánu 4. peeivi 2025 tijme 17 Suomâ ääigi.[2] Silksong lii jotkâuási Hollow Knight -speelân, mii almostui ive 2017. Algâalgâlii speelâst ive 2025 räi lijjii vuobdum paijeel 15 miljovn pittád.[3] Tot lâi uáli jo merhâšittee meeri, tastko Team Cherry -irâttâsân kullii talle tuše kuulmâs: taaidâr Ari Gibson, sundáttâllee William Pellen já ohjelmistee Jack Vine. Sii lasseen Christopher Larkin västidij speelâ jienâin já muusikist.[1]
Historjá
[mute | mute käldee]Vuosmuuh tiäđuh Silksongist pottii ive 2019. Tastmaŋa ulmuuh vuordii moovtâ speelâ. Steam-palvâlusâst, mii lii maailm stuárráámus viermikävppi tiäturân uáivildum videospelláid, Silksong lâi ive 2025 puoh enâmustáá vuordum videospellâ.[3] Porgemáánu pelimuddoost tot lâi 4,8 miljovn spellee tuoivâlistoost.[4]
Motomeh eres spellâirâttâsah meridii sirdeđ jieijâs speelâ almostittem, amas speelah pääcciđ Silksong suoivui. Já ko Silksong viijmâg almostui, te Steam já videospeelâi eres viermikäävpih joskii toimâmist, tastko nuuvt maaŋgâs irâttii uástiđ speelâ siämmáá ääigi.[5]
Čohčâmáánu 10. peeivi 2025 speelâ lijjii árvuštâllâm Steamist paijeel 40 000 olmožid, já paijeel 90 prosentid árvuštâlmijn lijjii positiivliih. Negatiivliih árvuštâlmeh kuoskii iänááš speelâ vädisvuotân.[3]
Jiešvuođah
[mute | mute käldee]Silksong spellee huáđđon lii Hornet-nommâsâš tivre, mii lâi fáárust jo vuosmuu speelâst. Hornet lii valdum faŋgân omâs enâmân, kost tot ferttee tutkâđ mučis maailmijd, selvâttiđ syeligâsvuođâid, njuškođ já kuárŋudiđ sehe tuárruđ eres tivrijguin.[3]
Silksong lii nuuvt kočodum tuáriskulij jurâttettee spellâ (eŋgâlâskielân side-scrolling video game). Tast kamera čáittá spellâmaailm tuárrást, já huáđđooh já piirâs lihâdeh čižetpel já uálgispel. Veikâ Silksong oro lemin 2D-spellâ ađai kyevtuulâtlâš spellâ, te jieš maailm lii kuittâg kuulmâuulâtlâš. Speelâ taaiđâ lii sargum kieđâi.[3]
Speelâ puáhtá spellâđ tiäturáin já tagarij stuorrâ spellâkonsolijguin ko Nintendo Switch, Sony PlayStation já Microsoft Xbox. Spellâ lii rahtum Unity-spellâmoottoráin.[1]
Käldeeh
[mute | mute käldee]- ↑ a â b Games Team Cherry. Čujottum 10.9.2025. (eŋgâlâskielân)
- ↑ Mattila, Risto: Miljoonat ovat odottaneet tätä Silksong-peliä seitsemän vuotta, ja tänään kello 17 odotus päättyy Yle Uutiset. 4.9.2025. Čujottum 10.9.2025. (suomâkielân)
- ↑ a â b c č Valkeapolku, Valtteri: Eromâš vuordum videospellâ Hollow Knight: Silksong lii almostum anarasaavis.fi. 10.9.2025. Čujottum 10.9.2025.
- ↑ Elliott, Rhys: Silksong has 4.8 million Steam wishlists, more than any other 2025 game The Alinea Insight newsletter. 14.8.2025. Čujottum 10.9.2025. (eŋgâlâskielân)
- ↑ Di Giovanni, Gianfranco: Australian-made Hollow Knight: Silksong crashes global stores on launch ABC News. 4.9.2025. Čujottum 10.9.2025. (eŋgâlâskielân)