Euroviisuh-lávlumkišto 2026
Euroviisuh-lávlumkišto 2026 lii 70. kerdi, ko lávlumkišto uárnejuvvoo. Kišto uárnejuvvoo Wienist Nuorttâriijkâst tondiet ko Nuorttâriijkâ ovdâsteijee JJ vuoitij ive 2025 kišto, ko sun finnij finalist 436 čyegisid pitástis Wasted Love.[1][2] Kišto uárnejeh Euroop almosradiounion (EBU) já Nuorttâriijkâ almosradiofinnodâh ORF.
Semifinaleh uárnejuvvojeh vyesimáánu 12. peeivi já 14. peeivi 2026.[2] Fiinaal uárnejuvvoo vyesimáánu 16. peeivi 2026.[2] Ive 2026 lii kuálmád kerdi, ko Euroviisuh uárnejuvvojeh Wienist. Euroviisuh uárnejuvvojii tobbeen meiddei iivij 1967 já 2015.[2]
Tábáhtussajeh
[mute | mute käldee]
Ive 2026 Euroviisui tábáhtussaijeen lii maaŋgâtooimâareena Wiener Stadthalle Wienist Nuorttâriijkâst. Tot lii Nuorttâriijkâ stuárráámus maaŋgâtooimâareena. Toos čäähih 16 152 olmožid. Siämmáá saajeest uárnejuvvojii meiddei ive 2015 Euroviisuh.
Juávhoid jyehim semifinalij várás
[mute | mute käldee]Uásálisteh juáhhojii viiđâ juávkun uđđâivemáánu 12. peeivi 2026.[3] Jyehim vuáđudui ovdebij iivij jienâstmáid. Ranska, Saksa, Italia, Ovtâstum kunâgâskodde já oovdeb ive vyeittee Nuorttâriijkâ pessii njuolgist finalân.
| Juávkku 1 | Juávkku 2 | Juávkku 3 | Juávkku 4 | Juávkku 5 |
|---|---|---|---|---|
Uásálisteeh
[mute | mute käldee]Gaza tile keežild maaŋgah láá vaattâm, ete Israel ij uážuččii uásálistiđ taan ive Euroviisuid, mut skammâmáánu 4. peeivi 2025 EBU almottij, ete Israel uážžu uásálistiđ.[4] EBU almottâs maŋa Vuáládâhenâmeh, Espanja, Irland já Slovenia almottii, ete sij boikotisteh taan ive Euroviisuid.[4] Juovlâmáánu 10. peeivi Island seervâi boikotân.[5] Motomeh artisteh láá macâttâm palhâšumepokalis tondiet ko Israel uásálist Euroviisuid.[6]
Bulgaria máccá kiišton kuulmâ ive maŋa, Romania kyevti ive maŋa já Moldova oovtâ ive maŋa.[7]
Käldeeh
[mute | mute käldee]- ↑ Olthuis, Marja-Liisa: Euroviisui 2025 vyeittee lii Nuorttâriijkâ – Fáárust ennuv syemmilâš pargo Anarâš aavis. 19.5.2025. Vyerkkejum 19.5.2025. Čujottum 19.5.2025.
- ↑ a â b c Pudas, Mari: Tässä on Euroviisujen isäntäkaupunki Iltalehti. 20.8.2025. Vyerkkejum 20.8.2025. Čujottum 20.8.2025. (suomâkielân)
- ↑ Suomi esiintyy tämän vuoden Euroviisujen ensimmäisessä semifinaalissa Yle. 12.1.2026. Čujottum 14.1.2026. (suomâkielân)
- ↑ a â Muhonen, Helmi, Kokko, Tuomas já Pölönen, Sakri: Israel saa osallistua Euroviisuihin, Ylen mukaan myös Suomi valmistautuu laulukilpailuun Helsingin Sanomat. 4.12.2025. Vyerkkejum 10.12.2025. Čujottum 10.12.2025. (suomâkielân)
- ↑ Ragnar Jón Hrólfsson: Ísland tekur ekki þátt í Eurovision 2026 RÚV. 10.12.2025. Čujottum 10.12.2025. (islandkielân)
- ↑ Salli Hakala: Euroviisujen voittaja luopuu palkinnostaan Ilta-Sanomat. 11.12.2025. Čujottum 13.12.2025.
- ↑ Bulgaria, Romania and Moldova will return to Eurovision for Vienna 2026 eurovision.tv. 4.11.2025. Čujottum 10.12.2025. (eŋgâlâskielân)