Emma Dilemma
Emma Dilemma lii tavesämikielâlâš peivikirjehámásâš nuorâikirje, mon lii čáállám Hanne-Sofie Suongir. Kirje almostitij kirjekuástideijee Iđut ive 2023. Kirje kuuvijd lii ráhtám Nina Marie Andersen. Kuuvij já teevstâ stiijlâ áánsust lohhest lii älkkee luuhâđ já iberdiđ siskáldâs, veikkâ tavesämikielâ ij liččiigin suu eenikielâ.[1]
Uáivipersovn já juonâ
[mute | mute käldee]Kirje uáivipersovn lii 14-ihásâš Emma. Kirjeest kieđâvuššojeh nuorâi háástuh já lusis, mut teháliih fáádáh tego purâdemhemâdâsah, suhâpeli-identiteet, soro já monâttem.[2] Kirje sáttá meid išediđ rävisulmuid iberdiđ nuorâi juurdâmaailm já eellim.[1]
Palhâšumeh já iävtukkâsvuođah
[mute | mute käldee]Emma Dilemma -kirje vuoitij ive 2024 Sämirääđi kirjálâšvuotâpalhâšume. Palhâšume keigejui vyeittei Göteborg kirjemeesuin 28.9.2024. Kirjálâšvuotâpalhâšume árvuštâllei mield Suongir puovtij kirjijnis uđđâ genre sämmilii kirjálâšvuotân. Árvuštâlleeh onnii tehálâžžân, et 10−15-ihásáid lii čallum eidu sii ahejuávkun uáivildum kirje, mii váldá sii tuođâst.[1]
Kirje lii iävtukkâssân ive 2025 Tave-enâmij rääđi párnái- já nuorâikirjálâšvuotâpalhâšumán.[2]
Käldeeh
[mute | mute käldee]- ↑ a â b Schreck, Jasmina: Hanne-Sofie Suongir lii vuáittám taan ive Sämirääđi kirjálâšvuotâpalhâšume anarasaavis.fi. 3.10.2024. Čujottum 5.4.2025.
- ↑ a â Schreck, Jasmina: Emma Dilemma já Stinas jojk Tave-enâmij rääđi párnái- já nuorâikirjálâšvuotâpalhâšume iävtukkâssân anarasaavis.fi. 4.4.2025. Čujottum 5.4.2025.