Eennâmtieđâ

Eennâmtieđâ totká Eennâmpáálu ase já tom kuávlulijd já paaihijd lohtâseijee almonijd.

Eennâmtieđâ ađai geografia (kreikakielân geografia ’eennâm sárgum’) lii tieđâsyergi, mii totká Eennâm ase já almonijd, moh tábáhtuveh eennâm alne sehe luándu já ulmui tooimâi keežild. Eennâmtieđâ ocá tai almonij njuolgâduslâšvuođâid já suujâid sehe sierâ almonij koskâsijd vuáruvaiguttâskoskâvuođâid. Eennâmtiettuu tutkâmuščuosâttuvah láá ovdâmerkkân Eennâm iälulâš já iäluttes luándu proseseh, tai historjá, viehâdâh, kulttuur, asâttem, ekonomia já pirrâdâh sehe pirâsnubástusah puoh aaigij já kuávlui mittokaavast.

Eennâmtieđâ máttááttâs škoovlâst

Vuáđuškoovlâst lii eennâmtiäđu oppâaamnâs, mast kieđâvuššojeh eennâmtiettuu vuáđuääših. Vuáđuškoovlâ vuosmuin luokain eennâmtiäđu máttááttâs lii ovtâstittum pirâsoppáin. Luvâttuvâst amnâs nommâ lii ollâoppâttuvlii tieđâsyergi mield eennâmtieđâ.