Anonyymeh Alkoholisteh
.svg)
Anonyymeh Alkoholisteh ađai AA (eŋgâlâskielân Alcoholics Anonymous) lii aalmugijkoskâsâš siärvus, mon jesânij ulmen lii pissoođ juvâhánnáá já išediđ eres alkoholistijd juksâđ čiälgusvuođâ. AA ij lah oskolduvlâš siärvus.[1]
AA lii kyeimiservi, mon jesâneh jyehih koskânis fiäránijdis, vuoimijdis já tuáivuidis, vâi sij pyehtih čuávdiđ ohtsâš vädisvuođâidis sehe išediđ iärásijd tuoibuđ alkoholismist. Áinoo vátámâš peessâđ jesânin lii haalu joskâđ juhâmist.[1]
Vuáđujurduuh
[mute | mute käldee]AA toimâ vuáđuduvá čuávuváid vuáđujurduid:[1]
- Iä lah hoovdah, pic tuše rijjâtátuliih jođetteijeeh.
- Iä lah magarehkin kenigâsvuođah iäge jeessânmáávsuh.
- AA tuáimá jiešváldálávt rijjâtátulij torjui vuáđuld.
- AA ij lah littoost magarijgin idealistlij, oskolduvlij teikkâ pooliitlij ornijdumijgijn teikkâ lágádâsâigijn.
- AA ij vääldi pele magaráidgin vižžekoččâmuššáid, ige tot piälušt teikâ vuástálist maiden.
- Áinoo ulmen lii pissoođ čiälgusin já išediđ eres alkoholistijd juksâđ čiälgusvuođâ.
- Ij lah jeessânregister.
- Jeessânvuotâ lii ain syeligâs.
- AA ij čuávu ige raijii jesânij eellim.
- AA ij kieldi juuhâm.
- AA ij vääldi vuástá ekonomâlii torjuu ige skeeŋkâid.
Historjá
[mute | mute käldee]AA šoodâi Ovtâstum staatâin ive 1935. Newyorklâš almai Bill W. uusâi nube alkoholkevttee, kote halijdij joskâđ juhâmist já pissoođ čiälgusin. Sun kaavnâi Bob (teikâ Dr. Bob). Suái vuáđudáin AA oovtâst ton maŋa ko suái hoksáin, ete viärdásâštoorjâ iššeed pissoođ čiälgusin. Viiđâ vuosmuu ive ääigi toimâ vijđánij hitásávt. Ive 1939 almostui kirje Alcoholics Anonymous, mon vuosmuuh jesâneh čallii oovtâst. Tast maŋa AA vijđánij jotelubbooht maŋgáid kaavpugáid, já ive 2024 tot kavnui suullân 180 enâmist já jesâneh lijjii paijeel 2 miljovn.[1]
Suomân AA poođij ive 1948, já ive 2024 AA-juávhuh lijjii suullân 600. Ive 2024 puoh tavemus AA-juávkku Suomâst lâi Anarist.
Siärvus pargo
[mute | mute käldee]AA-juávkku
[mute | mute käldee]AA čuákkimijn jesâneh jyehih koskânis fiäránijdis, vuoimijdis já tuáivuidis. Ulmen lii juksâđ čiälgusvuođâ viärdásâštorjuu peht. AA cuákkimij saje já ääigih Suomâst kávnojeh aa.fi-nettisijđoin. Juávhuin iä lah miärádâsah ijge kihheen pyevti páguttiđ kiämmán moossân. Áinoo vátámâš lii, ete čuákkimpeeivi ij uážu juuhâđ alkohol.[1]
Jesânin puáhtá leđe jyehi olmooš, kote tobdá, ete juhâmist lii šoddâm haaldâsmettum, já kote haalijd joskâđ juhâmist. Jyehi olmooš, kote uásálist mottoom čuákkimân já iätá, et lii alkoholist, lii tállán AA jeessân.[1]
12 läävhi ohjelm
[mute | mute käldee]Kyehtnubálov läävhi tuoibumohjelm lii iävtuttâs persovnlii tuoibuumân. Tuoibumohjelm vuáđuduvá AA jesânij fiäránáid.[1]
Kyehtnubáloh lävkkid, moh almostittojii vuosmuu tove Alcoholics Anonymous kirjeest, láá:[1]
- Mij mieđettijm, ete mij ep pastam leđe juvâhánnáá já ete elimist lâi šoddâm haaldâsmettum.
- Mij oopâim oskođ, ete miinii stuárráábijd vuoimijd puávtáččij macâttiđ mii tiervâsvuođâ.
- Mij meridijm luovâttiđ tátuidân já elimân Immeel haaldun, tiegárin ko mij suu iberdep.
- Mij čođâlditijm vuáđulii, palottes já moraallii jiešsuogârdem.
- Mij mieđettijm puástu tavoidân Imelân, olssân já mottoom eres ulmui.
- Mij lâim valmâšeh toos, et Immeel meddâlist puoh mii vááijuvvuođâid.
- Mij táátuim Immeel meddâlistiđ vááijuvvuođâidân.
- Mij raahtijm listo puoh ulmuin, kiäid lâim vahâgittâm já halijdijm áánnuđ sist addâgâs.
- Mij toovâim pyere puoh ulmuid talle ko tot lâi máhđulâš ige tot vahâgittám eres ulmuid.
- Mij joođhijm jiešsuogârdem já ko iän lamaš vuoigâdist, te mieđettijm tom tállán.
- Mij viigâim ruhâdâlmáin já smietâdmáin ovdediđ ohtâvuođâ Imelân, tiegárin ko mij suu iberdep. Mij ruhâdâlâim tuše tiäđu suu táátust mii háárán já vyeimi porgâđ ton táátu mield.
- Ko mij lâim feerim vuoiŋâlii moránem tai laavhij mield, viigâim tuálvuđ saavâ eres alkoholistáid sehe eelliđ tai prinsiipij mield.
Fáádást eres soojijn
[mute | mute käldee]
Wikimedia Commonsist láá koveh teikkâ eres tiätuvuárháh fáádást Anonyymeh Alkoholisteh.
