Aalmugijkoskâsâš fennougristkongres
Aalmugijkoskâsâš fennougristkongres ađai CIFU (Congressus Internationalis Fenno-Ugristarum) lii vijđásumos aalmugijkoskâsâš suomâ-ugrâlâš kongres, mii puáhtá oohtân čuođijd totkeid sierâ enâmijn.[1] Vuossâmuš kongres uárnejui Budapestist ive 1960, já ton maŋa kongres lii uárnejum jyehi viiđâd ive. Vistig uárnejeijee-enâmin lijjii vuáruluvâi Uŋgar, Suomâ já Sovjetlitto. Ive 1995 rääjist kongres uárnejuuškuođij Eestienâmist-uv. Ive 2020 kongres sirdâšui koronavirus keežild ihán 2022, já tot uárnejui Wien ollâopâttuvâst Nuorttâriijkâst.[2]
CIFU lii uáli jo tehálâš konferens, tastko tot addel kielâtotkeid máhđulâšvuođâ nanosmittiđ oovtâstpargo já uápásmuđ toos, magareh tutkâmušah láá joođoost jieškote-uvlágánijn ollâopâttuvâin pirrâ maailm.[3]
Kongreseh
[mute | mute käldee]- 1960: CIFU I, Budapest, Uŋgar
- 1965: CIFU II, Helsinki, Suomâ
- 1970: CIFU III, Tallinn, Eestieennâm (uási Sovjetlittoost)
- 1975: CIFU IV, Budapest, Uŋgar
- 1980: CIFU V, Turku, Suomâ
- 1985: CIFU VI, Syktyvkar, Komi, Sovjetlitto
- 1990: CIFU VII, Debrecen, Uŋgar
- 1995: CIFU VIII, Jyväskylä, Suomâ
- 2000: CIFU IX, Tartto, Eestieennâm
- 2005: CIFU X, Yoshkar-Ola, Mari El, Ruoššâ
- 2010: CIFU XI, Piliscsaba, Uŋgar
- 2015: CIFU XII, Oulu, Suomâ
- 2022: CIFU XIII, Wien, Nuorttâriijkâ
- 2025: CIFU XIV, Tartto, Eestieennâm
XIII kongres ive 2022
[mute | mute käldee]
- Válduartikkâl: XIII fennougristkongres
Kulmânubálovváád fennougristkongres uárnejui porgemáánu 22.–26. peeivi 2022 Wien ollâopâttuv kampusist, mii lii ohtâ ollâopâttuv soojijn pirrâ kaavpug. Ovdil tobbeen lâi stuorrâ pyecceiviäsu, mut ton huksiittâsah já rakânâsah váldojii virgálávt ollâopâttuv kiävtun ive 1998.[3][4]
Fáárust lijjii ennuv anarâškielâ sárnooh, já anarâškielâ lâi korrâsávt uáinusist. Anarâškielân kyeskee sahâvuáruid tollii Márjá-Liisá Olhtuis, Taarna Valtonen, Annika Pasanen, Jukka Mettovaara já Tuomas Koukkari. Olthuis oovdânpuovtij Anarâškielâ seervi tooimâ, Valtonen sáárnui anarâškielâlijn päikkinoomâin, já Pasanen muštâlij sämikielâi iäláskittem puátusijn sehe tast, mon ennuv onnáá peeivi Suomâst sarnum sämikielah sirdâšuveh suhâpuolvâst nuubán. Mettovaara já Kuokkari vuod kieđâvušáin kielâ- já sujâttemopâlijd aašijd.[3]
XIV kongres ive 2025
[mute | mute käldee]- Válduartikkâl: XIV fennougristkongres
Neljinubálovváád fennougristkongres uárnejui Tartto ollâopâttuvvâst Eestienâmist porgemáánu 18.–23. peeivi 2025. Tartto lâi ovdil hovdim CIFU-kongres ive 2000. Lekkâmtábáhtusâst čielgâi, et fáárust lijjii paijeel 300 totked 21 enâmist. Kongres ääigi tuállojii muáddičyet sahâvuárrud puohlágánijn fáádáin, moh kuoskii suomâ-ugrâláid kieláid.[1]
Sämikielâi kielâtiettuu uáinust eromâš mielâkiddiivâš sessio lâi Uáinuh sämikielân (eŋg. Perspectives on Saami). Taan sessiost tuállojii ohtsis 15 sahâvuárrud sämikielâin. Anarâškielâst tuállojii kuttâ sahâvuáru. Sessio eres sahâvuáruh kuoskii kieldâsämikielân, nuorttâlâškielân, tavesämikielân, maadâsämikielân, kuolasämikielân, juulevsämikielân já sämikielâi máttátmân.[1]
Käldeeh
[mute | mute käldee]- ↑ a â b Olthuis, Marja-Liisa: XIV fennougristkongres uárnejui Tartto ollâopâttuvvâst Eestienâmist anarasaavis.fi. 26.8.2025. Čujottum 26.8.2025.
- ↑ About CIFU – Congressus XIV Internationalis Fenno-Ugristarum cifu14.ut.ee. Čujottum 26.8.2025. (eŋgâlâskielân)
- ↑ a â b Brecciaroli, Fabrizio: CIFU XIII -konferens Wienist. Anarâš-lostâ, 2022, 35. ihekerdi, s. 10–12. Anarâškielâ servi.
- ↑ Programme cifu13.univie.ac.at. Čujottum 26.8.2025. (eŋgâlâskielân)