A. Revathi
A. Revathi lii indialâš aktivist, performanstaaidâr já čällee.[1] Sun lii transnissoon já kulá hijra-siärvusân.
Eellim
[mute | mute käldee]A. Revathi šoodâi Duraisami-nommâsâžžân Tamil Nadust Indiast eennâmviljâleijeeperrui. Sun lii nuorâmus perruu viiđâ päärnist: sust láá kulmâ stuorrâ viiljâ já ohtâ uábbi. Sun tuubdâi jo pärnin, ete lii puástu roopâst, já maŋgii sierâdij nieidâigijn já kárvudâđâi eenis pihtâsijd.
Revathi peerâ ij iberdâm tâi kunnijâttám suu nissoonlijd tobdoid, já sun patârij Delhin ive 1985.[1] Tobbeen sun teeivâi ulmuid, kiäh kullii hijra-siärvusân, já sun varrij aassâđ siigijn. Revathin kuittâg čielgâi, mon väädis hijraeellim tuođâi lii, ko sosiaallâš sierrim, viehâväldi já seksuaallâš viehâväldi lijjii liijkás-uv táváliih.[2]
Ko Revathi perrui čielgâi, kost sun lii, te sij viežžii suu pááikán já páguttii suu eelliđ almajin. Mottoom ääigi maŋa Revathi kuittâg varrij Mumbain, kost sun eelij suhâpelemolsomčuopâdâsâst.[1] Tom aneh hijra-siärvusist sirdâšemriittin, mii taha ulmust virgálávt uási hijraid. Čuopâdâs maŋa sun uážui noomâ Revathi hijratáálus gurust.[2]
Maŋeláá Revathi varrij Bengalurun, kost sun vistig poorgâi seksipargen, mutâ ive 1999 sun uážui pargo Sangamast, mii lii India HLBT-vuoigâdvuođâi oovdân taistâleijee ornijdâh. Revathi parga ain-uv HLBT-vuoigâdvuođâi oovdân Indiast.[1]
Ive 2010 sust almostui kirje The Truth about Me: A Hijra Life Story, mii muštâl suu elimist. Kirje čallui tamilkielân, mutâ tot almostui vistig tuše eŋgâlâskielân, ko Revathi poolâi perruus reaktiost. Eŋgâlâskielân kirje jurgâlij V. Geetha. Maŋeláá tot almostui meid tamilkielân noomáin Vellai Mozhi,[3] já tot lii jurgâlum meid eres maadâ-India kieláid.[1]
Kirjeh
[mute | mute käldee]- 2004 – Unarvum Uruvamum (eŋgâlâskielân Our Lives, Our Words)
- 2010 – The Truth about Me: A Hijra Life Story (kirje tamilkielâlâš versio Vellai Mozhi almostui 2011)[3]
Käldeeh
[mute | mute käldee]- ↑ a â b c č Kellie Nault: A. Revathi, Activist and Performer, on Her Journey as an Indian Trans Woman • The Lakshmi Mittal and Family South Asia Institute The Lakshmi Mittal and Family South Asia Institute. 9.4.2024. Čujottum 5.4.2025. (eŋgâlâskielân)
- ↑ a â Rēvati, Va Kītā: The truth about me: a hijra life story. New Delhi: Penguin Books, 2010. 652680853. ISBN 978-0-14-306836-5. Kirje nettiversio (čujottum 5.4.2025).
- ↑ a â Prabhu, Gayathri: Writing a Life Between Gender Lines: Conversations with A.Revathi about Her Autobiography "The Truth About Me: A Hijra Life Story" eprints.manipal.edu. 2014. Vyerkkejum 17.5.2018.